ໃນວັນທີ 09 ກໍລະກົດ 2020, ທີ່ ສະຖາບັນການເມືອງ ແລະການປົກຄອງແຫ່ງຊາດ, ທ່ານ ຮສ ພູວົງ ອຸ່ນຄໍາແສນ ຮັກສາການຫົວໜ້າສະຖາບັນການເມືອງ ແລະການປົກຄອງແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ປອ ປີເຕີ ເຮມອນ (Peter M. Haymond), ເອກອັກຄະລັດຖະທູດ ແຫ່ງ ສະຫະລັດ ອາເມຣິກາ ຄົນໃໝ່ ປະຈຳ ສປປ ລາວ.
ໃນໂອກາດພົບປະຄັ້ງນີ້ ທ່ານ ຮສ ພູວົງ ອຸ່ນຄຳແສນ ກໍໄດ້ສະແດງຄວາມຍິນດີຕ້ອນຮັບ ແລະຊົມເຊີຍຕໍ່ ທ່ານ ປອ ປີເຕີ ເຮມອນ ທີ່ໄດ້ຖືກແຕ່ງຕັ້ງເປັນເອກອັກຄະລັດຖະທູດປະຈໍາ ສປປ ລາວ ຄັ້ງນີ້, ຊຶ່ງເປັນນິມິດໝາຍອັນດີ ເປັນການປະກອບສ່ວນເສີມສ້າງສາຍພົວພັນຮ່ວມມື ແລະ ຊ່ວຍເຫຼືອຊຶ່ງກັນແລະກັນ ລະຫວ່າງ ລາວ-ສະຫະລັດອາເມຣິກາ ທີ່ມີມາແລ້ວນັ້ນໃຫ້ນັບມື້ມີບາດກ້າວດີຂຶ້ນເລື້ອຍໆ. ໂດຍສະເພາະແມ່ນການແລກປ່ຽນຢ້ຽມຢາມຂອງຄະນະວິຊາການດ້ານການເມືອງ ແລະການປົກຄອງໃນໄລຍະທີ່ຜ່ານມາ. ພ້ອມນີ້, ທ່ານ ຮສ ພູວົງ ອຸ່ນຄຳແສນ ກໍໄດ້ແຈ້ງເຖິງຄວາມເປັນມາຂອງ ສມປຊ ຕະຫຼອດໄລຍະ ທີ່ມີການເຕີບໃຫຍ່ຂະຫາຍາຍຕົວ, ທີ່ຕັ້ງ, ພາລະບົດບາດ ໃນການກໍ່ສ້າງພະນັກງານສະມາຊິກພັກ ຊີ້ນຳ-ນຳພາ ໃຫ້ ທ່ານ ປອ ປີເຕີ ເຮມອນ ໄດ້ຮັບຊາບ ແລະອວຍພອນໃຫ້ທ່ານ ເອກອັກຄະລັດຖະທູດ ຈົ່ງປະສົບຜົນສໍາເລັດໃນພາລະກິດປະຕິບັດໜ້າທີ່ ໃນ ສປປ ລາວ ໃນຄັ້ງນີ້ດ້ວຍ.
ທ່ານ ປອ ປີເຕີ ເຮມອນ ກໍໄດ້ສະແດງຄວາມຂອບໃຈ ທີ່ທາງຄະນະນໍາ ສມປຊ ໄດ້ໃຫ້ການຕ້ອນຮັບຢ່າງອົບອຸ່ນ, ໂດຍຮູ້ສຶກເປັນກຽດທີ່ໄດ້ເຂົ້າມາພົບປະຢ້ຽມຢາມ ສມປຊ ພ້ອມທັງຢືນຢັນວ່າ ຈະຕັ້ງໜ້າປະກອບສ່ວນເຮັດໃຫ້ສາຍພົວພັນທັງສອງປະເທດພວກເຮົາ ນັບມື້ນັບແໜ້ນແຟ້ນຍິ່ງຂຶ້ນ. ພາຍຫຼັງພົບປະກັບຄະນະນໍາແລ້ວ ທ່ານເອກອັກຄະລັດຖະທູດຍັງໄດ້ເຂົ້າຢ້ຽມຊົມຫໍສະໝຸດ ສມປຊ ອີກດ້ວຍ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ຄອນສະຫວັນ ແສນຍານຸພາບ
