ຊຸດຮຽນລະບົບຂັ້ນຕົ້ນຮຸ່ນທີ I ໄດ້ຮັບການອະນຸມັດເປີດຈາກສະຖາບັນການເມືອງ ແລະ ການປົກຄອງແຫ່ງຊາດ ແລະໄດ້ຈັດພິທີເປີດການຮຽນ-ການສອນຂຶ້ນຢ່າງເປັນທາງການ ໃນວັນທີ 6 ກຸມພາ 2023 ຊຶ່ງໄດ້ຜ່ານການຈັດຕັ້ງປະຕິບັດການຮຽນ-ການສອນ ໄລຍະ 3 ເດືອນ ຊຶ່ງຄົບຕາມຫຼັດສູດ. ສະນັ້ນ, ມາໃນວັນທີ 25 ພຶດສະພາ 2023 ໂຮງຮຽນການເມືອງ ແລະ ການປົກຄອງແຂວງອຸດົມໄຊ ຈຶ່ງໄດ້ຈັດພິທີສະຫຼຸບ ແລະປິດຊຸດຮຽນນັກສຶກສາລະບົບຂັ້ນຕົ້ນ ໃຫ້ກຽດເປັນປະທານໂດຍ: ສະຫາຍ ປອ ດາວສະຫວັນ ເຄືອມີໄຊ ຄະນະປະຈຳພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີ ສະຫາຍ ມໍຊົງ ຄະນະປະຈຳພັກແຂວງອຸດົມໄຊ, ເລຂາຄະນະພັກຮາກຖານ, ຫົວໜ້າຄະນະໂຄສະນາອົບຮົມແຂວງ ແລະສະຫາຍ ປທ ນ. ສົມໃຈ ພົນທອງສີ ຮອງຫົວໜ້າໂຮງຮຽນການເມືອງ ແລະ ການປົກຄອງແຂວງອຸດົມໄຊ, ມີພະນັກງານ, ຄູ-ອາຈານ, ນັກສຶກສາ ແລະຕາງໜ້າພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.
ໃນພິທີ ສະຫາຍ ປທ ນ. ສົມໃຈ ພົນທອງສີ ໄດ້ສະຫຼຸບລາຍງານຕະຫຼອດໄລຍະ 3 ເດືອນ ຂອງການຮຽນ-ການສອນ ຊຶ່ງຊຸດນີ້ກໍໄດ້ແບ່ງຄວາມຮັບຜິດ ຊອບຕາມແຕ່ລະໜ້າວຽກງານຄື: ວຽກງານການເມືອງແນວຄິດ, ວຽກງານບໍລິຫານການເງິນ, ວຽກງານຂະບວນການ, ວຽກງານປ້ອງກັນຄວາມສະຫງົບ, ຄະນະພັກ, ຄະນະໂຮງຮຽນກໍ່ໄດ້ເອົາໃຈໃສ່ໃກ້ຊິດຕິດແທດຢ່າງເປັນປະຈຳໂດຍສະເພາະໄດ້ແຕ່ງຕັ້ງຄູປະຈຳຫ້ອງ ແລະຄະນະຫ້ອງເພື່ອຕິດຕາມ, ກວດກາ ແລະຄຸ້ມຄອງໂຄງການຫຼັກສູດ ກໍຄືການຄົ້ນຄວ້າຮ່ຳຮຽນໄດ້ມີຜົນສຳເລັດເປັນຢ່າງດີ.
