ໃນວັນທີ 17-18 ກໍລະກົດ 2023 ທີ່ຜ່ານມາ, ນັກຄົ້ນຄວ້າປະລິນຍາໂທ ຮຸ່ນທີ XVIII ສາຂາ ການປົກຄອງ ຂອງສະຖາບັນການເມືອງ ແລະ ການປົກຄອງແຫ່ງຊາດ ຈໍານວນ 25 ທ່ານ, ຍິງ 7 ທ່ານ ໄດ້ໄປທັດສະນະສຶກສາຢູ່ຫໍສະພາແຫ່ງຊາດ ນໍາພາໂດຍ: ອາຈານ ປທ. ສັນຍາລັກ ແກ້ວຄໍາຮຸ່ງ ຜູ້ຊ່ວຍຄູປະຈໍາຫ້ອງ.
ທ່ານ ທອງແກ້ວ ສິດທິພົງ ຫົວໜ້າຫ້ອງຮຽນ ສາຂາການປົກຄອງ ໄດ້ໃຫ້ຮູ້ວ່າ: ການໄປທັດສະນະສຶກສາຢູ່ຫໍສະພາແຫ່ງຊາດ ແມ່ນປະຕິບັດຕາມແຜນການຮຽນ-ການສອນ ຂອງສະຖາບັນການເມືອງ ແລະ ການປົກຄອງແຫ່ງຊາດ ກໍຄືຄະນະບໍລິຫານສາດວາງອອກ, ຫຼັງຈາກທີ່ນັກຄົ້ນຄວ້າໄດ້ຮຽນຮູ້ດ້ານທິດສະດີຈະຕ້ອງໄດ້ລົງທັດສະນະສຶກສາໃນພາກຕົວຈິງນໍາອີກ.
ການເຄື່ອນໄຫວໄປທັດສະນະສຶກສາ ຢູ່ຫໍສະພາແຫ່ງຊາດ ນັກຄົ້ນຄວ້າໄດ້ເຂົ້າຮ່ວມຮັບຟັງການດໍາເນີນກອງປະຊຸມສະໄໝສາມັນ ເທື່ອທີ 5ຂອງສະພາແຫ່ງຊາດ ຊຸດທີ IX ໃນວາລະພິຈາລະນາຮັບຮອງເອົາກົດໝາຍ ຈໍານວນ 10 ສະບັບ, ໃນນີ້ ກົດໝາຍສ້າງໃໝ່ 4 ສະບັບ ແລະກົດໝາຍປັບປຸງ 6 ສະບັບ. ພ້ອມກັນນັ້ນ, ກໍ່ຍັງໄດ້ຢ້ຽມຊົມຫໍປະຊຸມສະພາ, ຫໍວາງສະແດງມູນເຊື້ອ, ຫໍສະໝຸດຂອງສະພາແຫ່ງຊາດ ເພື່ອສຶກສາຮຽນຮູ້ປະຫວັດສາດການກຳເນີດ, ການເຕີບໃຫຍ່ຂະຫຍາຍຕົວ ແລະຜົນງານການເຄື່ອນໄຫວຂອງສະພາແຫ່ງຊາດ ໃນແຕ່ລະໄລຍະ ທີ່ຍາດມາໄດ້ໃນການປະຕິບັດພາລະບົດບາດ ສະພາແຫ່ງຊາດ ແມ່ນອົງການຕົວແທນແຫ່ງສິດ ແລະຜົນປະໂຫຍດຂອງປະຊາຊົນບັນດາເຜົ່າ.
ໃນໂອກາດດັ່ງກ່າວ, ທ່ານ ໝໍສະຫວັດ ເພັດມະນີ ນັກຄົ້ນຄວ້າປະລິນຍາໂທ ຮຸ່ນທີ XVIII ສາຂາການປົກຄອງ ກໍ່ໄດ້ສະແດງຄວາມຮູ້ສຶກຂອງຕົນເອງວ່າ: ຂ້າພະເຈົ້າມີຄວາມຮູ້ສຶກສາພູມໃຈຫຼາຍ ທີ່ໄດ້ມາທັດສະນະສຶກສາ ແລະ ໄດ້ເຂົ້າຮ່ວມຮັບຊົມ, ຮັບຟັງການດໍາເນີນກອງປະຊຸມສະພາແຫ່ງຊາດ ທີ່ມີຄວາມໝາຍ, ຄວາມສໍາຄັນໂດຍສະເພາະແມ່ນການພິຈາລະນາ ຮັບຮອງເອົາກົດໝາຍ ເຊິ່ງໄດ້ສະແດງເຖິງຄວາມເປັນຫ່ວງເປັນໃຍຂອງພັກ-ລັດ ກໍຄືສະພາແຫ່ງຊາດ ຕໍ່ປະຊາຊົນລາວບັນດາເຜົ່າ ໃນການນໍາເອົາໝົດໝາຍໄປຈັດຕັ້ງປະຕິບັດຢ່າງເຂັ້ມງວດ ຮັບປະກັນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແນໃສ່ປົກປັກຮັກສາ ແລະພັດທະນາປະເທດຊາດ ໃຫ້ກ້າວຂຶ້ນສູ່ຈຸດໝາຍສັງຄົມນິຍົມ.
ການໄປທັດສະນະສຶກສາຢູ່ຫໍສະພາແຫ່ງຊາດ ຂອງນັກຄົ້ນຄວ້າປະລິນຍາໂທ ຮຸ່ນທີ XVIII ສາຂາການປົກຄອງ ໃນຄັ້ງນີ້ ໄດ້ສ້າງຄວາມຮັບຮູ້, ເຂົ້າໃຈຢ່າງເລິກເຊິ່ງຕື່ມກ່ຽວກັບການປະຕິບັດພາລະບົດບາດ, ສິດ ແລະໜ້າທີ່ຂອງສະພາແຫ່ງຊາດ, ກົງຈັກການຈັດຕັ້ງຂອງສະພາແຫ່ງຊາດ, ຂັ້ນຕອນການຮັບຮອງເອົາກົດໝາຍ, ການຕົກລົງບັນຫາສໍາຄັນຂອງປະເທດຊາດ ແລະການຕິດຕາມກວດກາ, ຂັ້ນຕອນການລາຍງານ, ການຊີ້ແຈງ ແລະການຕອບຄໍາຊັກຖາມຂອງອົງການບໍລິຫານ ແລະອົງການຕຸລາການ, ການເຈາະຈີ້ມຂອງສະມາຊິກສະພາແຫ່ງຊາດ, ການຕົກລົງ, ການຮັບຮອງເອົາບັນດາເນື້ອໃນຂອງກອງປະຊຸມດ້ວຍການລົງຄະແນນສຽງ ທີ່ມີຄວາມເປັນເອກະພາບສູງ.
ຂ່າວ: ສອນໄພ ບົວຄໍາໄຊ
ຮູບພາບ: ໄກດາວັນ ແກ້ວອຸໄທ
ບັນນາທິການ: ປທ ບຸນປັນ ສຸມຸນທອງ