ໃນທ່າມກາງບັນຍາກາດແຫ່ງຄວາມສາມັກຄີ ແລະ ຈິດໃຈເອື້ອເຟື້ອເພື່ອແຜ່, ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ໄດ້ຈັດກິດຈະກຳບໍລິຈາກເລືອດຂຶ້ນຢ່າງເປັນທາງການ ໃນວັນທີ 5 ກຸມພາ 2026. ກິດຈະກຳດັ່ງກ່າວບໍ່ພຽງແຕ່ເປັນການປະຕິບັດຕາມພັນທະ ຂອງພົນລະເມືອງດີເທົ່ານັ້ນ, ແຕ່ຍັງເປັນການສະແດງອອກເຖິງຄວາມຮັບຜິດຊອບຕໍ່ສັງຄົມ ແລະ ມະນຸດສະທຳອັນສູງສົ່ງ ຂອງຄະນະພັກ, ພະນັກງານ, ຄູ-ອາຈານ ແລະ ນັກສຶກສາ ພາຍໃນສະຖາບັນ.
ພິທີດັ່ງກ່າວ ໄດ້ດຳເນີນໄປພາຍໃຕ້ການນຳພາ ຂອງ ທ່ານ ປອ ສາຍຄຳ ມູນມະນີວົງ, ຄະນະບໍລິຫານງານພັກ, ຫົວໜ້າຄະນະປັດຊະຍາ, ທັງເປັນຜູ້ຊີ້ນຳວຽກງານອົງການຈັດຕັ້ງມະຫາຊົນ ຂອງ ສມປຊ. ພ້ອມດຽວກັນນີ້, ຍັງໄດ້ຮັບກຽດເຂົ້າຮ່ວມ ແລະ ອຳນວຍຄວາມສະດວກທາງດ້ານເຕັກນິກວິຊາການໂດຍ ທ່ານ ດຣ ວັນວິລຸນ ໄຊໂກສີ, ຫົວໜ້າພະແນກກວດກາຄຸນນະພາບ ແລະ ຄົ້ນຄວົ້າວິທະຍາສາດ ຈາກສະຖາບັນເລືອດແຫ່ງຊາດ, ອົງການກາແດງລາວ.
ການບໍລິຈາກເລືອດໃນຄັ້ງນີ້ ຖືເປັນກິດຈະກຳທີ່ມີຄວາມໝາຍທາງການເມືອງ ແລະ ສັງຄົມຢ່າງເລິກເຊິ່ງ. ໃນມຸມມອງ ຂອງການຊ່ວຍເຫຼືອສັງຄົມ, ເລືອດແມ່ນຊັບພະຍາກອນທີ່ບໍ່ສາມາດຜະລິດທົດແທນໄດ້ດ້ວຍເຄື່ອງຈັກ ຫຼື ເຕັກໂນໂລຊີໃດໆ, ມັນເກີດມາຈາກຮ່າງກາຍ ແລະ ຈິດໃຈທີ່ເສຍສະລະ ຂອງມະນຸດເທົ່ານັ້ນ. ດັ່ງນັ້ນ, ທຸກຢົດເລືອດທີ່ໄດ້ຮັບການບໍລິຈາກ ຈຶ່ງປຽບສະເໝືອນສາຍທານແຫ່ງຊີວິດ ທີ່ສົ່ງຕໍ່ຄວາມຫວັງໃຫ້ແກ່ຄົນເຈັບທີ່ກຳລັງຕ້ອງການຄວາມຊ່ວຍເຫຼືອຢ່າງຮີບດ່ວນ ບໍ່ວ່າຈະເປັນຜູ້ທີ່ປະສົບອຸບັດຕິເຫດ, ຜ່າຕັດ ຫຼື ຜູ້ປ່ວຍທີ່ມີພະຍາດກ່ຽວກັບເລືອດ.
ທ່ານ ປອ ສາຍຄຳ ມູນມະນີວົງ ໄດ້ເນັ້ນໜັກເຖິງຄວາມສຳຄັນ ຂອງວຽກງານນີ້ວ່າ: ການປຸກລະດົມຂະບວນການບໍລິຈາກເລືອດ ບໍ່ແມ່ນພຽງແຕ່ກິດຈະກຳທາງການແພດ, ແຕ່ມັນແມ່ນການປູກຈິດສຳນຶກໃຫ້ມະຫາຊົນ, ໂດຍສະເພາະແມ່ນນັກສຶກສາທິດສະດີການເມືອງ ໃຫ້ຮູ້ຈັກການ “ໃຫ້” ໂດຍບໍ່ຫວັງຜົນຕອບແທນ. ນີ້ແມ່ນພື້ນຖານ ຂອງຄຸນສົມບັດສິນທຳປະຕິວັດ ແລະ ການຮັບໃຊ້ປະຊາຊົນຢ່າງແທ້ຈິງ. ບັນຍາກາດພາຍໃນງານເຕັມໄປດ້ວຍຮອຍຍິ້ມ ແລະ ຄວາມກະຕືລືລົ້ນ. ບັນດາພະນັກງານ, ຄູ-ອາຈານ ແລະ ນັກສຶກສາ ໄດ້ພ້ອມພຽງກັນເຂົ້າຮ່ວມກວດສຸຂະພາບ ແລະ ບໍລິຈາກເລືອດດ້ວຍຄວາມເຕັມໃຈ. ພາບເຫຼົ່ານີ້ສະທ້ອນໃຫ້ເຫັນເຖິງວັດທະນະທຳການຊ່ວຍເຫຼືອເຊິ່ງກັນ ແລະ ກັນ ທີ່ຝັງເລິກຢູ່ໃນຈິດໃຈ ຂອງປະຊາຊົນລາວ ກໍຄືພະນັກງານ, ຄູ-ອາຈານ ແລະ ນັກສຶກສາ ໃນ ສມປຊ.
ຜ່ານການດຳເນີນງານ, ຂະບວນການບໍລິຈາກເລືອດໃນຄັ້ງນີ້ ສາມາດລະດົມເລືອດໄດ້ທັງໝົດຈຳນວນ 21 ຖົງ. ເຖິງວ່າຕົວເລກອາດຈະເບິ່ງຄືບໍ່ຫຼາຍມະຫາສານ, ແຕ່ເລືອດທັງ 21 ຖົງນີ້ ມີຄຸນຄ່າປະເມີນຄ່າບໍ່ໄດ້ ເພາະມັນສາມາດຊ່ວຍຊີວິດເພື່ອນມະນຸດໄດ້ຢ່າງໜ້ອຍ 21 ຊີວິດ ຫຼື ຫຼາຍກວ່ານັ້ນ ເມື່ອນຳໄປແຍກສ່ວນປະກອບ ຂອງເລືອດ.
ຂ່າວ/ພາບ: ປທ ຕາອັອດ ແສນທະວີສຸກ
ບັນນາທິການ: ປທ ວຽງສະຫວັນ ຈັນທະວິໄຊ