ດ້ວຍຄວາມຕັ້ງໜ້າໃນການຍົກລະດັບຄຸນນະພາບການຮຽນ-ການສອນ ພ້ອມທັງເຊື່ອມໂຍງທິດສະດີເຂົ້າສູ່ການຈັດຕັ້ງປະຕິບັດຕົວຈິງໃນຍຸກຫັນເປັນດິຈິຕອນ, ສູນຂໍ້ມູນຂ່າວສານການເມືອງ ແລະ ການປົກຄອງ ໄດ້ນຳພານັກສຶກສາປະລິນຍາຕີ ຕໍ່ເນື່ອງ ຮຸ່ນທີ XVI ໃນວັນທີ 4 ພະຈິກ 2026 ແລະ ວັນທີ 6 ພະຈິກ 2026 ນັກສຶກສາປະລິນຍາຕີ ຮຸ່ນທີ XXVII ທັດສະນະສຶກສາ.
ການຈັດຕັ້ງເຄື່ອນໄຫວທັດສະນະສຶກສາຄັ້ງນີ້ ແມ່ນການເຄື່ອນໄຫວອັນມີຄວາມໝາຍຄວາມສຳຄັນ ທີ່ໄດ້ຮັບການຊີ້ນຳ ແລະ ນຳພາໂດຍ ທ່ານ ນາງ ພາວັນ ວິລະວົງ ຫົວໜ້າພະແນກຫໍສະໝຸດ ພ້ອມດ້ວຍຄະນະ, ໂດຍມີຈຸດປະສົງເພື່ອນຳເອົາຄວາມຮູ້ທາງດ້ານວິຊາການທີ່ໄດ້ຮຽນຜ່ານມາໃນ ວິຊາບໍລິຫານຂໍ້ມູນຂ່າວສານ ມາຕໍ່ຍອດ, ເປີດວິໄສທັດ ແລະ ຍົກລະດັບຄວາມຮັບຮູ້ໃນການບໍລິຫານຈັດການຂໍ້ມູນຂ່າວສານຍຸກໃໝ່ ເຊິ່ງຕິດພັນກັບວຽກງານການເມືອງ-ການປົກຄອງ ແລະ ການພັດທະນາເສດຖະກິດ-ສັງຄົມຂອງຊາດ.
ຄະນະໄດ້ນຳພານັກສຶກສາ 2 ຮຸ່ນ ໄປທັດສະນະສຶກສາສະຖານທີ່ 2 ແຫ່ງຄື:
1. ຫໍສະໝຸດແຫ່ງຊາດ ເຊິ່ງເປັນສູນລວມມໍລະດົກທາງວັດທະນະທຳ, ວັນນະຄະດີ ແລະ ຄັງປັນຍາອັນລ້ຳຄ່າຂອງຊາດ. ໂອກາດອັນສະຫງ່າລາສີດັ່ງກ່າວ, ຄະນະນັກສຶກສາໄດ້ຮັບການຕ້ອນຮັບຢ່າງອົບອຸ່ນ ແລະ ສົມກຽດ ຈາກ ທ່ານ ນາງ ສຸຈິດຕາ ດວງມະນີ ຮອງຂະແໜງບໍລິການປະຊາສຳພັນ ຫໍສະໝຸດແຫ່ງຊາດ.
ໃນກອງປະຊຸມແລກປ່ຽນ ແລະ ຢ້ຽມຊົມ, ທ່ານ ນາງ ສຸຈິດຕາ ດວງມະນີ ໄດ້ ຍົກໃຫ້ເຫັນບົດບາດ ແລະ ຄວາມສຳຄັນອັນຍິ່ງໃຫຍ່ຂອງຫໍສະໝຸດແຫ່ງຊາດ ແລະ ເປັນບ່ອນເກັບຮັກສາ, ຄຸ້ມຄອງ, ບໍລິຫານຈັດການຂໍ້ມູນຂ່າວສານ, ເອກະສານປະຫວັດສາດ ແລະ ວັນນະຄະດີອັນຊົງຄຸນຄ່າ ພ້ອມທັງການຫັນເປັນດິຈິຕອນເພື່ອຮັບໃຊ້ສັງຄົມ.
