ໃນວັນທີ 24 ກັນຍາ ທີ່ຫ້ອງຮຽນ 301 ຕຶກ H ສະຖາບັນການເມືອງ ແລະ ການປົກຄອງແຫ່ງຊາດ ໄດ້ເປີດຊຸດຮຽນນັກສຶກສາຊັ້ນສູງລະບົບເລັ່ງລັດ 5 ເດືອນ ຮຸ່ນທີ XXVII ຂຶ້ນຢ່າງເປັນທາງການ, ໃຫ້ກຽດເປັນປະທານ ແລະ ກ່າວເປີດຂອງ ທ່ານ ຮສ ພູວົງ ອຸ່ນຄຳແສນ ເລຂາຄະນະບໍລິຫານງານພັກ, ຮັກສາການຫົວໜ້າ ສມປຊ, ມີທ່ານ ປອ ນາງ ໄກສອນ ຈັນສີນາ ກຳມະການຄະນະບໍລິຫານງານພັກ, ຫົວໜ້າກົມຄຸ້ມຄອງການຮຽນ-ການສອນ ແລະນັກສຶກສາໃນລະບົບຮຽນດັ່ງກ່າວຈຳນວນ 55 ທ່ານ, ຍິງ 15 ທ່ານ ເຂົ້າຮ່ວມຢ່າງພ້ອມພຽງ.
ນັກສຶກສາຊັ້ນສູງລະບົບເລັ່ງລັດ 5 ເດືອນ ຮຸ່ນທີ XXVII ຈະໄດ້ຮຽນຮູ້ຫຼັກມູນພື້ນຖານ ແລະ ທິດສະດີມາກ-ເລນິນ, ແນວຄິດໄກສອນ ພົມວິຫານ ແລະແນວທາງແຜນນະໂຍບາຍຂອງພັກ, ບັນດາກົດໝາຍ ແລະ ແຜນພັດທະນາເສດຖະກິດ-ສັງຄົມແຕ່ລະໄລຍະຂອງລັດ ຕາມໂຄງການຫຼັກສູດຂອງ ສະຖາບັນການເມືອງ ແລະ ການປົກຄອງແຫ່ງຊາດ ທັງເປັນການປະກອບສ່ວນບຳລຸງຍົກລະດັບຄຸນທາດການເມືອງ, ຄຸນສົມບັດສິນທໍາປະຕິວັດ, ທັດສະນະຫຼັກໝັ້ນການເມືອງຂອງພະນັກງານ ແລະ ມີວິໄສທັດໃນການສັງເກດຕີລາຄາບັນຫາຕ່າງໆໃຫ້ຖືກຕ້ອງ ແລະ ກ້າເບິ່ງບັນຫາ ແລະ ແກ້ໄຂບັນຫາ ໃຫ້ຖືກຕ້ອງກວ່າເກົ່າ.
ປະທານພິທີໄດ້ໃຫ້ຄຳໂອ້ລົມ ແລະ ໃຫ້ທິດຊີ້ນຳໂດຍໄດ້ຍົກໃຫ້ເຫັນເຖິງການຮຽນໄລຍະເວລາ 5 ເດືອນ ໃຫ້ ນັກສຶກສາມີຄວາມຕັ້ງໃຈຕໍ່ກັບການສຶກສາ, ຍາດແຍ່ງເອົາຄວາມຮູ້ນຳ ຄູ-ອາຈານ ຂອງການຮ່ຳຮຽນທິດສະດີ ແລະ ຄວາມໝາຍຄວາມສຳຄັນຂອງການມາສຶກສາຄົ້ນຄວ້າທິດສະດີການເມືອງ-ການປົກຄອງ ແມ່ນກໍ່ການສ້າງພະນັກງານຂອງການນຳຫຼັກແຫຼ່ງ ເພື່ອເຮັດໃຫ້ການປະຕິບັດວຽກງານພາຍໃນຂອງກົມກອງ ໃຫ້ມີປະສິດທິຜົນສູງຂຶ້ນກວ່າເກົ່າ ທີ່ມີລັກສະນະນຳໜ້າ ແລະຄວາມເປັນເຈົ້າການຂອງພະນັກງານຕໍ່ການປະຕິບັດແນວທາງ, ພ້ອມດຽວກັນນີ້, ກໍ່ເພື່ອສ້າງໃຫ້ບັນດາສະມາຊິກພັກ, ພະນັກງານນຳພາ-ຄຸ້ມຄອງມີທັດສະນະຫຼັກໝັ້ນຊົນຊັ້ນໜັກແໜ້ນ, ມີຄຸນສົມບັດສິນທຳປະຕິວັດ ແລະມີແນວຄິດອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ, ມີແບບແຜນດຳລົງຊີວິດປອດໃສ ແລະມີວິທີການເຮັດວຽກທີ່ຖືກຕ້ອງເພື່ອເຮັດໃຫ້ສະມາຊິກພັກ, ພະນັກງານຫຼັກແຫຼ່ງ ສາມາດກຳໄດ້ພື້ນຖານທາງດ້ານທິດສະດີ, ຮູ້ໝູນໃຊ້ທິດສະດີ ເຂົ້າໃນການຊີ້ນຳ-ນຳພາ ວຽກງານຂອງຕົນໄດ້ຢ່າງມີປະສິດທິພາບ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ຄອນສະຫວັນ ແສນຍານຸພາບ