ຕອນເຊົ້າຂອງວັນທີ່ 10 ເມສາ 2024 ຢູ່ ໂຮງຮຽນການເມືອງ-ການປົກຄອງ ແຂວງໄຊຍະບູລີ ໄດ້ເປີດກອງປະຊຸມສະພາຄູຂຶ້້ນ ໂດຍເປັນປະທານຂອງ ທ່ານ ປອ ສີສອນພັນ ບຸນສີ ກໍາມະການພັກແຂວງ, ຫົວໜ້າໂຮງຮຽນການເມືອງ ແລະ ການປົກຄອງແຂວງ. ມີຄູ-ອາຈານທີ່ຖືກເຊີນຈາກພະແນກການຂອງແຂວງ ແລະພະນັກງານ, ຄູ-ອາຈານ ຢູ່ພາຍໃນໂຮງຮຽນເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ ແມ່ນເພື່ອຄົ້ນຄວ້າປະກອບຄຳເຫັນໃສ່ຮ່າງເນື້ອໃນບົດວິທະຍາສາດລະດັບພາກ (6 ແຂວງພາກເໜືອ) ທີ່ໄດ້ມອບໝາຍໃຫ້ແຕ່ລະໂຮງຮຽນການເມືອງ ແລະ ການປົກຄອງແຂວງພາກເໜືອຄົ້ນຄວ້າ.
ທ່ານ ບຸນຍອງ ອາລີລັກ ໄດ້ຜ່ານເນື້ອໃນບົດວິທະຍາສາດລະດັບພາກ ທີ່ໂຮງຮຽນການເມືອງ ແລະ ການປົກຄອງແຂວງໄຊຍະບູລີ ຮັບຜິດຊອບຄົ້ນຄວ້າ ຈໍານວນ 2 ຫົວຂໍ້ຄື:
– ຍົກສູງຄຸນທາດການເມືອງ, ຄຸນສົມບັດສີນທຳປະຕິວັດໃຫ້ພະນັກງານສະມະຊິກພັກຢູ່ແຂວງໄຊຍະບູລີ.
– ຍົກລະດັບຄວາມຮູ້ດ້ານທິດສະດີການເມືອງໃຫ້ພະນັກງານນຳພາ ຄຸ້ມຄອງ ຢູ່ ແຂວງໄຊຍະບູລີ.
ທ່ານ ອຸທິດ ເກດດົມລີ ຜ່ານລະບຽບຄຸ້ມຄອງນັກສຶກສາ, ລະບຽບວ່າດ້ວຍການສອບເສັງ ແລະລະບຽບວ່າດ້ວຍຄູຂອງໂຮງຮຽນການເມືອງ ແລະ ການປົກຄອງ. ຫຼັງຈາກນັ້ນ, ບັນດານັກວິທະຍາສາດ ແລະຜູ້ເຂົ້າຮ່ວມປະຊຸມໄດ້ປະກອບຄໍາຄິດເຫັນໃສ່ບັນດາບົດວິທະຍາສາດທີ່ໄດ້ນໍາສະເໜີແລ້ວນັ້ນ ເພື່ອໃຫ້ປັບປຸງໃນຈຸດທີ່ເຫັນວ່າຍັງບໍ່ທັນຈະແຈ້ງ ແລະຄົບຖ້ວນ.
ໃນຕອນທ້າຍຂອງກອງປະຊຸມ ແລະທ່ານປະທານໄດ້ມີຄຳເຫັນຊີ້ນຳໃຫ້ບັນດາຜູ້ທີ່ໄດ້ຮັບການມອບໝາຍໃນການຂຽນບົດວິທະຍາສາດໃຫ້ເອົາໃຈໃສ່ໃນການຄົ້ນຄວ້າໃຫ້ເລິກເຊິ່ງ ເຮັດໃຫ້ບົດວິທະຍາສາດມີລັກສະນະສ່ອງແສງຕົວຈິງ ແລະໃຫ້ສໍາເລັດຕາມວັນເວລາທີ່ໄດ້ກຳນົດໄວ້.
ຂ່າວ/ພາບ: ວັດທະນາ ພັນລັກ
ບັນນາທິການ: ປທ ບຸນປັນ ສຸມຸນທອງ