ເພື່ອເປັນການຈັດຕັ້ງປະຕິບັດ ແລະຜັນຂະຫຍາຍແຜນດຳເນີນງານຂອງຄະນະໜ່ວຍພັກ ປທ ຮຸ່ນ XVII ຫ້ອງ ກ ໃຫ້ໄດ້ຮັບຄຸນນະພາບ ແລະ ສອດຄ່ອງກັບຫຼັກສູດການຮຽນ-ການສອນ ຂອງ ສມປຊ ວາງອອກຢ່າງເຂັ້ມງວດ ເພື່ອຕອບສະໜອງຄວາມຮຽກຕ້ອງການ ໃນເງື່ອນໄຂໃໝ່, ສາມາດເພີ່ມທະວີການນຳພາ-ຊີ້ນໍາ, ການຈັດຕັ້ງປະຕິບັດແນວທາງນະໂຍບາຍຕ່າງໆ ໃຫ້ປະສົບຜົນສຳເລັດຕາມລະດັບ​ຄາດ​ທີ່ວາງໄວ້ ແລະສ້າງໃຫ້ໄດ້ພື້ນຖານການເມືອງອັນໜັກແໜ້ນ. ສະນັ້ນ, ມື້​ນີ້ ໜ່ວຍພັກນັກຄົ້ນຄວ້າ ປທ XVII ຫ້ອງ ກ ຈຶ່ງໄດ້ດຳເນີນກອງປະຊຸມ ສະຫຼຸບຕີລາຄາຄືນການຈັດຕັ້ງເຄື່ອນໄຫວວຽກງານພາຍ 3 ເດືອນຜ່ານມາ, ທິດທາງແຜນການໃນປີຕໍ່ໜ້າຂຶ້ນໃນວັນທີ 21 ມັງກອນ 2022 ໂດຍການເປັນ ປະທານຂອງ ສະຫາຍ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຕາງໜ້າກົມຈັດຕັ້ງ-ພະນັກງານ, ຄູປະຈຳຫ້ອງ ແລະຕາງໜ້າໜ່ວຍພັກຮາກຖານ ນັກສຶກສາ.

ສະຫາຍ ແກ້ວຕາ ຍະວົງສາ ເລຂາໜ່ວຍພັກຮາກຖານນັກຄົ້ນຄວ້າ ປທ XVII ຫ້ອງ ກ ​ຂຶ້ນ​ກ່າວ​​ເປີດກອງ​ປະຊຸມຄັ້ງນີ້​ຢ່າງ​ເປັນ​ທາງ​ການ ແລະຜ່ານຮ່າງບົດສະຫຼຸບການເຄື່ອນໄຫວນຳພາ-ຊີ້ນຳໃນໄລຍະ 3 ເດືອນຜ່ານມາ ແລະທິດທາງແຜນການປີ 2022 ຊຶ່ງເນື້ອໃນ ສະຫາຍໄດ້ຍົກໃຫ້ເຫັນວ່າ: ສະພາບການຮຽນ-ການສອນ ຂອງພວກເຮົາໃນໄລຍະຜ່ານມາແມ່ນໄດ້ຜ່ານຜ່າຄວາມຫຍຸ່ງຍາກນາໆປະການເປັນຕົ້ນແມ່ນ: ການແຜ່ລະບາດຂອງພະຍາດໂຄວິດ 19 ໄດ້ແຜ່ລະບາດໄປໃນວົງກວ້າງ ທີ່ສົ່ງຜົນກະທົບຕໍ່ການຮຽນຂອງພວກເຮົາ. ເຖິງຢ່າງໃດກໍ່ຕາມພາຍໃຕ້ການນຳພາ-ຊີ້ນຳຈາກຄະນະພັກ, ຄະນະນໍາສະຖາບັນການເມືອງ ແລະ ການປົກຄອງແຫ່ງຊາດ; ຄະນະໜ່ວຍພັກ, ສະມາຊິກພັກທຸກສະຫາຍກໍໄດ້ສຸມໃສ່ຍົກສູງຄວາມຮັບຜິດຊອບເຝົ້າລະວັງ ແລະປະຕິບັດຕາມມາດຕະການຂອງຂັ້ນເທິງຢ່າງເຂັ້ມງວດ, ການນໍາພາ-ຊີ້ນໍາສະມາຊິກພັກເຂົ້າຮ່ວມພິທີສະເຫຼີມສະຫຼອງວັນສຳຄັນຕ່າງໆຂອງພັກ, ຂອງຊາດ ແລະເຊື່ອມຊຶມບັນດາເອກະສານສໍາຄັນຕ່າງໆທີ່ທາງສະຖາບັນການເມືອງ ແລະ ການປົກຄອງແຫ່ງຊາດ, ຫ້ອງຮຽນໄດ້ຕັ້ງການເຊື່ອມຊືມຂຶ້ນ 02 ຄັ້ງ, ມີຜູ້ເຂົ້າຮ່ວມ 120 ສະຫາຍ ແລະຄະນະໜ່ວຍພັກໄດ້ຈັດຕັ້ງເຊື່ອມຊືມ-ເຜີຍແຜ່ແຈ້ງການພາຍໃນຫ້ອງຮຽນໄດ້ 02 ຄັ້ງຊຶ່ງມີຜູ້ເຂົ້າຮ່ວມ 120 ສະຫາຍ.

