ກອງປະຊຸມສະຫຼຸບຖອດຖອນບົດຮຽນຜູ້ບໍລິຫານ-ຄຸ້ມຄອງ ໂຮງຮຽນການເມືອງ-ການປົກຄອງແຂວງ ແລະ ນະຄອນຫຼວງວຽງຈັນ ປະຈຳສົກປີ 2018-2019

ໃນຕອນເຊົ້າຂອງວັນທີ 2 ກັນຍາ 2019 ນີ້, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດກອງປະຊຸມສະຫຼຸບຖອດຖອນບົດຮຽນຜູ້ບໍລິຫານ-ຄຸ້ມຄອງໂຮງຮຽນການເມືອງ-ການປົກຄອງແຂວງ ແລະ ນະຄອນຫຼວງວຽງຈັນ ປະຈຳສົກປີ 2018-2019 ຂຶ້ນທີ່ ໂຮງຮຽນການເມືອງ-ການປົົກຄອງແຂວງເຊກອງ,  ໂດຍໃຫ້ກຽດເຂົ້າຮ່ວມເປັນຄະນະປະທານຂອງທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ, ສະມາຊິກສະພາແຫ່ງຊາດຊຸດທີ 8 , ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະການປົກຄອງແຫ່ງຊາດ ພ້ອມດ້ວຍ ທ່ານ ຄຳເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ ເຈົ້າແຂວງເຊກອງ, ມີບັນດາຄະນະບໍລິຫານງານພັກ, ຮອງຫົວໜ້າ ສະຖາບັນການເມືອງ ແລະ ການປົກຄອງແຫ່ງຊາດ, ຫົວໜ້າກົມ, ຫົວໜ້າຄະນະວິຊາ, ສູນຂໍ້ມຸນຂ່າວສານ, ຫ້ອງການ ແລະ ບັນດາຜູ້ອໍານວຍການ, ຮອງອໍານວຍການ, ພະນັກງານ, ຄູ-ອາຈານຈາກໂຮງຮຽນການເມືອງ-ການປົກຄອງທ້ອງຖິ່ນທົ່ວປະເທດເຂົ້າຮ່ວມຢ່າງພ້ອມພຽງກວ່າ 57ຄົນ.

 ເຊິ່ງກອງປະຊຸມຈະໄດ້ດໍາເນີນເປັນເວລາ 5 ວັນຄືເລີ່ມຕັ້ງແຕ່ວັນທີ 2-6 ກັນຍາ 2019, ໃນໂອກາດດັ່ງກ່າວນີ້  ທ່ານ ຄຳເຜີຍ ບຸດດາວຽງ ໄດ້ໃຫ້ກຽດກ່າວຕ້ອນຮັບບັນດາຜູ້ແທນກອງປະຊຸມທີ່ເດີນທາງມາຈາກສູນກາງ ແລະ ບັນດາໂຮງຮຽນການເມືອງ-ການປົກຄອງແຂວງ, ນະຄອນຫຼວງວຽງຈັນ ດ້ວຍຄວາມອົບອຸ່ນ, ພ້ອມທັງສະແດງຄວາມຍ້ອງຍໍຊົມເຊີຍຄະນະພັກ, ຄະນະນຳ ສມປຊ ກໍຄືຜູ້ແທນກອງປະຊຸມທີ່ໃຫ້ຄວາມໄວ້ເນື້ອເຊື່ອໃຈ, ມອບໝາຍໜ້າທີ່ອັນມີກຽດ ແລະ ສູງສົ່ງ ໃຫ້ແຂວງເຊກອງເປັນເຈົ້າພາບໃນການຈັດກອງປະຊຸມໃນຄັ້ງນີ້. ພ້ອມນັ້ນ, ທ່ານ ຮສ ປອ ທອງສະລິດ ມັງໜໍ່ເມກ ຍັງໃຫ້ກຽດຂຶ້ນກ່າວເປີດກອງປະຊຸມຢ່າງເປັນທາງການ.