ການບໍລິຫານຂໍ້ມູນຂ່າວສານ ແລະ ຫໍສະໝຸດແຫ່ງຊາດ ຖືເປັນ “ປ້ອມປາການທາງດ້ານແນວຄິດ ແລະ ວັດທະນະທຳ” ທີ່ຊ່ວຍປົກປ້ອງມູນເຊື້ອອັນດີງາມຂອງຊາດ, ສົ່ງເສີມການຮຽນຮູ້ຕະຫຼອດຊີວິດຂອງພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ. ນັກສຶກສາໄດ້ມີໂອກາດຮຽນຮູ້ຂະບວນການຈັດໝວດໝູ່, ການອະນຸລັກເອກະສານເກົ່າແກ່, ລະບົບຖານຂໍ້ມູນຫໍສະໝຸດສະໄໝໃໝ່ ແລະ ວິທີການເຜີຍແຜ່ຂໍ້ມູນຂ່າວສານທີ່ຖືກຕ້ອງທ່ຽງຕົງ ເຊິ່ງເປັນອາວຸດທາງປັນຍາອັນແຫຼມຄົມໃນການຕ້ານກັບกระแสຂໍ້ມູນຂ່າວສານທີ່ບິດເບືອນໃນຍຸກປະຈຸບັນ.
2. ທັດສະນະສຶກສາ ທີ່ ບໍລິສັດ ດາວທຽມລາວ ເອເຊຍ-ປາຊິຟິກ ຈຳກັດ ເຊິ່ງເປັນໜຶ່ງໃນບັນດາໂຄງການຍຸດທະສາດລະດັບຊາດ ທີ່ສະແດງເຖິງຄວາມກ້າວໜ້າທາງດ້ານວິທະຍາສາດ-ເຕັກໂນໂລຊີ ແລະ ການຮັກສາອະທິປະໄຕຂອງ ສປປ ລາວ ໃນຂົງເຂດອາວະກາດ ແລະ ໂທລະຄົມມະນາຄົມ.
ການລົງຢ້ຽມຊົມຄັ້ງນີ້, ຄະນະໄດ້ຮັບກຽດຕ້ອນຮັບຢ່າງອົບອຸ່ນຈາກ ທ່ານ ສີສັນ ປອງນະທີ ຮອງຜູ້ອຳນວຍການໃຫຍ່ ບໍລິສັດ ດາວທຽມລາວ ເອເຊຍ-ປາຊິຟິກ ຈຳກັດ ພ້ອມດ້ວຍທີມງານວິຊາການ ທີ່ໄດ້ ບັນຍາຍ ແລະ ນຳພາ ຢ້ຽມຊົມສູນຄວບຄຸມດາວທຽມຕົວຈິງ.
ເຕັກໂນໂລຊີດາວທຽມ ເປັນ “ສັນຍາລັກແຫ່ງເອກະລາດ, ອະທິປະໄຕ ແລະ ຄວາມສາມາດເປັນເຈົ້າຕົນເອງ” ຂອງພັກ ແລະ ລັດຖະບານ ສປປ ລາວ ໃນເວທີພາກພື້ນ ແລະ ສາກົນ. ການບໍລິຫານຂໍ້ມູນຂ່າວສານມະຫາສານ: ການຮັບ-ສົ່ງສັນຍານ, ການກະຈາຍສຽງ-ກະຈາຍພາບ ແລະ ການເຊື່ອມຕໍ່ອິນເຕີເນັດຄວາມໄວສູງທີ່ກວມເອົາທົ່ວປະເທດ, ໂດຍສະເພາະການເຂົ້າເຖິງເຂດຫ່າງໄກສອກຫຼີກ ເພື່ອຮັບປະກັນໃຫ້ປະຊາຊົນທຸກທົ່ວໜ້າໄດ້ຮັບຮູ້ແນວທາງນະໂຍບາຍຂອງພັກ ແລະ ລົດຊ່ອງຫວ່າງທາງຂໍ້ມູນຂ່າວສານ.ຄວາມໝັ້ນຄົງປອດໄພທາງໄຊເບີ້, ການປົກປ້ອງຖານຂໍ້ມູນ ແລະ ໂຄງສ້າງພື້ນຖານດິຈິຕອນຂອງຊາດ ຈາກການຄຸກຄາມຮູບແບບໃໝ່ ແລະການເຊື່ອມໂຍງວິຊາການທີ່ສອດຄ່ອງໂດຍກົງກັບເນື້ອໃນວິຊາບໍລິຫານຂໍ້ມູນຂ່າວສານ ທີ່ນັກສຶກສາໄດ້ຮຽນມາ ເຊັ່ນ: ການຄຸ້ມຄອງລະບົບຖານຂໍ້ມູນ, ການໄຫຼວຽນຂອງຂໍ້ມູນຂ່າວສານທີ່ມີຄວາມປອດໄພ ແລະ ມີປະສິດທິພາບສູງ.
