ໃນຕອນເຊົ້າຂອງວັນທີ 27 ມີນາ 2024 ຢູ່ທີ ໂຮງຮຽນການເມືອງ ແລະການປົກຄອງແຂວງໄຊຍະບູລີ ໄດ້ມີພິທີເປີດຮຽນທິດສະດີການເມືອງລະບົບຂັ້ນຕົ້ນ ແລະຂັ້ນກາງຮຸ່ນທີ II ຂຶ້ນ, ພາຍໃຕ້ການເປັນປະທານຂອງ ທ່ານ ອາເມຊົງ ເຍຽເລັ່ງ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ, ທ່ານ ປທ ນາງ ຄຳຫຼ້າ ແກ້ວອຸ່ນຄຳ, ຄະນະພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີແຂກການນຳຂອງແຂວງທີຖືກເຊີນພ້ອມດ້ວຍພະນັກງານລັດຖະກອນຄູ-ອາຈານ ແລະນັກສຶກສາ ເຂົ້າຮ່ວມຢ່າງພ້ອມພຽງ.
ໃນສົກຮຽນ ປີ 2024 ນີ້, ມີນັກສຶກສາຂັ້ນຕົ້ນ ຮຸ່ນທີ II 50 ສະຫາຍ, ຍິງ 14 ສະຫາຍ; ຂັ້ນກາງຮຸ່ນທີ II ມີນັກສຶກສາ 50 ສະຫາຍ, ຍິງ 4 ສະຫາຍ ເຊິ່ງມາຈາກ 11 ເມືອງພາຍໃນແຂວງ.
ຊຸດຮຽນທິດສະດີການເມືອງຂັ້ນຕົ້ນຮຸ່ນທີ I ແມ່ນໃຊ້ເວລາຮຽນ 3 ເດືອນເຊິ່ງປະກອບມີວິຊາຮຽນ 10 ວິຊາ ເຊິ່ງຈະໄດ້ແບ່ງອອກເປັນກຸ່ມວິຊາຄື: ກຸ່ມວິຊາປັດຊະຍາມາກ-ເລນິນ; ກຸ່ມວິຊາເສດຖະສາດການເມືອງມາກ-ເລນິນ; ກຸ່ມວິຊາລັດທິສັງຄົມນິຍົມວິທະຍາ; ການເມືອງວິທະຍາ, ສັງຄົມສາດ; ແນວຄິດໄກສອນ ພົມວິຫານ; ກຸ່ມວິຊາພື້ນຖານການຄຸ້ມຄອງບໍລິຫານລັດ; ທິດສະດີລັດແລະກົດໝາຍເຕັກນິກບໍລິຫານ, ກຸ່ມວິຊາປະຫວັດສາດພັກ ແລະກໍ່ສ້າງພັກ.
ຊຸດຮຽນທິດສະດີການເມືອງຂັ້ນກາງຮຸ່ນທີ II ແມ່ນຈະໃຊ້ເວລາຮຽນ 6 ເດືອນ. ຈະປະກອບມີວິຊາຮຽນ 14 ວິຊາ ແລະຈະໄດ້ແບ່ງອອກເປັນກຸ່ມວິຊາຄື: ກຸ່ມວິຊາປັດຊະຍາມາກ-ເລນິນ ແລະວັດທະນະທຳ, ກຸ່ມວິຊາເສດຖະສາດການເມືອງມາກ-ເລນິນ, ກຸ່ມວິຊາລັດທິສັງຄົມນິຍົມວິທະຍາສາດ, ພົວພັນສາກັນ, ສັງຄົມສາດ, ປ້ອງກັນຊາດປ້ອງກັນຄວາມສະຫງົບ, ແນວຄິດໄກສອນ ພົມວິຫານ, ກຸ່ມທິດສະດີລັດ ແລະກົດໝາຍ, ເຕັກນີກບໍລິຫານ, ກຸ່ມວິຊາປະຫວັດສາດພັກ ແລະກໍ່ສ້າງພັກ.
ຂ່າວ/ພາບ: ວັດທະນາ ພັນລັກ
ບັນນາທິການ: ປທ ບຸນປັນ ສຸມຸນທອງ