ກອງປະຊຸມໄດ້ຮັບຟັງການລາຍງານ ທ່ານ ປອ ນ ໄກສອນ ຈັນສີນາ ວ່າການຫົວໜ້າກົມຄຸ້ມຄອງການຮຽນ-ການສອນ ສະຖາບັນການເມືອງ ແລະ ການປົກຄອແຫ່ງຊາດ ກ່ຽວກັບການຈັດຕັ້ງປະຕິບັດຫຼັກສູດການຮຽນ-ການສອນຢູ່ໂຮງຮຽນການເມືອງ-ການປົກຄອງທ້ອງຖິ່ນທົ່ວປະເທດ ແລະ ນະຄອນຫຼວງ ປະຈຳສົກປີ 2018-2019  ພ້ອມທັງຜ່ານທິດທາງແຜນການຮຽນ-ການສອນປະຈຳສົກປີ 2019-2020. ເຊິ່ງເນື້ອໃນບົດສະຫຼຸບໄດ້ຍົກໃຫ້ເຫັນຄວາມເອົາໃຈໃສ່ຂອງຄະນະພັກ, ຄະນະນຳສະຖາບັນ ທີ່ຍາມໃດກໍໄດ້ຊຸກຍູ້ ແລະຕິດຕາມ, ກວດກາປະເມີນຜົນຢ່າງໃກ້ຊິດ. ສະນັ້ນ, ຈຶ່ງເຮັດໃຫ້ໂຮງຮຽນການເມືອງ-ການປົກຄອງແຂວງ, ນະຄອນຫຼວງວຽງຈັນ ຍາດມາໄດ້ ຜົນສຳເລັດໃນຫຼາຍດ້ານ ເປັນຕົ້ນແມ່ນສາມາດດຳເນີນການຮຽນ-ການສອນລະບົບອະນຸປະລິນຍາ, ລະບົບຊັ້ນກາງ, ລະບົບຊັ້ນຕົ້ນ, ລະບົບ 45 ວັນ ແລະ ລະບົບ 10 ວັນໃຫ້ເລຂາພັກບ້ານ ແລະ ຄະນະພັກບ້ານ ທັງ​ໝົດມີ ​174 ຊຸດ​ຮຽນ, ມີຜູ້ເຂົ້າ​ຮຽນ​ທັງ​ໝົດ 9,415 ຄົນ, ຍິງ 2,275 ຄົນ. ໃນນັ້ນ, ການເຝິກອົບຮົມເລຂາພັກບ້ານ-ນາຍບ້ານ ມາຮອດປັດຈຸບັນສຳເລັດແລ້ວຈຳນວນ 47 ຊຸດ, ມີຜູ້ເຂົ້າຮ່ວມທັງໝົດ 2.075 ທ່ານ ແລະ ຄາດຄະເນຈະໃຫ້ສຳເລັດ ໂດຍພື້ນຖານໃນປີ 2020 ຂອງຈໍານວນບ້ານທົ່ວປະເທດທັງໝົດ 8.514 ບ້ານ. ຈາກນັ້ນ, ຈະໄດ້ສະຫຼຸບຖອດຖອນບົດຮຽນເພື່ອປັບປຸງຫຼັກສູດເຝິກອົບຮົມດັ່ງກ່າວເປັນໄລຍະທີ 2 .