ໃນພິທີ, ຄະນະໜ່ວຍພັກຊຸດເກົ່າຂຶ້ນຜ່ານບົດສຳຫຼວດ ການນຳພາ-ຊີ້ນໍາລວມຂອງຄະນະໜ່ວຍພັກທີ່ຜ່ານມາ, ໂດຍໄດ້ຕີລາຄາສູງຕໍ່ຄວາມພະຍາຍາມໃນການນຳພາ-ຊີ້ນໍາ ຂອງຄະນະໜ່ວຍພັກຊຸດຜ່ານມາ, ເຊິ່ງການນຳພາ-ຊີ້ນໍາຂອງໜ່ວຍພັກໃນໄລຍະ 3 ເດືອນຜ່ານມາ ເຖິງແມ່ນວ່າຈະເປັນໄລຍະສັ້ນໆກໍ່ຕາມແຕ່ກໍ່ໄດ້ເຮັດສຳເລັດວຽກງານໄດ້ຫຼາຍດ້ານຊຶ່ງຜົນງານດັ່ງກ່າວເປັນໄດ້ໜໍ່ແໜງອັນດີ ແລະເປັນການເອກອ້າງໃຫ້ເຫັນເຖິງຜົນສຳເລັດອັນຕັ້ງໜ້າໃນເບື້ອງຕົ້ນຂອງໜ່ວຍພັກ, ຕາມທິດທາງຄາດໝາຍທີ່ໄດ້ກຳນົດໄວ້ ໃນມະຕິກອງປະຊຸມຂອງອົງຄະນະພັກ ສມປຊ ຜ່ານມາ.

ຫຼັງຈາກນັ້ນ ທີ່ປະຊຸມໄດ້ພ້ອມກັນໃຊ້ສິດ ປະຊາທິປະໄຕ ຂອງຕົນປ່ອນບັດເລືອກຕັ້ງເອົາຄະນະໜ່ວຍຊຸດໃໝ່ບົນພື້ນຖານຫຼັກການລວມສູນປະຊາທິປະໄຕ, ທັງຖືກຕ້ອງສອດຄ່ອງກັບມາດຖານເງື່ອນໄຂ ທີ່ກຳນົດໄວ້ຊື່ງມີຜູ້ອອກຮັບສະໝັກເລືອກຕັ້ງຈຳນວນ 07 ສະຫາຍ, ຍິງ 2 ສະຫາຍ; ຊຶ່ງຜ່ານການປ່ອນບັດ ໄດ້ເລືອກເອົາ 05 ສະຫາຍ, ຍິງ 1 ສະຫາຍ ແລະຜົນກອງປະຊຸມປະຖົມມະລືກໄດ້ຕົກລົງເປັນເອກະພາບກັນເລືອກເອົາດັ່ງນີ້:

          1) ສະຫາຍ ສີພອນ ມິດໄມຕີ                 ເປັນເລຂາໜ່ວຍພັກ

          2) ສະຫາຍ ບຸນທະວີ ສີຫາວົງ                ເປັນຮອງເລຂາໜ່ວຍພັກ, ປະທານກວດກາໜ່ວຍພັກ

          3) ສະຫາຍ ນ. ຈັນສອນ ສີມະໂນວົງ         ເປັນກຳມະການໜ່ວຍພັກ

          4) ສະຫາຍ ແກ້ວຕາ ຍະວົງສາ                ເປັນຄະນະຫ້ອງ

          5) ສະຫາຍ ເກດ ແສງຄຳຢອງ                ເປັນຄະນະຫ້ອງ

ກອງປະຊຸມໄດ້ຮັບກຽດຟັງການໂອ້ລົມ ຂອງສະຫາຍ ຮສ ພູວົງ ອຸ່ນຄຳແສນ ຊຶ່ງທ່ານໄດ້ຍ້ອງຍໍຊົມເຊີຍຕໍ່ຜົນງານຂອງຄະນະໜ່ວຍພັກຊຸດເກົ່າ ກໍ່ຄືສະມາຊິກພັກທຸກສະຫາຍ ຍາດມາໄດ້ໃນໄລຍະ 3 ເດືອນທີ່ຜ່ານມາ, ພ້ອມກັນນັ້ນສະຫາຍຍັງໄດ້ໃຫ້ທິດຊີ້ນຳເພື່ອສືບຕໍ່ເສີມຂະຫຍາຍດ້ານດີທີ່ຕັ້ງໜ້າ ແລະປັບປຸງ ແກ້ໄຂດ້ານອ່ອນ-ຂໍ້ຄົງຄ້າງ ແຕ່ລະດ້ານໃຫ້ຕົກໄປ ແລະຮຽກຮ້ອງໃຫ້ຄະນະພັກຊຸດໃໝ່ສືບຕໍ່ນຳພາ-ຊີ້ນຳ ຈັດຕັ້ງຜັນຂະຫຍາຍ ແລະປະຕິບັດມະຕິກອງປະຊຸມໃຫຍ່ຄັ້ງນີ້ໃຫ້ສຳເລັດຜົນ, ໃຫ້ສອດຄ່ອງຕາມມະຕິກອງປະຊຸມໃຫຍ່ ກໍ່ຄືແຜນຍຸດທະສາດການສຶກສາຂອງ ສມປຊ ເວົ້າລວມ, ເວົ້າສະເພາະແມ່ນວຽກງານການສຶກສາ ຂອງນັກຄົ້ນຄວ້າປະລິນຍາໂທ ຮຸ່ນທີ XVII ຫ້ອງ ກ ໃຫ້ມີຜົນສຳເລັດຕາມແຜນການທີ່ໄດ້ກຳນົດ.

ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