ການທັດສະນະສຶກສາໃນຄັ້ງນີ້ ຖືເປັນບາດກ້າວບຸກທະລຸອັນສຳຄັນ ໃນການຈັດຕັ້ງປະຕິບັດຫຼັກສູດການຮຽນ-ການສອນຂອງ ສູນຂໍ້ມູນຂ່າວສານການເມືອງ ແລະ ການປົກຄອງ ທີ່ເນັ້ນໜັກ “ທິດສະດີຕິດພັນກັບການປະຕິບັດຕົວຈິງ, ໂຮງຮຽນຕິດພັນກັບສັງຄົມ ແລະ ຫົວໜ່ວຍການຜະລິດ-ທຸລະກິດ”. ຜ່ານການລົງ 2 ຈຸດໝາຍຍຸດທະສາດດັ່ງກ່າວ, ນັກສຶກສາປະລິນຍາຕີ ຮຸ່ນທີ XXVII ແລະ ປະລິນຍາຕີ ຕໍ່ເນື່ອງ ຮຸ່ນທີ XVI ໄດ້ເຫັນພາບຕົວຈິງຂອງການນຳໃຊ້ເຕັກໂນໂລຊີ ແລະ ລະບົບຂໍ້ມູນຂ່າວສານເຂົ້າໃນການຮັບໃຊ້ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ໃນຕອນທ້າຍຂອງການທັດສະນະສຶກສາ, ຕາງໜ້າໃຫ້ແກ່ນັກສຶກສາທັງໝົດ ໄດ້ສະແດງຄວາມຂອບໃຈຢ່າງເລິກເຊິ່ງຕໍ່ການນຳພາອັນໃກ້ຊິດຂອງ ທ່ານ ນາງ ພາວັນ ວິລະວົງ ຫົວໜ້າພະແນກຫໍສະໝຸດ ພ້ອມດ້ວຍຄະນະອຳນວຍການສູນ, ຕະຫຼອດຈົນເຖິງການຕ້ອນຮັບຢ່າງອົບອຸ່ນຈາກ ຫໍສະໝຸດແຫ່ງຊາດ ແລະ ບໍລິສັດ ດາວທຽມລາວ ເອເຊຍ-ປາຊິຟິກ ຈຳກັດ ທີ່ໄດ້ອຳນວຍຄວາມສະດວກ ແລະ ຖ່າຍທອດບົດຮຽນອັນລ້ຳຄ່າ ເຊິ່ງຈະເປັນເຂັມຊີ້ທິດທາງໃຫ້ແກ່ນັກສຶກສາໃນການກະກຽມຄວາມພ້ອມເປັນປັນຍາຊົນຮຸ່ນສືບທອດທີ່ມີຄຸນນະພາບສູງ, ມີຄວາມຮູ້ຄວາມສາມາດ ແລະ ມີຈັນຍາບັນໃນການບໍລິຫານຈັດການຂໍ້ມູນຂ່າວສານ ເພື່ອຮັບໃຊ້ປະເທດຊາດໃນອະນາຄົດ.
————————————
ຂ່າວ: ຕາອັອດ ແສນທະວີສຸກ
ຮູບພາບ: ນາງ ສະຫງວນ ແກ້ວດວງຕາ ແລະ ແສງສະໝຸດ ແສງວັນ
ບັນນາທິການ: ບຸນປັນ ສຸມຸນທອງ