ໃນຕອນເຊົ້າຂອງວັນທີ 12 ສິງຫາ 2020 ຢູ່ທີ່ໂຮງຮຽນການເມືອງ ແລະການປົກຄອງແຂວງຈຳປາສັກ ໄດ້ຈັດພິທີປິດສົກຮຽນປີ 2019 -2020 ແລະເປີດສົກຮຽນປີ 2020-2021 ໂດຍການໃຫ້ກຽດເຂົ້າຮ່ວມຂອງທ່ານ ບົວລິນ ວົງພະຈັນ ຮອງເຈົ້າແຂວງໆຈຳປາສັກ, ມີຫົວໜ້າໂຮງຮຽນການເມືອງ ແລະການປົກຄອງແຂວງຈຳປາສັກພ້ອມຄະນະ, ມີຄະນະຈັດຕັ້ງແຂວງ, ພະແນກການອ້ອມຂ້າງແຂວງ, ບັນດາຄູ, ອາຈານ ແລະນັກສຶກສາເຂົ້າຮ່ວມ.
ໃນພິທີ ທ່ານ ບົວທອງ ສຸວັນນະສານ ຫົວໜ້າໂຮງຮຽນການເມືອງ ແລະການປົກຄອງແຂວງຈຳປາສັກ ໄດ້ສະຫຼຸບຕີລາຄືນກ່ຽວກັບການຈັດການຮຽນ-ການສອນໃນໄລຍະ 1 ປີ ທີ່ຜ່ານມາເຊິ່ງໃນນັ້ນທ່ານໄດ້ຍົກໃຫ້ເຫັນເຖິງຄວາມເອົາໃຈໃສ່ໃນການຈັດຕັ້ງປະຕິບັັດໜ້າທີ່ວຽກງານວິຊາສະເພາະຂຶ້ນຫ້ອງສິດສອນຂອງບັນດາຄູ-ອາຈານໃນໄລຍະ 1 ປີ ທີ່ຜ່ານມາ ແລະການຕັ້ງໃຈສຶກສາຄົ້ນຄວ້າຮໍ່າຮຽນຂອງບັນດານັກຮຽນ ຈົນສາມາດຜ່ານການສອບເສັງຈົບຊັ້ນຕາມກໍານົດເວລາ. ພ້ອມນັ້ນ, ຍັງຍົກໃຫ້ເຫັນຈຸດດີ, ຈຸດອ່ອນ ແລະຂໍ້ຄົງຄ້າງທີ່ຈະຕ້ອງໄດ້ແກ້ໄຂໃນສົກປີຕໍ່ໜ້າ.
ໃນສົກ 2019-2020 ມີນັກສຶກສາລະບົບຊັ້ນກາງຮຸ່ນທີ X ທີ່ຮຽນຈົບທັງໝົດ 55 ທ່ານ, ຍິງ 12 ທ່ານ.ໃນນັ້ນ, ປ້ອງກັນບົດໄດ້ເກຼດ A ມີ 40 ທ່ານ, ຍິງ 7 ທ່ານ, ໄດ້ເກຼດ B+ ມີ 15 ທ່ານ, ຍິງ 5 ທ່ານ, ຈາກນັ້ນທ່ານຍັງໄດ້ຜ່ານທິດທາງແຜນການຮຽນ-ການສອນປີ 2021 ອີກດ້ວຍ.
ໃນພິທີສະຫຼຸບສົກຮຽນຂອງໂຮງຮຽນການເມືອງແລະການປົກຄອງຄັ້ງນີ້ຍັງໄດ້ມີພິທີມອບໃບປະກາດສະນິຍະບັດໃຫ້ແກ່ນັກສຶກສາລະບົບຊັ້ນກາງຮຸ້ນທີ X ຈຳນວນ 55 ທ່ານ, ຍິງ 12 ທ່ານໂດຍການໃຫ້ກຽດມອບຂອງທ່ານບົວລິນ ວົງພະຈັນ ຮອງເຈົ້າແຂວງໆຈຳປາສັກຢ່າງສົມກຽດ, ຈາກນີ້ຍັງໄດ້ມອບໃບຍ້ອງຍໍໃຫ້ຜູ້ທີ່ມີຜົນງານດີເດັ່ນໃນໄລຍະຜ່ານມາ, ມອບໃບຍ້ອງຍໍໃຫ້ນັກສຶກສາທີ່ມີຜົນງານ ແລະຮຽນດີ, ຮຽນເກັ່ງອີກຈຳນວນໜຶ່ງອີກດ້ວຍ.
ໂອກາດນີ້ທ່ານບົວລິນ ວົງພະຈັນ ຮອງເຈົ້າແຂວງໆ ຈຳປາສັກ ກໍ່ໄດ້ໂອ້ລົມຕໍ່ພິທີເຊິ່ງໃນນັ້ນທ່ານໄດ້ເໜັ້ນໃຫ້ນັກສຶກສາທີ່ຈົບໄປນັ້ນນຳເອົາບົດຮຽນ, ຄວາມຮູ້ໄປໝູນໃຊ້ເຂົ້າໃນໜ້າທີ່ວຽກງານທີ່ຕົນຮັບຜິດຊອບໃຫ້ມີປະສິດທິຜົນສູງກ່ວາເກົ່າ.
ຂ່າວ/ພາບ: ຂວັນຕາ ສີສົມໂຄດ+ອິນປັນ ຈູມມະລີ
ບັນນາທິການ: ຄອນສະຫວັນ ແສນຍານຸພາບ