ເພື່ອເປັນການຕີລາຄາຄຸນນະພາບການຮຽນ-ການສອນ ແລະ ຍົກລະດັບຂີດຄວາມສາມາດດ້ານທິດສະດີໃຫ້ແກ່ພະນັກງານຫຼັກແຫຼ່ງ, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີປ້ອງກັນບົດຈົບຂັ້ນໃຫ້ນັກສຶກສາທິດສະດີການເມືອງ-ການປົກຄອງ ຂັ້ນກາງ ຮຸ່ນທີ V ຢ່າງເປັນທາງການ.
ນັກສຶກສາຮຸ່ນດັ່ງກ່າວ ເລີ່ມຮຽນແຕ່ເດືອນ ສິງຫາ 2025 ຫາ ເດືອນ ມັງກອນ 2026 ແມ່ນຄົບຕາມຫຼັກສູດ 6 ເດືອນ, ນັກສຶກສາເຂົ້າຮ່ວມການປ້ອງກັນບົດທັງໝົດ 50 ທ່ານ, ຍິງ 18 ທ່ານ. ນັກສຶກສາທັງໝົດແມ່ນພະນັກງານທີ່ມາຈາກບັນດາກົມກອງ, ອົງການຈັດຕັ້ງລັດ ເຊິ່ງເປັນກຳລັງແຮງສຳຄັນໃນການສືບທອດພາລະກິດປະຕິວັດ ແລະ ການພັດທະນາປະເທດຊາດ. ເນື້ອໃນຂອງການປ້ອງກັນບົດໃນຄັ້ງນີ້ ໄດ້ສຸມໃສ່ 5 ກຸ່ມວິຊາຫຼັກ ທີ່ເປັນພື້ນຖານຂອງການບໍລິຫານລັດ ແລະ ການກໍ່ສ້າງພັກ ປະກອບມີ:
- ກຸ່ມວິຊາປັດຊະຍາ: ເນັ້ນການນຳໃຊ້ໂລກະທັດ ແລະ ວິທີທັດວິທະຍາ ເຂົ້າໃນການວິເຄາະບັນຫາສັງຄົມ.
- ກຸ່ມວິຊາການປົກຄອງ: ສຸມໃສ່ການປັບປຸງກົນໄກການບໍລິຫານລັດໃຫ້ມີປະສິດທິພາບ.
- ກຸ່ມວິຊາການເມືອງ: ຄົ້ນຄວ້າແນວທາງນະໂຍບາຍຂອງພັກ ແລະ ສະພາບການສາກົນ.
- ກຸ່ມວິຊາຄຸ້ມຄອງເສດຖະກິດ: ເນັ້ນການຄຸ້ມຄອງມະຫາພາກ ແລະ ການພັດທະນາເສດຖະກິດແບບຍືນຍົງ.
- ກຸ່ມວິຊາກໍ່ສ້າງພັກ: ສຸມໃສ່ການເພີ່ມທະວີຄວາມເຂັ້ມແຂງຂອງອົງການຈັດຕັ້ງພັກ ແລະ ວຽກງານພະນັກງານ.
ບັນຍາກາດການປ້ອງກັນບົດແມ່ນເຕັມໄປດ້ວຍຄວາມຟົດຟື້ນ ແລະ ເປັນວິຊາການຢ່າງສູງ. ນັກສຶກສາແຕ່ລະທ່ານໄດ້ຂຶ້ນຜ່ານ ບົດສັງລວມຫຍໍ້ ທີ່ໄດ້ຈາກການລົງເກັບກຳຂໍ້ມູນຕົວຈິງ ແລະ ການຄົ້ນຄວ້າທາງທິດສະດີຢ່າງເລິກເຊິ່ງ.ຫຼັງຈາກການນຳສະເໜີ, ຄະນະກຳມະການວິທະຍາສາດ ໄດ້ຕັ້ງຄຳຖາມເຈາະຈີ້ມ ແລະ ແລກປ່ຽນບົດຮຽນຢ່າງກົງໄປກົງມາ. ການສົນທະນາບໍ່ພຽງແຕ່ເປັນການທົດສອບຄວາມຮູ້, ແຕ່ຍັງເປັນການຖອດຖອນບົດຮຽນຕົວຈິງ ເພື່ອໃຫ້ນັກສຶກສາສາມາດນຳເອົາທິດສະດີໄປໝູນໃຊ້ເຂົ້າໃນວຽກງານຕົວຈິງຢູ່ກົມກອງຂອງຕົນຢ່າງປະດິດສ້າງ.
ການປ້ອງກັນບົດຈົບຂັ້ນທິດສະດີໃນຄັ້ງນີ້ ບໍ່ພຽງແຕ່ເປັນການສິ້ນສຸດການສຶກສາຕາມຫຼັກສູດເທົ່ານັ້ນ, ແຕ່ແມ່ນການຢັ້ງຢືນເຖິງຄວາມເຕີບໃຫຍ່ຂະຫຍາຍຕົວຂອງພະນັກງານໃນດ້ານ ຄຸນທາດການເມືອງ ແລະ ລະດັບວິຊາສະເພາະ. ມັນເປັນບາດກ້າວສຳຄັນໃນການສ້າງພະນັກງານ “ສືບທອດ” ທີ່ມີທັງຄຸນສົມບັດສິນທຳປະຕິວັດ ແລະ ຄວາມສາມາດທາງດ້ານສະຕິປັນຍາ ເພື່ອຮັບໃຊ້ຊາດ ແລະ ຮັບໃຊ້ປະຊາຊົນຢ່າງແທ້ຈິງ.
ຂ່າວ/ພາບ : ປທ ຕາອັອດ ແສນທະວີສຸກ
ບັນນາທິການ: ປທ ວຽງສະຫວັນ ຈັນທະວິໄຊ