ໂຮງຮຽນການເມືອງ ແລະ ການປົກຄອງ ແຂວງຄຳມ່ວນ ໄດ້ຈັດພິທີສະເຫຼີມສະຫຼອງ ວັນຄູແຫ່ງຊາດ ຄົບຮອບ 32 ປີ (07 ຕຸລາ 1994 – 07 ຕຸລາ 2026) ຂຶ້ນຢ່າງເປັນທາງການ ຊຶ່ງເຕັມໄປດ້ວຍບັນຍາກາດອົບອຸ່ນ ໂດຍການໃຫ້ກຽດເປັນປະທານ ຂອງທ່ານ ແກ້ວວັນໄຊ ສຸກແສນທອງ ກຳມະການພັກແຂວງ, ຫົວໜ້າໂຮງຮຽນການເມືອງ ແລະ ການປົກຄອງແຂວງ. ພ້ອມດ້ວຍພະນັກງານຄູ- ອາຈານ ພາຍໃນໂຮງຮຽນ, ອາຈານຮັບເຊີນ ແລະ ນັກສືກສາທິດສະດີການເມືອງ ຂັ້ນຕົ້ນ ຮຸ່ນທີ IX, ຂັ້ນກາງ ຮຸ່ນທີ VI ເຂົ້າຮ່ວມຢາງພ້ອມພຽງ.
ຈາກນັ້ນ, ທ່ານ ນາງ ວຽງດາວັນ ເພັງສະຫວັນ ໄດ້ຂຶ້ນກ່າວເປີດພິທີ ແລະ ແນະນຳແຂກທີ່ເຂົ້າຮ່ວມ, ດຳເນີນວາລະພີທີ.
ຕໍ່ມາ, ທ່ານ ອຸດອນສຸດທິລາດ ຮອງຫົວໜ້າຄະນະໂຄສະນາອົບຮົມແຂວງຄຳມ່ວນ ໄດ້ຂຶ້ນເລົ່າປະຫວັດຄວາມເປັນມາ ແລະ ຄວາມໝາຍຄວາມສຳຄັນ ຂອງວັນຄູແຫ່ງຊາດ ມີເນື້ອໃນສຳຄັນ ກ່ຽວກັບປະຫວັດ ແລະ ຄວາມໝາຍ ຂອງວັນຄູແຫ່ງຊາດ ດັ່ງນີ້:
– ຈຸດເລີ່ມຕົ້ນ: ໃນສະໄໝທີ່ຝຣັ່ງເຂົ້າມາຍຶດຄອງລາວ (ປີ 1893), ການສຶກສາໃນລາວຍັງບໍ່ທັນຂະຫຍາຍໂຕ ແລະ ມີໂຮງຮຽນພຽງແຕ່ 2 ແຫ່ງເທົ່ານັ້ນ (ຢູ່ຫຼວງພະບາງ ແລະ ວຽງຈັນ).
-ຄູລາວຄົນທຳອິດ: ເພື່ອສ້າງຄູມາສອນເດັກນ້ອຍລາວ, ໃນປີ 1907 ຝຣັ່ງໄດ້ເລືອກເອົາ “ນາຍຄຳ” (ຫຼື ຄູຄຳ) ເຊິ່ງເປັນຄົນລາວທີ່ມີຄວາມຮູ້ ແລະ ຮັກເດັກນ້ອຍ ໃຫ້ເຂົ້າຮຽນອົບຮົມວິຊາຄູ.
-ກຳເນີດວັນທີ 7 ຕຸລາ: ຫຼັງຈາກຮຽນຈົບ, ໃນ ວັນທີ 7 ຕຸລາ ປີ 1907, “ນາຍຄຳ” ໄດ້ເລີ່ມຕົ້ນສອນຢ່າງເປັນທາງການ ເຊິ່ງຖືເປັນຄູລາວຄົນທຳອິດໃນປະຫວັດສາດ.
-ການປະກາດເປັນວັນຄູ: ເພື່ອຈົດຈຳ ແລະ ຮູ້ບຸນຄຸນຂອງຄູ-ອາຈານ (“ແມ່ພິມຂອງຊາດ”), ລັດຖະບານ ລາວ ຈຶ່ງໄດ້ກຳນົດເອົາ ວັນທີ 7 ຕຸລາ ຂອງທຸກໆປີ ເປັນ “ວັນຄູແຫ່ງຊາດ” ໂດຍໄດ້ເລີ່ມຈັດງານສະເຫຼີມສະຫຼອງຄັ້ງທຳອິດໃນປີ 1994.
ຫຼັງຈາກນັ້ນ, ຕ່າງໜ້ານັກສຶກສາຂັ້ນຕົ້ນ ແລະ ຂັ້ນກາງ ໄດ້ຂຶ້ນອ່ານຄຳອວຍພອນ ພ້ອມທັງມອບຂອງຂວັນໃຫ້ແກ່ ຄູ-ອາຈານ ສ້າງຄວາມສາມັກຄີຮັກແພງລະຫວ່າງ ຄູ-ອາຈານ ແລະ ນັກສຶກສາຢ່າງອົບອຸ່ນ.
———————–
ຂ່າວ/ພາບ: ສັນຕິໄຊ ພະຄຸນທອງ
ບັນນາທິການ: ວຽງສະຫວັນ ຈັນທະວິໄຊ