ຕອນເຊົ້າ ຂອງວັນທີ 24 ມີຖຸນາ 2025 ຢູ່ທີ່ຫ້ອງປະຊຸມ ຂອງໂຮງຮຽນການເມືອງ ແລະ ການປົກຄອງ ແຂວງຫຼວງນໍ້າທາ ໄດ້ເປີດຊຸດຮຽນທິດສະດີການເມືອງ ລະບົບຂັ້ນຕົ້ນ ຮຸ່ນທີ VI ໃຫ້ແກ່ພະນັກງານຫຼັກແຫຼ່ງ ຢູ່ແຂວງຫຼວງນໍ້າທາ ໂດຍການເປັນປະທານ ຂອງ ທ່ານ ປທ ຄໍາສີ ດັງສະໄຫວ ເລຂາໜ່ວຍພັກ, ຫົວໜ້າໂຮງຮຽນການເມືອງ ແລະ ການປົກຄອງ ແຂວງຫຼວງນໍ້າທາ, ໃຫ້ກຽດເຂົ້າຮ່ວມ ຂອງທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຜູ້ຊີ້ນໍາວຽກງານການເມືອງ-ແນວຄິດ ພັກພະນັກງານ, ມີຮອງຫົວໜ້າໂຮງຮຽນ, ຄູ-ອາຈານ, ແຂກຖືກເຊີນ, ຕະຫຼອດຮອດນັກສຶກສາເຂົ້າຮ່ວມຢ່າງພ້ອມພຽງ.
ທ່ານ ປທ ແສງ ເຊືອຍສົມບັດ ຮອງເລຂາໜ່ວຍພັກ, ຮອງຫົວໜ້າໂຮງຮຽນການເມືອງ ແລະ ການປົກຄອງແຂວງຫຼວງນໍ້າທາ ໄດ້ຜ່ານແຜນການຮຽນ-ການສອນທິດສະດີການເມືອງ ລະບົບຂັ້ນຕົ້ນ ຮຸ່ນທີ VI ໃຫ້ແກ່ພະນັກງານຫຼັກແຫຼ່ງ ຢູ່ແຂວງຫຼວງນໍ້າທາ ປະຈຳປີ 2025 ເພື່ອສ້າງໃຫ້ພະນັກງານຄຸ້ມຄອງ ແລະພະນັກງານນໍາພາຮຸ່ນສືບທອດ ຢູ່ບັນດາພະແນກການ ຫ້ອງການ ຂອງເມືອງ, ບັນດາຂະແໜງການອ້ອມຂ້າງ ມີນັກສຶກສາທັງໝົດ 45 ຄົນ, ຍິງ 16 ຄົນ ຊຶ່ງຈະໄດ້ປະຕິບັດການຮຽນການສອນໄລຍະ 3 ເດືອນ, ລວມ 70 ວັນ, ຮຽນຕົວຈິງ 60 ວັນ, ເທົ່າກັບ 420 ຊົ່ວໂມງ ລວມມີ 7 ກຸ່ມວິຊາຮຽນ ແລະ 1 ຂຽນບົດລາຍງານຈົບຂັ້ນ ລວມເປັນ 8 ກຸ່ມວິຊາຮຽນ ຄື: ກຸ່ມວິຊາປັດຊະຍາມາກ-ເລນິນ ມີ 7 ບົດ; ກຸ່ມວິຊາເສດຖະສາດການເມືອງມາກ-ເລນີນ ມີ 9 ບົດ; ກຸ່ມວິຊາລັດທິສັງຄົມນິຍົມວິທະຍາສາດ, ການເມືອງວິທະຍາ ແລະສັງຄົມສາດ ມີ 12 ບົດ; ກຸ່ມວິຊາແນວຄິດໄກສອນ ພົມວິຫານ ມີ 5 ບົດ; ກຸ່ມວິຊາພື້ນຖານການຄຸ້ມຄອງບໍລິຫານ, ທິດສະດີລັດ ແລະກົດໝາຍ, ເຕັກນິກບໍລິຫານ ມີ 7 ບົດ; ກຸ່ມວິຊາປະຫວັດສາດພັກ ແລະ ກໍ່ສ້າງພັກ 10 ບົດ. ນອກນັ້ນ, ນັກສຶກສາ ຍັງຈະໄດ້ເຄື່ອນໄຫວກິດຈະກໍາອື່ນໆທີ່ທາງໂຮງຮຽນວາງອອກ, ການເປີດຮຽນໄດ້ເລີ່ມແຕ່ວັນທີ 25 ມີຖຸນາ 2025 ເຖິງທ້າຍເດືອນກັນຍາ 2025 ໃຫ້ສໍາເລັດຜົນ.
