ພິທີປິດຊຸດເຝິກອົບຮົມພະນັກງານນໍາພາ-ຄຸ້ມຄອງຂັ້ນສູງ ຊຸດທີ 1

ໃນຕອນເຊົ້້າ ວັນທີ  11 ເມສາ 2025 ຢູ່ທີ່ ຊັ້ນ 5 ຕຶກສູນຂໍ້ມູນຂ່າວສານການເມືອງ ແລະການປົກຄອງ, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີປິດຊຸດເຝິກອົບຮົມພະນັກງານນໍາພາ-ຄຸ້ມຄອງຂັ້ນສູງ ຊຸດທີ 1, ພາຍໃຕ້ການເປັນປະທານ  ໂດຍ: ທ່ານ ນາງ ສີໃສ ລືເດດມູນສອນ, ກຳມະການກົມການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີທ່ານ ຮສ ພູວົງ ອຸ່ນຄໍາແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ຄະນະຮັບຜິດຊອບຊຸດຝຶກອົບຮົມ, ມີການນໍາຂັ້ນສູງທີ່ມາຈາກພາກສ່ວນຕ່າງໆ, ມີຄະນະພັກ-ຄະນະນໍາ ສປມຊ, ຜູ້ຕ່າງໜ້າຄະນະຈັດຕັ້ງສູນກາງພັກ, ບັນດາຫົວໜ້າກົມ, ຄະນະກົມ ແລະແຂກຖືກເຊີນ, ເຂົ້າຮ່ວມທັງໝົດ 70 ກວ່າທ່ານ.

         ໃນພິທີທ່ານ ທ່ານ ປອ ດາວສະຫວັນ ເຄືອມີໄຊ ຄະນະປະຈໍາພັກ, ຮອງຫົວໜ້າ ສມປຊ ໄດ້ຂຶ້ນຜ່ານບົດສະຫຼຸບປິດຊຸດເຝິກອົບຮົມພະນັກງານນໍາພາ-ຄຸ້ມຄອງຂັ້ນສູງ ຊຸດທີ 1 ຄື: ຊຸດເຝິກອົບຮົມຄັ້ງນີ້ມີຜູ້ເຂົ້້າຮ່ວມເຝິກທັງໝົດ 43 ທ່ານ, ຍິງ 9 ທ່ານ, ການເຝິກອົບຮົມແມ່ນໄດ້ດໍາເນີນເປັນເວລາ 15 ວັນ ນັບແຕ່ວັນທີ 24 ມີນາ-11 ເມສາ 2025.

ເນື້ອໃນການຝຶກອົບຮົມ ປະກອບດ້ວຍ 9 ຫົວຂໍ້ລົງເລີກ ແລະເຊື່ອມຊຶມ, ປະກອບຄໍາເຫັນໃສ່ 4 ເອກະ ສານທີ່ສໍາຄັນ ເປັນຕົ້ນແມ່ນ: ຮ່າງລາຍງານການເມືອງຕໍ່ກອງ ປະຊຸມໃຫຍ່ຄັ້ງທີ XII ຂອງພັກ, ຮ່າງກົດລະບຽບ ສະ ໄໝທີ XII ຂອງພັກ, ຮ່າງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X ແລະຮ່າງໂຄງການການເມືອງ ຂອງພັກ ແລະຄູ-ອາຈານ. ຜູ້ບັນຍາຍປະກອບດ້ວຍບັນດາທ່ານທີ່ມາຈາກກົມການເມືອງສູນກາງພັກ, ກໍາມະການສູນກາງພັກ, ຮອງລັດຖະມົນຕີ ຜູ້ທີ່ມີປະສົບການສູງໃນພຶດຕິກໍາ, ມີຄວາມຮູ້, ມີຄວາມສາມາດທີ່ແນ່ນອນ ແລະມີປະສົບການໃນການສົ່ງຄວາມຮູ້ໃຫ້ແກ່ຜູ້ຮຽນໄດ້ເປັນຢ່າງດີ.

