ໃນຕອນເຊົ້າ ຂອງວັນທີ 17 ກໍລະກົດ 2026 ຢູ່ໂຮງຮຽນທິດສະດີການເມືອງ ແລະການປົກຄອງແຂວງໄຊຍະບຸລີ ໄດ້ເປີດກອງປະຊຸມຖອດຖອນບົດຮຽນການຄຸ້ມຄອງຊຸດຮຽນທິດສະດີການເມືອງຂັ້ນຕົ້ນ ຮຸ່ນທີ VI ແລະ ຂັ້ນກາງ ຮຸ່ນທີ IV ໂດຍການເປັນປະທານ ຂອງທ່ານ ນາງ ນຸດຈີລາ ພົນຈະເລີນ ກຳມະການພັກແຂວງ, ຫົວໜ້າໂຮງຮຽນການເມືອງ ແລະການປົກຄອງ ແຂວງໄຊຍະບູລີ ພ້ອມດ້ວຍຄະນະພັກ-ຄະນະນຳ ຂອງໂຮງຮຽນ, ຄູອາຈານຮັບເຊີນ ແລະພະນັກງານ-ຄູອາຈານ ພາຍໃນໂຮງຮຽນ ກໍໄດ້ເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວ ທ່ານ ປທ ສີສົມພອນ ລັກຊີວີ ກໍໄດ້ຂຶ້ນຜ່ານບົດສະຫຼຸບການດຳເນີນຊຸດຮຽນທິດສະດີຂັ້ນຕົ້ນ ຮຸ່ນທີ VI ແລະຂັ້ນກາງຮຸ່ນທີ IV ໂຮງຮຽນການເມືອງແລະການປົກຄອງແຂວງໄຊຍະບູລີ ມີຄູອາຈານທັງໝົດ 18 ສະຫາຍ, ຍິງ 5 ສະຫາຍ, ໃນນີ້, ມີຄູອາຈານຮັບເຊີນ 5 ສະຫາຍ, ຍິງ 2 ສະຫາຍ, ນັກສືກສາຂັ້ນຕົ້ນ ຮຸ່ນທີ VI ມີ 47 ສະຫາຍ, ຍິງ 19 ສະຫາຍ ແລະຂັ້ນກາງ ຮຸ່ນທີ IV ມີ 51 ສະຫາຍ, ຍິງ 12 ສະຫາຍ, ຊຸດຮຽນທິດສະດີການເມືອງຂັ້ນຕົ້ນ ຮຸ່ນທີ VI ແມ່ນເລີ່ມຮຽນແຕ່ວັນທີ 13 ສິງຫາ 2025 ຫາວັນທີ 28 ພະຈິກ 2025 ມີ 14 ອາທິດ (3 ເດືອນ) ແລະຂັ້ນກາງເລີ່ມຮຽນແຕ່ວັນທີ 25 ສິງຫາ 2025 ຫາວັນທີ 13 ກຸມພາ 2026 ໃຊ້ເວລາຮຽນ 6 ເດືອນມີ 24 ອາທິດ.
ການຈັດຕັ້ງປະຕິບັດໂຄງການຫຼັກສູດຊຸດຮຽນຂັ້ນຕົ້ນ ໄດ້ປະຕິບັດຕາມໂຄງການຫຼັກສູດການຮຽນ-ການສອນ ຢ່າງຕໍ່ເນື່ອງ ມີວີຊາຮຽນທັງໝົດ 11 ວິຊາ, ໃຊ້ເວລາຮຽນຕົວຈິງ 494 ຊົ່ວໂມງໂດຍປະຕິບັດຂອດຮຽນຕ່າງໆ ຕາມໂຄງການຫຼັກສູດຢ່າງຄົບຖ້ວນ; ໃນຊຸດຮຽນນີ້ ມີອາຈານສິດສອນທັງໝົດຈຳນວນ 23 ທ່ານ, ຍິງ 4 ທ່ານ, ໄດ້ເຊື້ອເຊີນຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກການອ້ອມຂ້າງແຂວງ ມາຂຶ້ນຫ້ອງລາຍງານເພີ່ມ ຈໍານວນ 9 ທ່ານ, ຍິງ 1 ທ່ານ.
ຊຸດຮຽນທິດສະດີການເມືອງຂັ້ນກາງ ຮຸ່ນທີ IV ໄດ້ໃຊ້ເວລາຮຽນ 6 ເດືອນ ມີວິຊາຮຽນທັງໝົດ 14 ວິຊາ, ແບ່ງອອກເປັນ 7 ກຸ່ມວິຊາຮຽນ ເຊິ່ງໄດ້ຈັດຕັ້ງປະຕິບັດບັນດາຂອດຮຽນຕ່າງໆຢ່າງເຂັ້ມງວດເຊັ່ນ; ຂື້ນຫ້ອງບັນຍາຍ, ກຽມສະມະນາ,ແກ້ຂໍ້ຂ້ອງໃຈ, ທວນເສັງ, ສອບເສັງຂຽນ, ຂຽນບົດລາຍງານ, ສອບເສັງປາກເປົ່າ, ລາຍງານເພີ່ມ, ລົງສະໜາມ, ທັດສະນະສືກສາ, ຂຽນບົດເກັບກ່ຽວ, ປ້ອງກັນໂຄງຮ່າງ, ແນະນຳການຂຽນບົດ ຊຶ່ງໃຊ້ເວລາຮຽນຕົວຈິງ 536 ຊົ່ວໂມງ.