ນອກຈາກການສຶກສາໃນຫ້ອງຮຽນ ນັກສຶກສາໄດ້ປະກອບສ່ວນວຽກງານການເມືອງ, ເຂົ້າຮ່ວມຮັບຟັງການປາຖະກະຖາວັນສໍາຄັນຕ່າງໆຂອງຊາດ, ຂອງພັກຖືເອົາການຄົ້ນຄວ້າຮໍ່າຮຽນທິດສະດີຕິດພັນກັບການເຊື່ອມຊຶມມະຕິ XI ຂອງພັກ ແລະເອກະສານທີ່ສໍາຄັນຕ່າງໆ ຊຶ່ງເຮັດນັກສຶກສາໄດ້ຮັບຮູ້ ແລະເຊື່ອມຊຶມຕໍ່ແນວທາງຂອງພັກ, ລະບຽບກົດໝາຍຂອງລັດ, ຂໍ້ກໍານົດກົດລະບຽບຂອງໂຮງຮຽນວາງອອກເປັນຢ່າງດີ ແລະການສິດສອນຂອງຄູ-ອາຈານໄດ້ຫັນໄປສູ່ວິທີສິດສອນແບບຕັ້ງໜ້າ, ປະສົມປະສານກັບການສິດສອນທີ່ເປັນມູນເຊື້ອໄດ້ດີພໍສົມຄວນ, ນໍາໃຊ້ວິທີການບັນລະຍາຍ, ອະທິບາຍສົມທຽບພຶດຕິກໍາ, ຍົກບັນຫາຂຶ້ນສົນທະນາພາຍໃນຫ້ອງ, ສົນທະນາເປັນກຸ່ມ ແລະວິທີການອື່ນໆອັນໄດ້ເຮັດໃຫ້ນັກສຶກສາມີຄວາມຕັ້ງໃຈຕໍ່ການບັນລະຍາຍ ແລະມີຄວາມເຂົ້າໃຈຕໍ່ກັບເນື້ອໃນບົດຮຽນໄດ້ຫຼາຍຂຶ້ນ. ສັງລວມແລ້ວການສຶກສາຄົ້ນຄວ້າຮ່ຳຮຽນຂອງນັກສຶກສາໃນຊຸດນີ້ ແຕ່ລະສະຫາຍລ້ວນແຕ່ຍາດໄດ້ຄະແນນໃນລະດັບດີ, ດີຫຼາຍ ແລະດີເລີດຊື່ງສະແດງອອກດັ່ງລຸ່ມນີ້:
– ເກຼດ A ມີ 15 ສະຫາຍ, ຍິງ 9 ສະຫາຍ
– ເກຼດ B+ ມີ 35 ສະຫາຍ, ຍິງ 4 ສະຫາຍ.
– ເກຼດ B ມີ 5 ສະຫາຍ.
ເພື່ອເປັນການຢັ້ງຢືນໝາກຜົນການຄົ້ນຄ້ວາ, ຮໍ່າຮຽນຂອງສຶກສາຕະຫຼອດໄລຍະ 3 ເດືອນ ສະຫາຍ ປທ ນ. ປທ ນ. ສົມໃຈ ພົນທອງສີ ໄດ້ເປັນກຽດມອບໃບຢັ້ງຢືນທິດສະດີຂັ້ນຕົ້ນໃຫ້ຊຸດຮຽນດັ່ງກ່າວຢ່າງສົມກຽດ ແລະໃນພິທີໄດ້ຖືເອົາໂອກາດດັ່ງກ່າວເພື່ອສືບຕໍ່ເປີດຊຸດຮຽນທິດສະດີຂັ້ນກາງ ຮຸ່ນທີ I ຂຶ້ນຢ່າງເປັນທາງການ, ຊຸດຮຽນນີ້ມີຜູ້ເຂົ້າຮຽນຈຳນວນ 52 ສະຫາຍ, ຍິງ 6 ສະຫາຍ ຊຶ່ງເປັນແຜນການກໍ່ສ້າງພະນັກງານນໍາພາຄຸ້ມຄອງ, ນາຍທະຫານ ແລະນາຍຕໍາຫຼວດທີ່ພວມດໍາລົງຕໍາແໜ່ງບໍລິຫານປະເພດ 4 ແລະປະເພດ 5 ຢູ່ອົງການຈັດຕັ້ງພັກ-ລັດ ແລະອົງການຈັດຕັ້ງມະຫາຊົນທັງນີ້ເພື່ອເປັນການຍົກລະດັບຄວາມຮູ້, ຄວາມສາມາດທາງດ້ານທິດສະດີການເມືອງ, ແນວຄິດ ໄກສອນ ພົມວິຫານ, ແນວທາງນະໂຍບາຍຂອງພັກ, ການຄຸ້ມຄອງລັດ, ເຮັດໃຫ້ພະນັກງານມີແນວຄິດຫຼັກໝັ້ນຊົນຊັ້ນກໍາມະກອນ, ມີແນວຄິດເຊື່ອໝັ້ນຕໍ່ການນໍາພາຂອງພັກ, ຕໍ່ອຸດົມການກໍຄືພາລະກິດປ່ຽນແປງໃໝ່ຢ່າງມີຫຼັກການຂອງພັກ, ມີຄວາມຈົ່ງຮັກພັກດີຕໍ່ປະເທດຊາດ, ມີຄວາມຫ້າວຫັນເປັນແບບຢ່າງໃນທຸກວຽກງານ, ເຮັດໃຫ້ການປະຕິບັດໜ້າທີ່ວຽກງານນັບມື້ນັບມີຄຸນນະພາບສູງຂຶ້ນ. ຫຼັງຈາກນັ້ນ, ສະຫາຍ ປອ ດາວສະຫວັນ ເຄືອມີໄຊ ກໍໄດ້ມີຄໍາເຫັນໂອລົມຕໍ່ພິທີ ແລະໃຫ້ທິດຊີ້ນຳດັ່ງນີ້:
I. ຕໍ່ກັບນັກສຶກສາທິ່ສຳເລັດລະບົບຂັ້ນຕົ້ນຮຸ່ນທີ I:
- ໃຫ້ທົບທວນຄືນຢ່າງເປັນລະບົບກ່ຽວກັບບັນດາຫຼັກມູນພື້ນຖານທິດສະດີມາກ-ເລນິນ ຊຶ່ງເປັນການປະ ກອບໂລກະທັດປະຕິວັດ, ວິທະຍາສາດ, ກຳແໜ້ນເຊື່ອມຊຶມເລິກເຊິ່ງກວ່າເກົ່າຕໍ່ບັນດາທັດສະນະແນວທາງປ່ຽນແປງໃໝ່ທີ່ມີຫຼັກການຂອງພັກ, ບັນດາສະຫາຍຕ້ອງໄດ້ປັບປຸງແນວຄິດ ແລະທັດສະນະການເມືອງໄດ້ດີຂຶ້ນຕື່ມອີກບາດກ້າວໜຶ່ງ, ເປັນຕົ້ນແມ່ນການຍົກສູງຄຸນສົມບັດສິນທຳປະຕິວັດ, ຫຼັກໝັ້ນຊົນຊັ້ນກຳມະກອນ, ຈຳແນກມິດ-ສັດຕູຈະແຈ້ງ, ເຊື່ອມຊຶມ ແລະເຊື່ອໝັ້ນຕໍ່ການນຳພາຂອງພັກ ແລະພາລະກິດປ່ຽນແປງໃໝ່ຢູ່ປະເທດເຮົາ ພ້ອມນີ້ກໍປຸກລະດົມໄດ້ແນວຄິດຫ້າວຫັນ, ປະດິດສ້າງ ແລະຕີຖອຍແນວຄິດຫຍໍ້ທໍ້ຕ່າງໆ;
- ປັບປຸງແບບແຜນວິທີເຮັດວຽກ, ແບບແຜນການເຄື່ອນໄຫວ ແລະການດຳລົງຊີວິດອັນປອດໃສຂາວສະ ອາດ, ມີຄວາມສາມາດຄິດຫງໍາກ່ຽວກັບວິທີການ, ມາດຕະການຕົວຈິງເພື່ອຈັດຕັ້ງປະຕິບັດແນວທາງ, ແຜນນະໂຍບາຍຂອງພັກ, ຂໍ້ກໍານົດກົດໝາຍຂອງລັດໃຫ້ປະກົດຜົນເປັນຈິງຢູ່ໃນຂະແໜງການ ແລະວຽກງານທີ່ຕົນຮັບຜິດຊອບ;
- ແຕ່ລະສະຫາຍຜູ້ສຶກສາຮ່ຳຮຽນໄດ້ຖືໂອກາດນີ້ເປັນການເຝິກຝົນຫຼໍ່ຫຼອມຕົນເອງໄປພ້ອມໆກັນກັບການຍາດແຍ່ງເອົາຄວາມຮູ້ທາງດ້ານທິດສະດີ ແລະທັງພຶດຕິກຳເປັນການເຝິກຝົນຊຶ່ງມັນໄດ້ເຮັດໃຫ້ ແຕ່ລະສະຫາຍມີການຫັນ ປ່ຽນຢ່າງຈະແຈ້ງດັ່ງທີ່ສະແດງອອກໃນຜົນການຮ່ຳຮຽນ, ພ້ອມກັນນັ້ນ, ກໍໄດ້ມີໂອກາດແລກປ່ຽນບົດຮຽນໃນການຈັດຕັ້ງນໍາພາ, ແລກປ່ຽນຄວາມຄິດຄວາມເຫັນທີ່ເປັນຜົນດີໃນການຈັດຕັ້ງປະຕິບັດວຽກງານສະເພາະໜ້າ ແລະຍາວນານເພື່ອສືບຕໍ່ປະສານສົມທົບແລກປ່ຽນບົດຮຽນເຊິ່ງກັນ ແລະກັນຢ່າງເປັນປະຈຳ.
