ໃນວັນພະຫັດ ວັນທີ 23 ກໍລະກົດ 2020 ຢູ່ທີ່ສະຖາບັນການເມືອງ ແລະການປົກຄອງແຫ່ງຊາດ (ສມປຊ) ໄດ້ຈັດກອງປະຊຸມສຳມະນາວິທະຍາສາດ ເພື່ອກະກຽມຂ່ຳນັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ; ພິເສດໄປກວ່ານີ້ ປີນີ້ ກໍພໍດີກັບວັນເກີດ ຂອງ ວ.ອ. ເລນິນ ຄົບຮອບ 150 ປີ (ວັນທີ 22/4/1870-22/4/2020) ກອງປະຊຸມຄັ້ງນີ້້ແມ່ນພາຍໃຕ້ການເປັນປະທານ ຂອງທ່ານ ຮສ ສະໝຸດທອງ ສົມພານິດ ຮອງຫົວໜ້າສະຖາບັນການເມືອງ ແລະການປົກຄອງແຫ່ງຊາດ; ດ້ານຜູ້ເຂົ້າຮ່ວມກອງປະຊຸມປະກອບມີ: ຫົວໜ້າກົມ, ຮອງກົມ, ຫົວໜ້າຄະນະ, ຮອງຄະນະ ແລະບັນດາພະນັກງານຄູ-ອາຈານ ແລະນັກສຶກສາ ພາຍໃນ ສມປຊ ຈຳນວນ 614 ທ່ານເຂົ້າຮ່ວມຢ່າງພ້ອມພຽງ.
ກອງປະຊຸມສຳມະນາ ໄດ້ດຳເນີນໄປດ້ວຍເນື້ອໃນທີ່ມີຄວາມອຸດົມສົມບູນ ສ່ອງແສງໃຫ້ເຫັນວ່າ ທ່ານ ວ.ອ ເລນິນ ແມ່ນຜູ້ນຳທີ່ຍິ່ງໃຫຍ່, ເປັນອາຈານຜູ້ລ້ຳເລີດ, ຜູ້ໄຂສັງກາດໃໝ່ ຂອງຍຸກສະໄໝ ປັດຈຸບັນ, ທິດສະດີ ຂອງທ່ານ ຍັງເປັນທວນໄຟສະຫວ່າງສະໄຫວໃຫ້ແກ່ການປະຕິວັດສັງຄົມນິຍົມ ໃນທົ່ວໂລກ ເວົ້າລວມ, ການປະຕິວັດສັງຄົມນິຍົມຢູ່ ສປປ ລາວ ເວົ້າສະເພາະ. ແສງສະຫວ່າງໃນຍຸກສະໄໝຂອງລັດທິເລນິນໄດ້ຊ່ວຍເຍືອງທາງກ້າວຂຶ້ນຂອງມວນມະນຸດຢ່າງຈະແຈ້ງ ແລະນັບມື້ຍິ່ງຮຸ່ງ ເຮືອງຂຶ້ນ. ແສງສະຫວ່າງນີ້ ໄດ້ສອດສ່ອງມາຍັງຊົນຊັ້ນກຳມະກອນ, ປະຊາຊົນຜູ້ອອກແຮງງານ ແລະ ຊາວລາວພາຍຫຼັງຈາກການປະຕິວັດສັງຄົມນິຍົມເດືອນຕຸລາ ທີ່ຍິ່ງໃຫຍ່.
ບັນດານັກວິທະຍາສາດ ແລະແຂກເຂົ້າຮ່ວມກອງປະຊຸມໄດ້ສຸມຈິດສຸມໃຈຮັບຟັງ ແລະພ້ອມກັນປະກອບຄຳຄິດຄຳເຫັນ, ສົນທະນາແລກປ່ຽນບົດຮຽນ ເຕັມໄປດ້ວຍບັນຍາກາດທີ່ຟົດຟື້ນ ແລະມີຄວາມໝາຍເລິກເຊິ່ງ. ເນື້ອໃນບົດປະກອບຄຳເຫັນຂອງນັກວິທະຍາສາດ ແລະແຂກເຂົ້າຮ່ວມກອງປະຊຸມ ໄດ້ສຸມໃສ່ບັນດາເນື້ອໃນສຳຄັນຄື:
ບັນດານັກວິທະຍາສາດ ໄດ້ພ້ອມກັນຄົ້ນຄວ້າທິດສະດີ ສ້າງຄວາມກະຈ່າງແຈ້ງ ກ່ຽວກັບນິພົນ ຂອງເລນິນ, ໂດຍມີພື້ນຖານບ່ອນອີງທາງດ້ານວິທະຍາສາດທີ່ໜາແໜ້ນ, ໄດ້ມີການຊີ້ແຈງບັນດາເນື້ອໃນ ຂອງນິພົນ ເລນິນ, ຢ່າງຮັດກຸມ, ຮັບປະກັນລັກສະນະວິທະຍາສາດ, ລັກສະນະປະດິດສ້າງ ແລະລັກສະນະຍຸກສະ ໄໝ. ພ້ອມດຽວກັນນີ້, ຍັງໄດ້ນຳສະເໜີບັນດາແນວຄວາມຄິດທີ່ດີ, ທັດສະນະທີ່ມີປະໂຫຍດ ເຊິ່ງຈະກາຍເປັນຊ່ອງທາງໃນການປັບປຸງ ໃຫ້ເຂັ້ມແຂງ, ໜັກແໜ້ນ ແລະມີແບບແຜນທີ່ທັນສະໄໝ.
– ໃນການຄົ້ນຄວ້ານິພົນເລນິນທັງ 8 ຫົວຂໍ້ ສາມາດຢັ້ງຢືນໄດ້ວ່າ ບັນດານັກວິທະຍາສາ ລ້ວນແຕ່ສາມາດນຳສະເໜີໃຫ້ເຫັນແຈ້ງ ເຖິງສະພາບແວດລ້ອມໃນການກຳເນີດນິພົນ ໂດຍເນັ້ນໃຫ້ເຫັນເຖິງເງື່ອນໄຂພາວະວິໄສ ແລະອັດຕະວິໄສ ທີ່ແທດຕົວຈິງ, ຮູບການຄົ້ນຄວ້າ, ວິທິວິທະຍາໃນການຄົ້ນຄວ້າເຫັນວ່າມີຄວາມສອດຄ່ອງ;
– ນັກວິທະຍາສາດ ໄດ້ນຳສະເໜີຂ້ອນຂ້າງຈະແຈ້ງ ຕໍ່ກັບໂຄງປະກອບດ້ານເນື້ອໃນຂອງນິພົນ ກ່ຽວກັບລັດ ແລະການປະຕິວັດ; ໜ້າທີ່ສະເພາະໜ້າ ຂອງອຳນາດການປົກຄອງໂຊວຽດ; ນິພົນກ້າວໄປໜ້າໜຶ່ງກ້າວ ຖອຍຫຼັງສອງກ້າວ; ສອງຍຸດໂທບາຍຂອງພັກສັງຄົມປະຊາທິປະໄຕ; ສາມແຫຼ່ງກຳເນີດ ແລະສ່ວນປະ ກອບຂອງລັດທິມາກ; ເສດຖະກິດ ແລະການເມືອງໃນຍຸກສະໄໝຜະເດັດການກຳມາຊີບ; ນິພົນເຮັດຫຍັງ ແລະເຮັດໜ້ອຍແຕ່ດີ. ບັນດາເນື້ອໃນນິພົນທັງໝົດ ທີ່ກ່າວມານັ້ນ ສາມາດຮັບປະກັນໄດ້ຄວາມຄົບຖ້ວນໃນລະດັບທີ່ແນ່ນອນ.
– ນັກວິທະຍາສາດ ໄດ້ພ້ອມກັນຖອດໄດ້ຄຸນຄ່າທີ່ຍືນຍົງ ເພື່ອຜັນຂະຫຍາຍເຂົ້າສູ່ຊີວິດຕົວຈິງ. ໃນນີ້ລວມມີຄຸນຄ່າປະຫວັດສາດ, ຄຸນຄ່າຂອງຍຸກສະໄໝ, ຄຸນຄ່າທີ່ຍືນຍົງ ໃນພາລະກິດການຈັດຕັ້ງປະບັດພາລະກຳປະຫວັດສາດຂອງຊົນຊັ້ນກຳມະກອນ ແລະຊາວຜູ້ອອກແຮງງານ ໃນການສ້າງສັງຄົມໃໝ່, ສັງຄົມນິຍົມ ຢູ່ປະເທດເຮົາ. ອັນນີ້ຢັ້ງຢືນໃຫ້ເຫັນເຖິງຄວາມຮັບຜິດຊອບ ທັງດ້ານສະຕິປັນຍາ, ກຳລັງວັງຊາໃນການຄົ້ນຄວ້າຢ່າງມີຜົນສຳເລັດ.
