ກອງປະຊຸມສະໄໝສາມັນເທື່ອທີ 3 ຂອງສະພາວິທະຍາສາດ ສມປຊ ຊຸດທີ IV

      ໃນຕອນເຊົ້າຂອງວັນທີ 27 ສິງຫາ 2019 ກົມຄຸ້ມຄອງຄົ້ນຄວ້າວິທະຍາສາດ ໄດ້ຈັດກອງປະຊຸມສະໄໝສາມັນເທື່ອທີ 3 ຂອງສະພາວິທະຍາສາດ ສມປຊ ຊຸດທີ IV ຂຶ້ນ, ໂດຍການເປັນປະທານຂອງທ່ານ ຮສ ປອ ທອງສະລິດ ມັງໜໍ່ເມກ ປະທານສະພາວິທະຍາສາດ ສມປຊ, ຫົວໜ້າ ສມປຊ, ມີຮອງປະທານສະພາສະພາວິທະ ຍາສາດ ແລະ ສະມາຊິກສະພາວິທະຍາສາດ ສມປຊ ເຂົ້າຮ່ວມ.

 ໃນກອງປະຊຸມດັ່ງກ່າວ, ທ່ານ ສຈ ປອ ບຸນທີ ເຄືອມີໄຊ ໄດ້ຂຶ້ນຜ່ານບົດສະຫຼຸບ 6 ເດືອນຕົ້ນປີ ໂດຍທ່ານໃຫ້ຮູ້ວ່າ: ສະພາວິທະຍາສາດຂັ້ນ ສມປຊ ຊຸດທີ IV ໄດ້ເອົາໃຈໃສ່ຊຸກຍູ້, ຊີ້ນຳ-ນຳພາສະພາວິທະຍາສາດຂັ້ນຄະນະວິຊາ, ຫ້ອງການເລຂາສະພາວິທະຍາສາດ ເປັນເຈົ້າການເຄື່ອນໄຫວຕາມພາລະບົດບາດຂອງຕົນ ເປັນຕົ້ນແມ່ນການຈັດຕັ້ງປະຕິບັດໂຄງການຄົ້ນຄວ້າວິທະຍາສາດ, ພິຈາລະນາຮັບຮອງຜົນການຄົ້ນຄວ້າວິທະຍາສາດ, ປັບປຸງຮັບຮອງເນື້ອໃນປື້ມ ແລະປ້ອງກັນບົດຈົບຊັ້ນໃຫ້ແກ່ນັກສຶກສາ; ພ້ອມນີ້, ຍັງລາຍງານສະພາບລວມຂອງການຈັດຕັ້ງປະຕິບັດການສ້າງປຶ້ມ ເພື່ອຮັບໃຊ້ການຮຽນ-ການສອນ ທຸກລະບົບຢູ່ພາຍໃນສະຖາບັນ, ເຊິ່ງແຜນການສ້າງປື້ມຂອງບັນດາຄະນະວິຊານີ້ ໄດ້ສົ່ງໃຫ້ກົມ ຄວສ ແລະສັງລວມເປັນແຜນການຂອງປີ ໂດຍເປັນປື້ມທີ່ຂຽນໃໝ່ທັງໝົດ. ນອກຈາກນັ້ນ, ຍັງໄດ້ລາຍງານສະພາບການຄົ້ນຄວ້າວິທະຍາສາດໃນບາງຫົວຂໍ້ບາງຂົງເຂດ ທີ່ຍັງບໍ່ທັນສຳເລັດ ແລະໄດ້ສະເໜີໃຫ້ສະພາວິທະຍາສາດຂັ້ນສະຖາບັນ ພິຈາລະນາທີ່ຈະສືບຕໍ່ຄົ້ນຄວ້າໃນບາງຫົວຂໍ້ດັ່ງກ່າວຕໍ່ໄປ.

ໃນວາລະດຽວກັນນີ້, ທ່ານ ຮສ ສະໝຸດທອງ ສົມພານິດ ຮອງປະທານສະພາວິທະຍາສາດ, ຮອງຫົວໜ້າ ສມປຊ ໄດ້ຂຶ້ນຜ່ານຮ່າງຂໍ້ກຳນົດວ່າດ້ວຍການຈັດຕັ້ງ ແລະການເຄື່ອນໄຫວຂອງສະພາຄູ ຂອງໂຮງຮຽນການເມືອງ-ການປົກຄອງແຂວງ ແລະນະຄອນຫຼວງ ໂດຍທ່ານໄດ້ລາຍງານໃຫ້ຮູ້ເຖິງທີ່ຕັ້ງ, ພາລະບົດບາດ, ສິດ, ໜ້າທີ່, ໂຄງປະກອບການຈັດຕັ້ງ ແລະບຸກຄະລາກອນຂອງສະພາຄູ; ສິດ ແລະໜ້າທີ່ຂອງສະມາຊິກສະພາຄູ ໂຮງຮຽນການ ເມືອງ-ການປົກຄອງແຂວງ ແລະນະຄອນຫຼວງ; ລະບອບປະຊຸມ ແລະການຕົກລົງບັນຫາຕ່າງໆ; ແລະງົບປະມານ ແລະກາປະທັບຂອງສະພາຄູ ໂຮງຮຽນການເມືອງ-ການປົກຄອງແຂວງ ແລະນະຄອນຫຼວງ.

ຫຼັງຈາກທີ່ໄດ້ຮັບຟັງການລາຍງານສະພາບການເຄື່ອນໄຫວວຽກງານດັ່ງກ່າວແລ້ວ, ສະມາຊິກສະພາວິທະຍາສາດແຕ່ລະທ່ານ ຍັງໄດ້ມືການປຶກສາຫາລື, ສະແດງຄຳຄິດຄຳເຫັນ ແລະສະເໜີບາງບັນຫາ ໃຫ້ມີການປັບປຸງບາງຈຸດທີ່ຍັງບໍ່ທັນສອດຄ່ອງ ພ້ອມທັງຊອກຫາວິທີແກ້ໄຂບັນຫາຕ່າງໆຮ່ວມກັນ ເຮັດແນວໃດເພື່ອໃຫ້ມີຄວາມເປັນເອກະພາບພາຍໃນສະພາ, ສາມາດເຮັດສຳເລັດໃນແຕ່ລະຂັ້ນຕອນ ແລະນຳມາຈັດຕັ້ງປະຕິບັດໃຫ້ເກີດດອກອອກຜົນສູງສຸດ.

ຂ່າວ/ພາບ ໂດຍ: ນ ດອກໄມ້ ຈັນດາລາ 

ບກ ໂດຍ: ປທ ນ ອາພອນ ຂາວພັນ