ໃນຕອນບ່າຍ ຂອງວັນທີ 26 ມີຖຸນາ 2023 ທີ່ຫ້ອງປະຊຸມຂອງເມືອງສິງແຂວງຫຼວງນໍ້າທາ ໄດ້ຈັດພິທີປິດການເຝິກອົບຮົມທິດສະດີການເມືອງ-ການປົກຄອງລະບົບ 10 ວັນຊຸດທີ IV ໃຫ້ເລຂາພັກບ້ານ, ນາຍບ້ານ, ການເຝິກອົບຮົມໃນຄັ້ງນີ້ມີນັກເຝິອົບຮົມ ຈໍານວນທັງໝົດ 30 ທ່ານ, ຍິງ 02 ທ່ານ; ມາຈາກ 23 ບ້ານ, ເທດສະບານເມືອງສິງແຂວງຫຼວງນໍ້າທາ ການເຝິກອົບຮົມແມ່ນ ເພື່ອເປັນການຈັດຕັ້ງປະຕິບັດຕາມເນື້ອໃນ ຂອງກອງປະຊຸມໃຫຍ່ຂອງພັກໃນແຕ່ລະໄລຍະໃຫ້ປະກົດຜົນເປັນຈິງເທື່ອລະກ້າວ. ໃຫ້ກຽດເປັນປະທານໂດຍ: ທ່ານ ປອ ຄຳພັນ ເຈຍອາ ເລຂາໜ່ວຍພັກ, ຫົວໜ້າໂຮງຮຽນການເມືອງ ແລະ ການປົກຄອງແຂວງຫຼວງນໍ້າທາ. ໃຫ້ກຽດເຂົ້າຮ່ວມມີ: ທ່ານ ໜານມອນ ແກ້ວສິງໄຊ ຮອງເລຂາພັກເມືອງຮອງເຈົ້າເມືອງ ຜູ້ຊີ້ນໍາວຽກງານແນວຄິດ ແລະວຽກພັກ-ພະນັກງານເມືອງສິງ ແຂວງຫຼວງນໍ້າທາ; ພ້ອມດ້ວຍບັນດາທ່ານທີ່ເປັນຄະນະຮັບຜິດຊອບການເຝິກອົບຮົມ, ມີຕົວແທນຈາກ ຫ້ອງວ່າການເມືອງ, ໂຄສະນາອົບຮົມເມືອງ, ຄະນະຈັດຕັ້ງເມືອງ, ອົງການຈັດຕັ້ງມະຫາຊົນ ແລະມາຈາກ ປກສ-ປກຊ ອ້ອມຂ້າງພາຍໃນເມືອງ, ຕະຫຼອດຮອດພະນັກງານ, ຄູ-ອາຈານ ແລະນັກເຝິກອົບຮົມເຂົ້າຮ່ວມຢ່າງພ້ອມພຽງ.
ຫຼັງຈາກນັ້ນ, ທ່ານ ປອ ບຸນຕຽງ ບຸນຫຼ້າແຝງ ຫົວໜ້າຂະແໜງວິຊາການ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດການຮຽນ-ການສອນ. ໂຮງຮຽນການເມືອງ ແລະ ການປົກຄອງ ແຂວງຫຼວງນໍ້າທາໄດ້ເລີ່ມຈັດຕັ້ງປະຕິບັດໂຄງການຫຼັກສູດການຮຽນ-ການສອນໃຫ້ນັກເຝິກອົບຮົມທິດສະດີການເມືອງ-ການປົກຄອງ ໂຄງການຫຼັກສູດ 10 ວັນຊຸດທີ IV ຢູ່ເມືອງສິງເລີ່ມແຕ່ວັນທີ 20-26ມີຖຸນາ 2023; ສ່ວນເນື້ອໃນບົດຮຽນລວມມີ 03 ພາກວິຊາຮຽນມີ 19 ບົດ, ມີ 75ຊົ່ວໂມງເທົ່າກັບ 4,68 ໜ່ວຍກິດ ພວກເຮົາໄດ້ຈັດຕັ້ງປະຕິບັດຕົວຈິງມີດັ່ງນີ້: ວິຊາຮຽນທັງໝົດ ມີ 3 ພາກຄື: ພາກທີ 1: ທິດທາງລວມ ມີຈຳນວນທັງໝົດ 4 ບົດ ເທົ່າກັບ18 ຊົ່ວໂມງ; ພາກທີ 2: ວຽກງານພັກ ມີຈຳນວນທັງໝົດ 7 ບົດ ເທົ່າກັບ 25 ຊົ່ວໂມງ; ພາກທີ 3: ວຽກງານບໍລິຫານ ແລະການປົກຄອງ ມີຈຳນວນທັງໝົດ 8 ບົດ ເທົ່າກັບ 32 ຊົ່ວໂມງ; ລວມທັງໝົດໃນການຮຽນມີ 19 ບົດເທົ່າກັບ 75 ຊົ່ວໂມງ.
