ວັນທີ 5 ກຸມພາ 2021 ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີປິດຊຸດຮຽນທິດສະດີການເມືອງ ແລະການປົກຄອງ ລະບົບຊັ້ນສູງເລັ່ງລັດ 5 ເດືອນຮຸ່ນທີ XXVII ແລະລະບົບປະລິນຍາໂທ ຮຸ່ນທີ XIV, ໂດຍພາຍໃຕ້ການເປັນປະທານຂອງ ທ່ານ ຮສ ພູວົງ ອຸ່ນຄຳແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສະຖາບັນການເມືອງ ແລະການປົກຄອງແຫ່ງຊາດ, ມີຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະໂຄສະນາອົບຮົມສູນກາງພັກ, ມີຫົວໜ້າຫ້ອງການ, ກົມ, ຄະນະຕ່າງໆ, ສູນຂໍ້ມູນຂ່າວສານການເມືອງ ແລະການປົກຄອງ, ສູນຄົ້ນຄວ້າແນວຄິດໄກສອນ ພົມວິຫານ ເຂົ້າຮ່ວມ.
ໃນພິທີ ທ່ານ ປທ ນ. ໄກສອນ ຈັນສີນາ ກຳມະການຄະນະພັກ, ຫົວໜ້າກົມຄຸ້ມຄອງການຮຽນ-ການສອນ ໄດ້ຂຶ້ນຜ່ານບົດສະຫຼຸບລາຍງານ ຜົນສຳເລັດຂອງນັກສຶກສາເປັນຕົ້ນ: ນັກສຶກສາຊັ້ນສູງເລັ່ງລັດ 5 ເດືອນຮຸ່ນທີ XXVII ຈຳນວນ 55 ທ່ານ, ຍິງ 15 ທ່ານ, ໄດ້ຮັບຄະແນນສະສົມເກຼດ A= 19 ທ່ານ, ສະເລ່ຍ34,54%; ໄດ້ຮັບຄະແນນສະສົມເກຼດ B+ = 36 ທ່ານ, ສະເລ່ຍ 65,45% ແລະນັກສຶກສາ ປະລິນຍາໂທ ຮຸ່ນທີ XIV ຈໍານວນ 60 ທ່ານ, ຍິງ 15 ທ່ານໄດ້ຮັບຄະແນນສະສົມເກຼດ A= 17 ທ່ານ, ສະເລ່ຍ2 8,33%, ໄດ້ຮັບຄະແນນສະສົມເກຼດ B+ = 43 ທ່ານ, ສະເລ່ຍ 71,66% ສະຫຼຸບລວມແລ້ວ ນັກສຶກສາທີ່ໄດ້ສຳເລັດການສຶກສາໃນຄັ້ງນີ້ຈຳນວນ 115 ທ່ານ, ຍິງ 30 ທ່ານ ແມ່ນສຳເລັດການຄົ້ນຄວ້າຮ່ຳຮຽນ ແລະເຝິກຝົນຫຼໍ່ຫຼອມຕົນເອງຢູ່ສະຖາບັນ, ນັກສຶກສາທຸກຊັ້ນຮຽນເວົ້າລວມ, ເວົ້າສະເພາະນັກສຶກສາທີ່ໄດ້ຮຽນຈົບຫຼັກສູດການສຶກສາໃນຄັ້ງນີ້ ໄດ້ມີຄວາມຮູ້ໃນລະດັບທີ່ແນ່ນອນ ທາງດ້ານທິດສະດີມາກ-ເລນິນ, ຄວາມຮູ້ດ້ານການປົກຄອງ ແລະບໍລິຫານຢ່າງເປັນລະບົບ ແລະເລິກເຊິ່ງໃນລະດັບດີ. ບົນພື້ນຖານຄວາມຮັບຮູ້ດັ່ງກ່າວມານັ້ນ, ນັກສຶກສາສາມາດປັບປຸງໄດ້ທັດສະນະຫຼັກໝັ້ນດີຂຶ້ນກວ່າເກົ່າ, ປັບປຸງຄວາມເຊື່ອໝັ້ນຕໍ່ການນຳພາຂອງພັກ, ຕໍ່ອຸດົມການ ແລະພາລະກິດປະຕິວັດຂອງພັກເຮົາ. ສະນັ້ນ, ຈຶ່ງເປັນການປຸກລະດົມຄວາມກະຕືລີລົ້ນ, ຄວາມຕັດສິນໃຈສູງ ແລະນ້ຳໃຈຟົດຟື້ນປະຕິວັດເພື່ອກຽມພ້ອມເຮັດສຳເລັດໜ້າທີ່ທີ່ຈະໄດ້ຮັບມອບໝາຍ, ສາມາດຕີລາຄາໄດ້ວ່ານັກສຶກສາທີ່ຈົບຫຼັກສູດໃນຄັ້ງນີ້, ນັກສຶກສາຫຼາຍຄົນໄດ້ເຄື່ອນໄຫວເປັນແບບຢ່າງນຳໜ້າໃນການນຳພາ-ຄຸ້ມຄອງ ແລະການຄົ້ນຄວ້າຮ່ຳຮຽນ, ສາມາດຍາດໄດ້ຄະແນນລະດັບດີເປັນສ່ວນຫຼາຍ ແລະເປັນນັກສຶກສາຮຽນເກັ່ງ-ມີວິໄນດີ, ຄະນະພັກ-ຄະນະຫ້ອງ ແລະຫ້ອງຮຽນດີເດັ່ນມີດັ່ງນີ້:
ໜຶ່ງ: ຜູ້ເຂົ້າຮຽນລະບົບຊັ້ນສູງເລັ່ງລັດ 5 ເດືອນຮຸ່ນທີ XXVII:
– ຄັດເລືອກນັກຮຽນເກັ່ງ ມີວິໄນດີປະເພດທີ I ມີ 17 ທ່ານ, ຍິງ 5 ທ່ານ.
– ຄັດເລືອກນັກຮຽນເກັ່ງ ມີວິໄນດີປະເພດທີ II ມີ 11 ທ່ານ, ຍິງ 2 ທ່ານ.
– ຄັດເລືອກຄະນະພັກ, ຄະນະຫ້ອງຊີ້ນຳນຳພາດີເດັ່ນໄດ້ປະເພດ I.
– ຄັດເລືອກເປັນຫ້ອງຮຽນດີເດັ່ນໄດ້ປະເພດທີ I.
ສອງ: ຜູ້ເຂົ້າຮຽນລະບົບຊັ້ນປະລິນຍາໂທຮຸ່ນທີ XIV:
– ຄັດເລືອກນັກຮຽນເກັ່ງ ມີວິໄນດີປະເພດທີ I ມີ 19 ທ່ານ, ຍິງ 7 ທ່ານ.
– ຄັດເລືອກນັກຮຽນເກັ່ງ ມີວິໄນດີປະເພດທີ II ມີ 22 ທ່ານ, ຍິງ 5 ທ່ານ.
– ຄັດເລືອກນັກຮຽນເກັ່ງ ມີວິໄນດີປະເພດທີ III ມີ 12 ທ່ານ, ຍິງ 3 ທ່ານ.
– ຄັດເລືອກເປັນຫ້ອງຮຽນດີເດັ່ນປະເພດທີ II.
– ຄັດເລືອກຄະນະພັກ, ຄະນະຫ້ອງນຳພາ-ຊີ້ນຳ ດີເດັ່ນປະເພດ I ມີ 3 ທ່ານ ຍິງ 1 ທ່ານ
– ຄັດເລືອກຄະນະພັກ, ຄະນະຫ້ອງຊີ້ນຳນຳພາດີເດັ່ນປະເພດ II ມີ 2 ທ່ານ ຍິງ 0 ທ່ານ
ຂ່າວ: ຕາອັອດ ແສນທະວີສຸກ
ຮູບພາບ ນ. ທິດດາວອນ ດວງປະເສີດ
ບັນນາທິການ: ຄອນສະຫວັນ ແສນຍານຸພາບ