– ພົ້ນເດັ່ນບັນດານັກວິທະຍາສາດ ແລະແຂກເຂົ້າຮ່ວມກອງປະຊຸມໄດ້ພ້ອມກັນປະກອບຄຳເຫັນ ແລະຢືນຢັນເຖິງຄຸ່ນຄ່າທີ່ເຂັ້ມແຂງຂອງລັດທິເລນິນ ແລະ ມີຄວາມເຊື່ອໝັ້ນຕໍ່ອະນາຄົດອັນຮຸ່ງເຮືອງ ພາຍໃຕ້ແສງສະຫວ່າງ ຂອງລັດທິເລນິນ; ພ້ອມທັງເຊື່ອໝັ້ນຢ່າງສະເໝີຕົ້ນສະເໝີປາຍວ່າ ລັດທິເລນິນ ບໍ່ແມ່ນຄຳພີ ເຊິ່ງລັດທິເລນິນ ແມ່ນວິທະຍາສາດ.
ຜ່ານກອງປະຊຸມສຳມະນາໃນຄັ້ງນີ້ເຮັດໃຫ້ບັນດານັກວິທະຍາສາດ, ບັນດາພະນັກງານຄູອາຈານ ພາຍໃນສະຖາບັນການເມືອງ ແລະການປົກຄອງແຫ່ງຊາດ ນຳເອົາໝາກຜົນ ຂອງການຄົ້ນຄວ້ານີ້ ໄປເຜີຍແຜ່ໃຫ້ກວ້າງຂວາງ ແລະນຳໄປໝູນໃຊ້ ຢ່າງປະດິດສ້າງ. ສາມາດສັງລວມໃຫ້ໄດ້ສະພາບແວດລ້ອມໃນການກຳ ເນີດ ຂອງແຕ່ລະນິພົນ ເພື່ອກຳໃຫ້ໄດ້ວ່າເລນິນຂຽນຂຶ້ນໃນເງື່ອນໄຂສະພາບແວດລ້ອມຄືແນວໃດ, ມີຫຍັງສົ່ງຜົນກະທົບໃສ່ເຊິ່ງຮຽກຮ້ອງ ໃຫ້ເລນິນຕ້ອງຂຽນນິພົນດັ່ງກ່າວຂຶ້ນມາ. ສະພາບແວດລ້ອມດ້ານພາວະວິໄສມີຫຍັງ, ສະພາບແວດລ້ອມອັດຕະວິໄສເປັນຄືແນວໃດ, ສະພາບແວດລ້ອມທາງດ້ານທິດສະດີ, ການຂະຫຍາຍຕົວວິທະຍາສາດສັງຄົມເປັນຄືແນວໃດ ທັງໝົດນັ້ນຈະບົ່ງບອກ ໄດ້ເຖິງເນື້ອໃນແຫ່ງການກຳເນີດ ຂອງບັນ ດານິພົນເລນິນ, ສາມາດຖອດໃຫ້ໄດ້ຄຸນຄ່າ, ມໍລະດົກຍືນຍົງ ທີ່ເລນິນປະໄວ້ໃຫ້ຊົນຊັ້ນກຳມະກອນ ແລະຊາວຜູ້ອອກແຮງງານ, ບົດຮຽນອັນເລີດລ້ຳອັນໃດ ທີ່ຄວນຕ້ອງໄດ້ສືບຕໍ່ນຳໄປເຊື່ອມຊຶມ, ເຜີຍແຜ່, ສ້າງຄວາມຮັບຮູ້ເຂົ້າໃຈ, ຜັນຂະຫຍາຍຄຸນຄ່າອຳມະຕະ ຂອງນິພົນ ເຂົ້າໃນການພຶດຕິກຳຢູ່ປະເທດເຮົາ ໃຫ້ສອດຄ່ອງກັບຈຸດພິເສດ, ສະພາບແວດລ້ອມ ແລະເອກະລັກ ຂອງລະບອບປະຊາທິປະໄຕກ້າວຂຶ້ນສັງຄົມນິຍົມ. ແນໃສ່ສ້າງລັດໃຫ້ກາຍເປັນລັດ ຂອງປະຊາຊົນ, ໂດຍປະຊາຊົນ ແລະເພື່ອຜົນປະໂຫຍດຂອງປະຊາຊົນຢ່າງແທ້ຈິງຕາມຄວາມມຸ່ງຫັວງຂອງນັກມາກຊິດ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ຄອນສະຫວັນ ແສນຍານຸພາບ