ກອງປະຊຸມຍັງໄດ້ເຜີຍແຜ່ ແລະເຊື່ອມຊຶມຫຼາຍເອກະສານ ທີ່ຕິດພັນກັບບັນດາໂຮງຮຽນການເມືອງ-ການປົກຄອງທົ່ວປະເທດ ໂດຍສະເພາະພາລະບົດບາດໃໝ່ ຂອງ ສມປຊ ທີ່ກົມການເມືອງສູນກາງພັກ ໄດ້ອອກມະຕິຕົກ ລົງ ສະບັບເລກທີ 075/ກມສພ, ລົງວັນທີ 30 ກໍລະກົດ 2019 ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງສະຖາບັນການເມືອງ ແລະ ການປົກຄອງແຫ່ງຊາດ, ມະຕິຂອງກົມການເມືອງ ສະບັບເລກທີ 072/ກມສພ, ລົງວັນທີ 14 ພຶດສະພາ 2019 ວ່າດ້ວຍລະບອບການຮໍ່າຮຽນທິດສະດີການເມືອງຂໍ້ກໍານົດຂອງຄະນະເລຂາທິການສູນກາງພັກ ສະບັບເລກທີ 01/ຄລສພ ວ່າດ້ວຍການຢັ້ງຢືນລະດັບທິດສະດີການເມືອງ ແລະ ຄໍາສັ່ງເລກທີ 03/ຄລສພ, ລົງວັນທີ 15 ພຶດສະພາ 2019 ວ່າດ້ວຍການປັບປຸງຫຼັກສູດການຮຽນ-ການສອນທິດສະດີການເມືອງໃນລະບົບໂຮງຮຽນພັກ.

ໃນຕອນທ້າຍພິທີ, ທ່ານ ຮສ ປອ ທອງສະລິດ ມັງໜໍ່ເມກ ໄດ້ໃຫ້ກຽດໂອ້ລົມຕໍ່ກອງປະຊຸມໂດຍທ່ານໄດ້ ຮຽກຮ້ອງໃຫ້ການນໍາແຕ່ລະໂຮງຮຽນຈົ່ງພ້ອມກັນຜັນຂະຫຍາຍບັນດາມະຕິຂອງກົມການເມືອງສູນກາງພັກ, ຄຳສັ່ງຂອງຄະນະເລຂາທິການສູນກາງພັກໃຫ້ເປັນແຜນວຽກ, ແຜນງານອັນລະອຽດ, ແບ່ງຄວາມຮັບຜິດຊອບໃຫ້ແຕ່ລະພາກສ່ວນພ້ອມກັນຈັດຕັ້ງປະຕິບັດໃຫ້ສຳເລັດຜົນ, ສືບຕໍ່ຊີ້ນຳ-ນຳພາທາງດ້ານວິຊາການ, ທັງເປັນຜູ້ສ້າງຫຼັກສູດ, ແລະ ເນື້ອໃນຫຼັກສູດທີ່ເປັນພື້ນຖານໃນການແຕ່ງບົດສອນ, ກວດກາປະເມີນຜົນຫຼັກສູດໃຫ້ຢ່າງເປັນປົກກະຕິ ເພື່ອຍົກສູງຄວາມຮູ້, ຄວາມສາມາດໃນການຈັດຕັ້ງປະຕິບັດວຽກງານຂອງຜູ້ບໍລິຫານການສຶກສາໃຫ້ມີປະສິດທິພາບ ແລະ ປະສິດທິຜົນສູງ. ຄຽງຄູ່ກັບຜົນສຳເລັດດັ່ງກ່າວນັ້ນ, ໂຮງຮຽນການເມືອງ-ການປົກຄອງແຂວງທົ່ວປະເທດຄວນເອົາໃຈໃສ່ຄຸ້ມຄອງການຈັດຕັ້ງປະຕິບັດຫຼັກສູດການຮຽນ-ການສອນຢ່າງເຂັ້ມງວດ, ຮັບປະກັນທາງດ້ານປະລິມານ ແລະ ຄຸນນະພາບ, ສືບຕໍ່ເຝິກອົບຮົມຫົວຂໍ້ສະເພາະໃຫ້ແກ່ເລຂາພັກບ້ານ-ນາຍບ້ານໃຫ້ສຳເລັດຕາມແຜນທີ່ວາງໄວ້.

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ລຳພູນ ຖຸນໄຊຍາ