ຜ່ານການປະເມີນຜົນຄວາມຮັບຮູ້ ຂອງຜູ້ເຂົ້າເຝິກອົບຮົມ ໂດຍອີງໃສ່ 3 ເນື້ອໃນພື້ນຖານ ຄື: 1) ຄວາມສອດຄ່ອງທາງດ້ານເນື້ອໃນລັກສູດ: 2) ດ້ານສະຖານທີ່, ພິທີການ ຫຼື ສິ່ງອໍານວຍຄວາມສະດວກຕ່າງໆ: ແລະ 3) ການຈັດກິດຈະກຳໄປທັດສະນະສຶກສາ ເພື່ອສົມທົບລະຫວ່າງທິດສະດີກັບພຶດຕິກຳ ຄະແນນອອກມາແມ່ນ ດີຫຼາຍ ຄື: ເນື້ອໃນທີ 1 ໄດ້ ຄະແນນສະເລ່ຍ 4,35 ຄະແນນ (ຄະແນນເຕັມ 5); ເນື້ອໃນທີ 2 ໄດ້ 4,66 ຄະນະແນນ (ຄະແນນເຕັມ 5): ແລະ ເນື້ອໃນທີ 3 ໄດ້ 4.41 ຄະແນນ (ຄະແນນເຕັມ 5) ແລະໃນພິທີໃຫ້ກຽດມອບໃບຢັ້ງຢືນໂດຍ ທ່ານ ຮສ ພູວົງ ອຸ່ນຄໍາແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ຄະນະຮັບຜິດຊອບຊຸດຝຶກອົບຮົມ.

ໃນຕອນທ້າຍພິທີ ທ່ານປະທານ ໄດ້ມີຄໍາເຫັນໂອ້ລົມຕໍ່ນັກຝຶກອົບຮົມທັງໝົດ ຊຶ່ງໄດ້ເນັ້ນໜັກບາງເນື້ອໃນສໍາຄັນຄື:

1). ຕ້ອງຮູ້ໝູນໃຊ້ສິ່ງທີ່ໄດ້ຮຽນຮູ້ມາຢ່າງປະດິດສ້າງ ເຂົ້າໃນວຽກງານຕົວຈິງ ຊຶ່ງຈະກໍ່ໃຫ້ເກີດຜົນປະໂຫຍດໃຫ້ແກ່ການສ້າງສາພັດທະນາປະເທດຊາດຂອງພວກເຮົາຢ່າງບໍ່ຢຸດຢັ້ງ ແລະຕ້ອງມີຄວາມກ້າຄິດ, ກ້າຮັບຜິດຊອບ ພ້ອມທັງປັບປຸງຈຸດອ່ອນຂອງຕົນເອງ;

2). ຈົ່ງນໍາເອົາບົດຮຽນທີໄດ້ຮຽນມາ ໄປທົດສອບໃນການປະຕິບັດວຽກງານໃນຂົງເຂດທີ່ຕົນເອງຮັບຜິດ ຊອບ ແລະມີການປະສານງານຢ່າງກົງໄປກົງມາ;

3). ສືບຕໍ່ພັດທະນາຕົນເອງໃຫ້ຫຼາຍຂຶ້ນຢ່າງບໍ່ຢຸດຢັ້ງ ໂດຍສະເພາະແມ່ນຍົກຂໍ້ມູນຂ່າວສານທີ່ເປັນຜົນປະໂຫຍໃນການພັດທະນາຕົນເອງໂດຍບໍ່ຢຸດຢູ່ບ່ອນເກົ່າ ແລະການສຶກສາຮໍ່າຮຽນຄັ້ງນີ້ ແມ່ນການຕໍ່ຍອດຄວາມຮູ້ ເພື່ອປັບປຸງວຽກງານໃນກົມກອງໃຫ້ດີຂຶ້ນ;

4). ການເຝິກອົບຮົບຄັ້ງນີ້ ຮຽກຮ້ອງມາຍັງນັກຝຶກອົບຮົມໃຫ້ເອົາໃຈໃສ່ຜັນຂະຫຍາຍໃຫ້ລົງເລິກໃນການປະຕິບັດວຽກງານ ໃຫ້ບັນລຸຕາມເປົ້າໝາຍ, ຕ້ອງຍົກສູງຄວາມຮັບຜິດຊອບບັນດາແຜນວຽກງານຕ່າງໆ  ແລະຕ້ອງມີຄວາມຊື່ສັດບໍລິສຸດ.