– ໃນນີ້, ໂຮງຮຽນການເມືອງ ແລະ ການປົກຄອງແຂວງ ໄດ້ນຳໃຊ້ຄູ-ອາຈານພາຍໃນຂຶ້ນຫ້ອງສິດສອນ100%.
– ຄູ-ອາຈານແຕ່ລະສະຫາຍກໍມີຄວາມພະຍາຍາມຄົ້ນຄວ້າ, ແຕ່ງບົດສອນ, ຂຶ້ນຫ້ອງສິດສອນ, ອະທິບາຍດ້ານທິດສະດີ ແລະສົມທຽບພຶດຕິກຳເຮັດໃຫ້ນັກເຝິກອົບຮົມໃຫ້ມີຄວາມເຂົ້າໃຈກະຈ່າງແຈ້ງ.
– ບັນດານັກເຝິກອົບຮົມກໍ່ໄດ້ມີຄວາມພະຍາຍາມຕັ້ງໃຈຂຶ້ນຫ້ອງ, ຄົ້ນຄ້ວາຮ່ຳຮຽນ, ປະຕິບັດກົດລະບຽບຂອງການຮຽນ ແລະໄດ້ປະກອບຄຳຄິດຄຳເຫັນແລກປ່ຽນສົນທະນາບົດຮຽນນໍາກັນຢ່າງມີບັນຍາກາດຟົດຟື້ນພໍສົມຄວນ.
– ຈາກການຄົ້ນຄ້ວາຮ່ຳຮຽນດັ່ງກ່າວ, ພວກເຮົາກໍໄດ້ຈັດຕັ້ງການປະເມີນຄວາມຮັບຮູ້ ຂອງນັກເຝິກອົບຮົມເພື່ອປະເມີນຜົນການຮຽນ-ການສອນ ແລະເປັນການວັດແທກຄວາມຮັບຮູ້ຂອງນັກເຝິກອົບຮົມ ຊຶ່ງສະແດງອອກດັ່ງນີ້: ດີເລີດກວມ ເອົາ 85,25%, ດີຫຼາຍ 14,75% ລື່ນຄາດໝາຍ ຂອງແຜນການທີ່ວາງໄວ້ 5,25%.
ໃນຕອນທ້າຍ; ທ່ານ ໜານມອນ ແກ້ວສິງໄຊ ຮອງເລຂາພັກເມືອງ, ຮອງເຈົ້າເມືອງ ຜູ້ຊີ້ນໍາວຽກງານແນວຄິດ ແລະ ວຽກພັກ-ພະນັກງານ ເມືອງສິງ ແຂວງຫຼວງນໍ້າທາ; ໄດ້ໃຫ້ກຽດໂອ້ລົມຕໍ່ພິທີປິດຊຸດຮຽນ ຊຶ່ງທ່ານໄດ້ຮຽກຮ້ອງໃຫ້ນັກເຝິກອົບຮົມຈົ່ງພ້ອມກັນສູ້ຊົນໃຫ້ສຳເລັດຕາມລະດັບຄາດໝາຍທີ່ທາງໂຮງຮຽນໄດ້ວາງໄວ້. ການຄົ້ນຄວ້າຮ່ຳຮຽນທິດສະດີການເມືອງ-ການປົກຄອງໃນຄັ້ງບັນດານັກເຝິກອົບຮົມຕ້ອງຖືເປັນສຳຄັນ ແລະໝູນໃສ່ເຂົ້າໃນການນໍາພາ-ຊີ້ນໍາວຽກງານຕົວຈິງໃຫ້ແກ່ສະມາຊິກພາຍໃນບ້ານຂອງຕົນຢ່າງມີປະສິດທິຜົນດີຂຶ້ນກວ່າເກົ່າ.
ຂ່າວ/ປທ ນ. ມະນີລາ ແກ້ວລະກໍາ
ບັນນາທິການ: ທ່ານ ປທ ບຸນປັນ ສຸມຸນທອງ