ໜ່ວຍພັກຮາກຖານກົມຈັດຕັ້ງ-ພະນັກງານ ແລະ ກົມກວດກາ ສຳເລັດການເລືອກຕັ້ງຄະນະບໍລິຫານງານໜ່ວຍພັກ ຄັ້ງທີ I

    ຫຼັງຈາກໜ່ວຍພັກຮາກຖານຫ້ອງການ ແລະ ກົມຈັດຕັ້ງພະນັກງານ ໄດ້ສຳເລັດກອງປະຊຸມໃຫຍ່ຄັ້ງທີ VII ຂອງຕົນ ແລ້ວນັ້ນ ກໍໄດ້ແຍກອອກເປັນ 2 ໜ່ວຍພັກ ຄື: ໜ່ວຍພັກຮາກຖານຫ້ອງການ ແລະ ໜ່ວຍພັກຮາກຖານກົມຈັດຕັ້ງ-ພະນັກງານ ໃນວັນທີ 2 ສິງຫາ ທີ່ຜ່ານມາ, ດັ່ງນັ້ນ, ເພື່ອເປັນການສືບຕໍ່ໃນການຈັດກອງປະຊຸມໃຫຍ່ຄັ້ງທີ I ຂອງໜ່ວຍພັກຮາກຖານ ກົມຈັດຕັ້ງ-ພະນັກງານ ແລະ ກົມກວດກາຂຶ້ນ ໃນວັນທີ 23 ສິງຫາ ເຊິ່ງໃຫ້ກຽດເປັນປະທານ ແລະ ດຳເນີນກອງປະຊຸມ ຂອງສະຫາຍ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ ພ້ອມດ້ວຍຄະນະ ໜ່ວຍພັກຮາກຖານ ແລະ ຕາງໜ້າໜ່ວຍພັກພາຍໃນ ສມປຊ ເຂົ້າຮ່ວມຢ່າງພ້ອມພຽງ.

 

     ໃນພິທີ ສະຫາຍ ໃບຊ່ຽນ ມູນຕີວົງ ເລຂາໜ່ວຍພັກຮາກຖານ ໄດ້ຂຶ້ນຜ່ານທິດທາງແຜນການ ຂອງໜ່ວຍພັກຮາກຖານກົມຈັດຕັ້ງ-ພະນັກງານ ແລະ ກົມກວດກາ ເຊິ່ງທ່ານໄດ້ຍົກເອົາທິດທາງແຜນການຕໍ່ກັບການເພີ່ມທະວີຄວາມສາມັກຄີເປັນເອກະພາບພາຍໃນໜ່ວຍພັກ ເພື່ອຮັບປະກັນຄວາມສະເໜີພາບທາງດ້ານການເມືອງ-ແນວຄິດ ແລະ ພຶດຕິກໍາ ໃນຖັນແຖວສະມາຊິກພັກ, ພະນັກງານ-ລັດ ໃນຄວາມຮັບຜິດຊອບຂອງໜ່ວຍພັກຮາກຖານກົມຈັດຕັ້ງ-ພະນັກງານ ແລະ ກົມກວດກາ ມີຄວາມອຸ່ນອຽນ, ທຸ່ນທ່ຽງ, ຍົກສູງຄວາມຮັບຜິດຊອບຂອງຕົນເອງ ໃນການປະຕິບັດໜ້າທີ່ວຽກງານຕິດພັນ ສ້າງ ໜ່ວຍພັກ ເປັນໜ່ວຍພັກທີ່ປອດໃສ, ເຂັ້ມແຂງແລະ ໜັກແໜ້ນ, ປຸກລະດົມຂະບວນການເຄື່ອນໄຫວວຽກງານຕ່າງໆ ໃຫ້ຟົດຟື້ນແຂງແຮງຕໍ່ເນື່ອງ, ຕັ້ງໜ້າ ແລະ ເສີມຂະຫຍາຍຄວາມສາມາດບົ່ມຊ້ອນ ເພື່ອສ້າງການຫັນປ່ຽນດ້ານຕັ້ງໜ້າ ສາມາດເປັນເສນາທິການ ແກ່ຄະນະພັກຄະນະນໍາສະຖາບັນ ໃນການປະຕິບັດວຽກງານຈັດຕັ້ງພັກ, ພະນັກງານ ແລະ ວຽກງານກວດກາພັກ-ລັດ ໃຫ້ຮັບປະກັນໄດ້ທາງດ້ານປະລິມານ ແລະ ຄຸນນະພາບ.

ເພື່ອເປັນການປະກອບບຸກຄະລາກອນ ໃຫ້ແກ່ຄະນະໜ່ວຍພັກຮາກຖານໃໝ່ນີ້ ໜ່ວຍພັກຮາກາຖານດັ່ງກ່າວຈຶ່ງໄດ້ມີການປ່ອນບັດເລືອກຕັ້ງ ຈາກ 5 ສະຫາຍ ເລືອກເອົາ 3 ສະຫາຍ ແລະ ຜ່ານກອງປະຊຸມປະຖົມມະລຶກ ໄດ້ຕົກລົງເຫັນດີເລືອກເອົາ ສະຫາຍ ປອ ຄຳຫຼ້າ ລໍວານໄຊ ເປັນເລຂາໜ່ວຍພັກ, ສະຫາຍ ວິໄລສິດ ເປັນຮອງເລຂາ ແລະ ປະທານກວດກາ, ສະຫາຍ ປທ ນ. ພອນໄຊ ລາດຊະວົງ ເປັນຄະນະ.

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