ໃນຕອນເຊົ້າວັນທີ 2 ກຸມພາ 2023 ໜ່ວຍພັກຮາກຖານກົມຄຸ້ມຄອງການຮຽນ-ການສອນ ແລະ ກົມຄຸ້ມຄອງ ການຄົ້ນຄວ້າວິທະຍາສາດ ຮັບມະຫາຊົນກ້າວໜ້າ ເຂົ້າເປັນສະມາຊິກພັກໃໝ່ 2 ສະຫາຍ, ຍິງ 1 ສະຫາຍ ໂດຍການເຂົ້າຮ່ວມເປັນປະທານຂອງສະຫາຍ ປທ ນ. ຄຳຫຼ້າ ແກ້ວອຸ່ນຄຳ ຄະນະພັກ, ຮອງຫົວໜ້າ ສມປຊ ແລະ ທ່ານ ປອ ນ. ໄກສອນ ຈັນສີນາ ຄະນະພັກ, ເລຂາໜ່ວຍພັກຮາກຖານ, ຫົວໜ້າກົມຄຸ້ມຄອງການຮຽນ-ການສອນ, ມີແຂກຖືກເຊີນ ແລະ ສະມາຊິກພັກສົມບູນ-ສໍາຮອງ ຂອງໜ່ວຍພັກຮາກຖານຕ່າງໆພາຍໃນ ສມປຊ.
ສະຫາຍ ວິໄລສິດ ພິມພັກດີ ຫົວໜ້າພະແນກພັກ ແລະ ປ້ອງກັນພັກ ຂຶ້ນຜ່ານມະຕິຕົກລົງຂອງຄະນະບໍລິຫານງານພັກ ສມປຊ ວ່າດ້ວຍຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງຄື: ສະຫາຍ ສຸລິພອນ ພົງສະຫວັດ ແລະສະຫາຍ ນ. ດາວັນ ສີສຸພັນ ເຊິ່ງທີ່ຜ່ານມາສອງສະຫາຍໄດ້ຜ່ານການຝຶກຝົນຫໍ່ຼຫຼອມຕົນເອງໃນຂະບວນການຕ່າງໆ ຢ່າງມີຜົນສໍາເລັດ, ໄດ້ຜ່ານການຮໍ່າຮຽນສະໜັບສະໜູນ ແລະ ກົດລະບຽບພັກ ແລະ ຖືກຕ້ອງຕາມກົດລະບຽບພັກປະຊາຊົນ ປະຕິວັດລາວ ວາງອອກ, ພ້ອມນີ້ ທ່ານ ປອ ນ. ໄກສອນ ຈັນສີນາ ໄດ້ຂຶ້ນກ່າວຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງຢ່າງເປັນທາງການ.
ສະຫາຍ ປທ ນ. ຄຳຫຼ້າ ແກ້ວອຸ່ນຄຳ ໄດ້ຍ້ອງຍໍຊົມເຊີຍຕໍ່ຜົນງານການກໍ່ສ້າງ ແລະ ຝຶກຝົນຫຼໍ່ຫຼອມຂອງສອງສະຫາຍ ທີ່ມີຄວາມໜັກແໜ້ນທາງດ້ານທາດການເມືອງ, ເອົາໃຈໃສ່ຄົ້ນຄວ້າຮ່ຳຮຽນ ແລະໄດ້ເນັ້ນໜັກໃຫ້ສະມາຊິກພັກໃໝ່ ກຳແໜ້ນແນວທາງນະໂຍບາຍ, ກົດລະບຽບຂອງພັກ, ກົດໝາຍຂອງລັດໃຫ້ເລິກເຊິ່ງ, ມີຄວາມເປັນແບບຢ່າງທີ່ດີໃຫ້ມະຫາຊົນ, ປັບປຸງທາງດ້ານແນວຄິດໃຫ້ມີຄວາມຮັບຜິດຊອບ-ຄວາມຫ້າວຫັນຕໍ່ໜ້າທີ່ວຽກງານ ແລະ ບຸກບືນຜ່ານຜ່າທຸກຂໍ້ຫຍຸ້ງຍາກໃນການປະຕິບັດໜ້າທີ່ວຽກງານຂອງຕົນ, ມີນ້ຳໃຈເສຍສະຫຼະ, ມີຄວາມອົດທົນ, ຖືຜົນປະໂຫຍດສ່ວນລວມສູງກວ່າຜົນປະໂຫຍດສ່ວນຕົວ, ມີຄວາມເປັນແບບຢ່າງໃນການດຳລົງຊີວິດຢູ່ໃນສັງຄົມທີ່ປອດໃສຂາວສະອາດ, ຮູ້ໃຫ້ກຽດ, ຮູ້ໃຫ້ອະໄພເຊິ່ງກັນ ແລະ ກັນ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