ວັນທີ 24 ພະຈິກ 2020 ເວລາ 06:00ມ, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດກິດຈະກຳຍ່າງເພື່ອສຸຂະພາບ ສະເຫຼີມສະຫຼອງວັນສົນທິສັນຍາວ່າດ້ວຍສິດທິເດັກ (ທີ 20 ພະຈິກ) ແລະສາກົນຢຸດຕິໃຊ້ຄວາມຮຸນແຮງ ຕໍ່ແມ່ຍິງ ແລະເດັກນ້ອຍ (ທີ 25 ພະຈິກ ), ໂດຍການນໍາພາຂອງຄະນະພັກ, ຄະນະນໍາ ສມປຊ, ພະນັກງານ, ຄູ-ອາຈານ ແລະ ນັກສຶກສາ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ປທ ນ. ບຸນມີ ຈຸນລະຈັກ ຮອງເລຂາຄະນະບໍລິຫານງານພັກ, ປະທານກວດກາພັກ, ຮອງຫົວໜ້າ ສມປຊ ໄດ້ກ່າວເຖິງຄວາມໝາຍຄວາມສຳຄັນຂອງວັນດັ່ງກ່າວ ແລະກ່າວເປີດພິທີຍ່າງເພື່ອສຸຂະພາບ.
ໃນເວລາ 08:00 ຂອງວັນດຽວກັນ ພະນັກງານ, ຄູ-ອາຈານ ແລະ ນັກສຶກສາ ໄດ້ສືບຕໍ່ເຂົ້າຮ່ວມຮັບຟັງການປາຖະກະຖາວັນສົນທິສັນຍາວ່າດ້ວຍສິດທິເດັກ 20 ພະຈິກ ແລະວັນສາກົນ ຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍ ວັນທີ 25 ພະຈິກ ໂດຍໃຫ້ກຽດເຜີຍແຜ່ຂອງທ່ານ ນາງ ມະນີວອນ ຫຼວງສົມບັດ ຮອງຫົວໜ້າຫ້ອງຫານກອງເລຂາຄະນະກໍາມະທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະເດັກ.
ທ່ານ ນາງ ມະນີວອນ ຫຼວງສົມບັດ ໄດ້ຍົກໃຫ້ເຫັນວ່າ: ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນປັດຈຸບັນ ທີ່ກໍາລັງແຜ່ລາມຫຼາຍຮູບແບບໃນທົ່ວໂລກ ທີ່ໄດ້ສົ່ງຜົນກະທົບທາງລົບຕໍ່ການພັດທະນາເສດຖະກິດ-ສັງຄົມ ເວົ້າລວມ ເວົ້າສະເພາະ ແມ່ນກະທົບຕໍ່ຈິດໃຈ, ຮ່າງກາຍ ຕະຫຼອດເຖິງຊັບສິນຂອງແມ່ຍິງ ແລະ ເດັກນ້ອຍ ໂດຍສາເຫດຕົ້ນຕໍແມ່ນຍ້ອນຮີດຄອງປະເພນີທີ່ເກົ່າແກ່ຫຼ້າຫຼັງ, ການເຊື່ອຖືແບບງົມງາຍ, ຄວາມທຸກຍາກຂາດເຂີນ, ລະດັບການສຶກສາຕໍ່າ ແລະ ສິ່ງຫຍໍ້ທໍ້ອື່ນໆ ທີ່ມີຕໍ່ແມ່ຍິງໃນສັງຄົມ ຊຶ່ງປະກອບມີຫຼາຍຮູບແບບເຊັ່ນ: ການບັງຄັບການແຕ່ງງານແຕ່ອາຍຸຍັງນ້ອຍ, ການຄ້າມະນຸດ, ການບັງຄັບຮ່ວມເພດ ແລະ ການຂົ່ມຂື່ນທໍາຊໍາເລົາ ທີ່ສາມາດ ເກີດຂຶ້ນກັບ ແມ່ຍິງໃນທຸກເພດທຸກໄວ ບໍ່ວ່າຈະໃນຄອບຄົວ, ຊຸມຊົນພາຍໃນຕົວເມືອງ ແລະ ຊົນນະບົດ ຊຶ່ງໄດ້ສ້າງຜົນກະທົບຕໍ່ແມ່ຍິງ ແລະ ເດັກນ້ອຍ ນັບແຕ່ມື້ເກີດຈົນເຖິງໄວແກ່ເຖົ້າຊະລາ ບັນຫາດັ່ງກ່າວເປັນສິ່ງກີດກັ້ນຢ່າງໜັກໜ່ວງໃນການພັດທະນາຄວາມສາມາດຂອງຊັບພະຍາກອນມະນຸດ. ດັ່ງນັ້ນ, ເພື່ອເປັນການລະນຶກເຖິິງ ວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກ, ເພື່ອເປັນການປຸກລະດົມ ປູກຈິດສໍານຶກ ໃຫ້ແກ່ພະນັກງານ-ລັດຖະກອນ ສມປຊ ໄດ້ຮັບຮູ້ ແລະ ເຂົ້າໃຈ ເຖິງບັນຫາການໃຊ້ຄວາມຮຸນແຮງຕໍ່ແມ່ຍິງ ທີ່ເປັນການລະເມີດສິດທິມະນຸດຂອງແມ່ຍິງ ແລະ ຮັບປະກັນ ໃຫ້ມີການປະຕິບັດສິດສະເໝີພາບລະຫວ່າງ ຍິງ-ຊາຍ ບໍ່ວ່າຈະເປັນ ທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ ກໍຄືຄອບຄົວ. ດັ່ງນັ້ນ, ທຸກຄົນໃນສັງຄົມຕ້ອງຕອບຕ້ານ ແລະ ສະກັດກັ້ນ ການໃຊ້ຄວາມຮຸນແຮງຕໍ່ແມ່ຍິງ, ພ້ອມັທງໃຫ້ການຊ່ວຍເຫຼືອ ແກ່ຜູ້ທີ່ຖືກເຄາະຮ້າຍຈາກການໃຊ້ຄວາມຮຸນແຮງ, ໃຫ້ຄຳປຶກສາ, ຊ່ວຍເຫຼືອທາງດ້ານກົດໝາຍ ແລະ ເພີ່ມທະວີໃນການໂຄສະນາເຜີຍແຜ່ ເຮັດໃຫ້ສັງຄົມມີຄວາມເຂົ້າໃຈ ຢ່າງເລິກເຊິ່ງ ແລະ ຄວາມຮຸນແຮງຕໍ່ແມ່ຍິງເປັນສິ່ງທີ່ສັງຄົມຮັບບໍ່ໄດ້; ສ້າງເງື່ອນໄຂເຮັດໃຫ້ແມ່ຍິງໃນຄອບຄົວ ໃຫ້ເຂົ້າເຖິງການສຶກສາ ເພື່ອສ້າງຄວາມເຂັ້ມແຂງ ໃຫ້ແກ່ແມ່ຍິງ ແລະຍົກສູງຄຸນນະພາບຊີວິດ ການເປັນຢູ່ໃຫ້ດີຂຶ້ນ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ຂ່າວ: ຕາອັອດ ແສນທະວີສຸກ
ພາບ: ນ. ທິດດາວອນ ດວງປະເສີດ
ບັນນາທິການ: ຄອນສະຫວັນ ແສນຍານຸພາບ