II. ຕໍ່ກັບຊຸດຮຽນທິດສະດີຂັ້ນກາງ ຮຸ່ນທີ I:
- ບັນດານັກສຶກສາທີ່ໄດ້ຄັດເລືອກເຂົ້າມາຄົ້ນຄວ້າຮໍ່າຮຽນທິດສະດີ ຂັ້ນກາງຊຸດທາອິດນີ້ແມ່ນຄວາມຕັດ ສິນໃຈສູງຂອງຄະນະພັກຂັ້ນຕ່າງໆ. ດັ່ງນັ້ນ, ການຮ່ຳຮຽນຂອງບັນດາສະຫາຍໃຫ້ປະຕິບັດລະບຽບວິໄນຂອງການຮຽນຢ່າງເຂັ້ມງວດ; ຕ້ອງເຂົ້າໃຈວ່າຢູ່ແຕ່ລະບ່ອນແມ່ນມີລະບຽບໃນການຄຸ້ມຄອງອັນສະເພາະ, ບັນດາ ສະຫາຍມາຈາກຫຼາຍພາກ ສ່ວນຈິ່ງຕ້ອງໄດ້ພະຍາຍາມເໜັ້ນໃນການປະຕິບັດລະບຽບວິໃນ, ການຢູ່ຮ່ວມກັນຫຼາຍຄົນ, ສ້າງຄວາມສາມັກຄີຮັກແພງ, ແລກປ່ຽນປະສົບການ ແລະການຊ່ວຍເຫຼືອເຊິ່ງກັນແລະກັນ;
- ພວກສະຫາຍຕ້ອງຮັບຮູ້ຢ່າງເລິກເຊິ່ງຕໍ່ກັບຄວາມຮັບຜິດຊອບ ແລະໜ້າທີ່ຂອງຕົນ. ນີ້ເປັນໂອກາດອັນໃຫຍ່ຫຼວງໃຫ້ບັນດາສະຫາຍໄດ້ຍົກລະດັບທາງດ້ານທິດສະດີການເມືອງ-ການປົກຄອງ, ຍົກລະດັບທາງດ້ານການປະຕິບັດໜ້າທີ່, ເຝິກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທໍາປະຕິວັດ;
- ພວກສະຫາຍຕ້ອງຮຽນຢ່າງເຂັ້ມງວດ, ອ່ານໃຫ້ເລິກ, ຄົ້ນຄວ້າໃຫ້ແທດເຖິງ, ມີຄວາມມັກຮັກໃນການອ່ານ, ໃນການຄົ້ນຄວ້າ, ຮຽນດ້ວຍຄວາມຮັບຜິດຊອບແທ້ໆ. ທັງຮຽນທິດສະດີທັງຄົ້ນຄວ້າພຶດຕິກຳ, ເອົາທິດສະດີເຍືອງໃສ່ພຶດຕິກຳ, ໄປແກ້ບັນຫາທີ່ຕັ້ງຂຶ້ນໃນພຶດຕິກໍາຕົວຈິງ; ເພີ່ມທະວີການຮຽນດ້ວຍຕົນເອງໃຫ້ຫຼາຍຂຶ້ນ, ຄົ້ນຄວ້າດ້ວຍຕົນເອງຫຼາຍຂຶ້ນ.
ຂ່າວ: ຕາອັອດ ແສນທະວີສຸກ
ພາບ: ຫົວໜ້າໂຮງຮຽນການເມືອງ ແລະການປົກຄອງແຂວງອຸດົມໄຊ
ບັນນາທິການ: ປທ ບຸນປັນ ສຸມຸນທອງ