ການຄຸ້ມຄອງການຮຽນ-ການສອນ ໄດ້ສ້າງແຜນການຮຽນ-ການສອນ ເຜີຍແຜ່ຕິດຕາມກວດກາການປະຕິບັດລະບຽບການຕ່າງໆໂດຍມີການປະສານສົມທົບກັບຄູປະຈຳຫ້ອງເປັນຕົ້ນກອນການເຂົ້າຮຽນເປັນປົກກະຕິ (ປະຖົມນິເທດ) ຄຸ້ມຄອງສະຖິຕິນັກສຶກສາ ສະເໜີຕໍ່ກັບ ສະຖາບັນການເມືອງ ແລະ ການປົກຄອງແຫ່ງຊາດ ກ່ຽວກັບການເປີດ-ປິດຊຸດຮຽນ ຂໍອອກໃບຢັ້ງຢືນ ສົມທົບກັບຄູປະຈຳຫ້ອງຈັດຕັ້ງຫ້ອງ, ເປັນເຈົ້າການປະສານສົມທົບກັບຄູປະຈຳຫ້ອງ ແລະ ຫ້ອງການເພື່ອນຳພານັກສຶກສາຂັ້ນຕົ້ນໄປທັດສະນະ ຢູ່ພາຍໃນເມືອງໄຊຍະບູລີ ແລະ ຂັ້ນກາງໄປທັດສະນະສືກສາ ຢູ່ເມືອງຫົງສາ ຕາມເງື່ອນໄຂ ແລະຄວາມສາມາດຂອງນັກສຶກສາ, ຕິດຕາມກວດກາການປະຕິບັດນະໂຍບາຍໃນການຂໍລາພັກ, ການລົງທະບຽນຮຽນຄືນ ຂອງນັກສຶກສາທີ່ຂາດຊົ່ວໂມງບັນຍາຍ ເກີນ 5% ໄດ້ຕິດຕາມການຂຶ້ນຫ້ອງຮຽນ ຂອງນັກສຶກສາ ແລະຄູອາຈານແຕ່ລະມື້, ແຕ່ລະອາທິດ ເພື່ອຄຸ້ມຄອງການຮຽນ-ການສອນ ຂອງນັກສຶກສາ; ໄດ້ຄຸ້ມຄອງ, ຕິດຕາມ,ກວດກາການໃຫ້ຄະແນນສ່ວນຮ່ວມຄະແນນສອບເສັງຕາມລະບຽບການ ພ້ອມທັງສັງລວມຈັດລະດັບຄ່າຄະແນນສອບເສັງເປັນເກຼດ ເຊິ່ງສະຫຼຸບໄດ້ຄະແນນດັ່ງນີ້: ຂັ້ນຕົ້ນ ເກຼດ A ມີ 30 ສະຫາຍ, ຍິງ 11 ສະຫາຍ ກວມ 64%, ເກຼດ B+ ມີ 17 ສະຫາຍ, ຍິງ 8 ສະຫາຍ ກວມ 36 %; ຂັ້ນກາງ ເກຼດ A ມີ 17 ສະຫາຍເທົ່າກັບ 34% ເກຼດ B+ມີ 34 ສະຫາຍເທົ່າກັບ 67%. ພ້ອມນັ້ນ, ຍັງໄດ້ປະຕິບັດນະໂຍບາຍຍ້ອງຍໍໃຫ້ແກ່ນັກສຶກສາ ຕາມມາດຖານທີ່ໄດ້ກຳນົດໃນລະບຽບຄຸ້ມຄອງນັກສຶກສາ ຄື: ຂັ້ນຕົ້ນ ມີຜູ້ໄດ້ຮັບໃບຍ້ອງຍໍ 13 ສະຫາຍ, ຍິງ 5 ສະຫາຍ, ໃບຊົມເຊີຍ 10 ສະຫາຍ, ຍິງ 3 ສະຫາຍ; ຂັ້ນກາງ ມີຜູ້ໄດ້ຮັບໃບຍ້ອງຍໍ 20 ສະຫາຍ, ຍິງ 7 ສະຫາຍ, ໃບຊົມເຊີຍ 11 ສະຫາຍ, ຍິງ 2 ສະຫາຍ.
ຂ່າວ/ພາບ: ວັດທະນາ ພັນລັກ
ບັນນາໂດຍ: ວຽງສະຫວັນ ຈັນທະວິໄຊ