ໃນໂອກາດທີ່ມີຄວາມໝາຍຄວາມສໍາຄັນ ທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຜູ້ຊີ້ນໍາວຽກງານການເມືອງ-ແນວຄິດ ພັກພະນັກງານ ໄດ້ໃຫ້ກຽດໂອ້ລົມຕໍ່ພິທີເປີດຊຸດຮຽນ, ການຮຽນທິດສະດີການເມືອງ ແມ່ນມີຄວາມໝາຍ, ຄວາມສໍາຄັນ ແລະຈໍາເປັນທີ່ສຸດຕໍ່ພະນັກງານຫຼັກແຫຼ່ງ, ພະນັກງານສືບທອດປ່ຽນແທນ ກໍຄືສະມາຊິກພັກ ຂອງພວກເຮົາໃນເງື່ອນໄຂປະຈຸບັນ ເພາະມັນແມ່ນການປ່ຽນແປງໃໝ່ ແລະເຊື່ອມໂຍງສາກົນ, ສະພາບເສດຖະກິດ-ການເມືອງໂລກ ໄດ້ມີຫຼາຍອັນປ່ຽນແປງໄປ; ເສດຖະກິດ-ສັງຄົມ ຂອງປະເທດເຮົາ ກໍໄດ້ພົບກັບຄວາມຫຍຸ້ງຍາກ ແລະຫັນປ່ຽນໂດຍພື້ນຖານ; ຈິດໃຈຄວາມຮູ້ສຶກນຶກຄິດ ຂອງບັນດາສະມາຊິກພັກ, ພະນັກງານ ແລະປະຊາຊົນບັນດາເຜົ່າ ໃນປັດຈຸບັນ ບໍ່ຄືກັບເມື່ອກ່ອນອີກ; ບັນດາບັນຫາແນວຄິດ ທິດສະດີການເມືອງ ກໍຄືເປົ້າໝາຍ ຂອງວຽກງານແນວຄິດທິດສະດີ ກໍມີຫຼາຍອັນເສື່ອມຖອຍ. ດັ່ງນັ້ນ, ການຮຽນທິດສະດີມາກ-ເລນິນ, ແນວຄິດໄກສອນ ພົມວິຫານ ກໍແມ່ນມາດຖານເງື່ອນໄຂ ຂອງພະນັກງານນໍາພາ-ຄຸ້ມຄອງ, ແມ່ນໜ້າທີ່ຄວາມຮັບຜິດຊອບ ຂອງສະມາຊິກພັກ, ພະນັກງານທຸກຂົງເຂດ ຈະຕ້ອງໄດ້ສຶກສາຮໍ່າຮຽນ.
ທ່ານຍັງໄດ້ໃຫ້ທິດຊີ້ນຳ ແລ ເນັ້ນໜັກຫຼາຍບັນຫາມາຍັງຄະນະຮັບຜິດຊອບໃຫ້ເອົາໃຈໃສ່ບາງບັນຫາດັ່ງນີ້:
1). ສໍາລັບຄະນະພັກ-ຄະນະນໍາໂຮງຮຽນ ຕ້ອງເອົາໃຈໃສ່ຍົກສູງນໍ້າໃຈຮັບຜິດຊອບນໍາພາ-ຊີ້ນໍາ, ໃກ້ຊິດຕິດ ແທດ, ຕິດຕາມ ກວດກາແຜນການຮຽນ-ການສອນໃຫ້ແທດເຖິງ.
2). ສໍາລັບຄູ-ອາຈານ ຕ້ອງຍົກສູງສະຕິຄວາມຮັບຜິດຊອບ ໃນການຊອກຮູ້ນໍາສັງຄົມ, ໝູ່ຄະນະ, ຄົ້ນຄວ້າກຳ ແໜ້ນແນວທາງນະໂຍບາຍ, ມະຕິ, ຄໍາສັ່ງ ຂອງພັກ, ລະບຽບກົດໝາຍ ຂອງລັດ ໃຫ້ແໜ້ນ ແລະສາມາດອະທິບາຍແຈ້ງທາງດ້ານທິດສະດີ ແລະສົມທຽບໃສ່ພຶດຕິກຳ ໃຫ້ກະຈ່າງແຈ້ງ, ເຮັດໃຫ້ນັກສຶກສາເຂົ້າໃຈ ແລະຮູ້ນໍາໄປໝູນໃຊ້ເຂົ້າໃນ ໜ້າທີ່ວຽກງານ ໃນຂົງເຂດຕົນໃຫ້ໄດ້ຮັບຜົນດີ, ການຊອກຮູ້ບົດຮຽນ ແລະປະສົບການອັນໃໝ່ໆ ເພື່ອນໍາມາຖ່າຍທອດ ໃຫ້ນັກສຶກສາ, ສາມາດນໍາໄປຈັດຕັ້ງປະຕິບັດໃນພາກຕົວຈິງໃຫ້ແຕກດອກອອກຜົນ ແລະມີຜົນສໍາເລັດ.
3). ສໍາລັບນັກສຶກສາ ຕ້ອງໄດ້ເອົາໃຈໃສ່ຄົ້ນຄວ້າຮໍ່າຮຽນ, ຂຶ້ນຫ້ອງເປັນປົກກະຕິ, ປະຕິບັດແຜນການຮຽນ-ການສອນ ຢ່າງເຂັ້ມງວດ, ເອົາໃຈໃສ່ການສຳມະນາ ເພື່ອແລກປ່ຽນບົດຮຽນເຊິ່ງກັນ ແລະກັນ, ເພື່ອນໍາເອົາທິດສະດີ ແລະ ພຶດຕິກຳທີ່ຕົນເອງໄດ້ຮໍ່າຮຽນໄປຜັນຂະຫຍາຍ ແລະໝູນໃຊ້ເຂົ້າໃນອົງການ ຂອງຕົນ.
4). ຕ້ອງເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ, ເປັນປຶກແຜ່ນແໜ້ນໜາໃຫ້ມີຄວາມເປັນເອກະ ພາບກັນທາງດ້ານແນວຄິດ ແລະການກະທໍາ, ພ້ອມກັນຍົກສູງຄວາມຮັບຜິດຊອບຕໍ່ການຄົ້ນຄວ້າຮໍ່າຮຽນໃຫ້ສໍາເລັດຜົນໄປດ້ວຍດີ ແລະມີຄຸນນະພາບສູງ.
ຂ່າວ/ພາບ: ອຈ ລັງ ສີສະເກດ
ບັນນາທິການ: ປທ ວຽງສະຫວັນ ຈັນທະວີໄຊ