ຊົມເຊີຍຜົນສຳເລັດກອງປະຊຸມໃຫຍ່ຄັ້ງທີ VI ແລະກອງປະຊຸມໃຫຍ່ຄັ້ງທີ I ຂອງບັນດາໜ່ວຍພັກຮາກຖານຄະນະວິຊາ

ໃນຕອນເຊົ້າຂອງວັນທີ 30 ສິງຫາ 2019 ທີ່ຫ້ອງປະຊຸມໃຫຍ່ 302 ໜ່ວຍພັກຮາກຖານຄະນະກໍ່ສ້າງພັກປະຫວັດສາດພັກ ແລະຄະນະລັດທິສັງຄົມນິຍົມວິທະຍາສາດ ໄດ້ຈັດກອງປະຊຸມໃຫຍ່ຄັ້ງທີ VI ຂຶ້ນພາຍໃຕ້ການເປັນປະທານຂອງສະຫາຍ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ, ມີຕາງໜ້າໜ່ວຍພັກຮາກຖານທົ່ວ ສມປຊ ແລະສະມາຊິກພາຍໃນພັກເຂົ້າຮ່ວມຢ່າງພ້ອມພຽງ.

 

ໃນກອງປະຊຸມດັ່ງກ່າວ, ສະຫາຍ ປອ. ຄຳໃບ ມາລາສິງ ວ່າການເລຂາໜ່ວຍພັກຮາກຖານຄະນະກໍ່ສ້າງພັກປະຫວັດສາດພັກ ແລະຄະນະລັດທິສັງຄົມນິຍົມວິທະຍາສາດ ໄດ້ຂຶ້ນຜ່ານບົດລາຍງານການເມືອງ ໂດຍກອງປະຊຸມໃຫຍ່ຄັ້ງນີ້ແມ່ນໄດ້ສະຫຼຸບຕີລາຄາຄືນສະພາບການເຄື່ອນໄຫວນຳພາຈັດຕັ້ງປະຕິບັດແຜນການທີ່ກອງປະຊຸມໃຫຍ່ຄັ້ງທີ V ຂອງໜ່ວຍພັກວາງອອກ, ຍົກໃຫ້ເຫັນດ້ານດີ ແລະຜົນງານ, ດ້ານອ່ອນ ແລະຂໍ້ຄົງຄ້າງ, ພ້ອມທັງສາເຫດແລະບາງບົດຮຽນທີ່ຖອດຖອນໄດ້. ຈາກນັ້ນ, ໄດ້ຮັບຮອງເອົາທິດທາງແຜນການການເຄື່ອນໄຫວໃນຕໍ່ໜ້າ ແນໃສ່ເສີມຂະຫຍາຍຈຸດດີ, ປັບປຸງແກ້ໄຂຈຸດອ່ອນ ແລະຂໍ້ຄົງຄ້າງຕ່າງໆ. ພ້ອມກັນສຸມສະຕິປັນຍາໃສ່ເຮັດໃຫ້ໜ່ວຍພັກໄດ້ຍົກສູງບົດບາດການນຳພາ ແລະບັນດາສະຫາຍສະມາຊິກພັກທີ່ສັງກັດຢູ່ໜ່ວຍຮາກຖານພັກດັ່ງກ່າວ ເພື່ອແນໃສ່ສ້າງໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ ໃນຕໍ່ໜ້າໃຫ້ສຳເລັດຜົນ. ພ້ອມດຽວກັນນີ້, ເພື່ອສືບຕໍ່ຊີ້ນຳ-ນຳພາຂະບວນການ ກໍໄດ້ຈັດຕັ້ງກອງປະຊຸມໃຫຍ່ຄັ້ງທີ I ຂອງໜ່ວຍພັກຮາກຖານຄະນະເສດຖະສາດການເມືອງ ແລະຄຸ້ມຄອງເສດຖະກິ-ຄະນະລັດທິສັງຄົມນິຍົມວິທະຍາສາດຂຶ້ນ ແລະໄດ້ເລືອກຕັ້ງເອົາຄະນະພັກຊຸດໃໝ່ ເພື່ອເປັນຫົວຈັກຫຼັກແຫຼ່ງນຳພາການເຄື່ອນໄຫວຢູ່ໃນຂົງເຂດຄະນະວິຊາທີ່ກ່ຽວຂ້ອງ, ທັງເປັນຜູ້ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ I ຂອງໜ່ວຍພັກຮາກຖານດັ່ງກ່າວໃຫ້ປະກົດຜົນເປັນຈິງ ກອງປະຊຸມຄັ້ງປະຖົມມະລຶກໄດ້ເປັນເອກະສັນຢ່າງສົມບູນຄັດເລືອກເອົາຄື:

1: ສະຫາຍ ປອ ຄຳໃບ ມາລາສິງ ເປັນເລຂາ.

2: ສະຫາຍ ປທ ອິນທະວົງ ໂຄດປັນຍາ ເປັນຮອງເລຂາ ທັງເປັນປະທານກວດກາ.

3: ສະຫາຍ ນ ຄຳແພນ ເພັງພັກດີ ເປັນຄະນະ.

ຫຼັງຈາກນັ້ນ, ຄະນະໜ່ວຍພັກຊຸດໃໝ່ໄດ້ຮັບຟັງການໂອ້ລົມຈາກ ສະຫາຍ ຮສ ພູວົງ ອຸ່ນຄຳແສນ ໃຫ້ເພີ່ມທະວີເປັນເຈົ້າການໃນການຕ້ານສິ່ງປະກົດການຫຍໍ້ທໍ້, ເສີມຂະຫຍາຍມູນເຊື້ອຄວາມສາມັກຄີ ເປັຍປຶກແຜ່ນແໜ້ນໜາ, ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ, ຄູ-ອາຈານ, ຊຸກຍູ້ຂະບວນການຈັດຕັ້ງຜັນຂະຫຍາຍທິດທາງແຜນການຂອງກອງປະຊຸມໜ່ວຍພັກຄັ້ງທີ I ວາງອອກໃຫ້ປະກົດຜົນເປັນຈິງ, ໃຫ້ຖືວ່າທິດທາງທີ່ວາງໄວ້ນັ້ນ ແມ່ນເຂັມຊີ້ທິດເຍືອງທາງເຄື່ອນໄຫວການປະຕິບັດໜ້າທີ່ການເມືອງ ຂອງສະມາຊິກພັກທຸກສະຫາຍ ທີ່ສັງກັດຢູ່ໃນໜ່ວຍພັກຮາກຖານດັ່ງກ່າວ.

ໃນຕອນທ້າຍຂອງພິທີ ເພື່ອເຮັດໃຫ້ກອງປະຊຸມຄັ້ງປະຖົມມະລຶກ ມີຄວາມໝາຍ ແລະຄວາມສຳ ຄັນຍິ່ງຂຶ້ນ ສະຫາຍ ຮສ ປອ. ທອງສະລິດ ມັງໜໍ່ເມກ ໄດ້ໂອ້ລົມແກ່ຄະນະຊຸດໃໝ່ໃຫ້ສືບຕໍ່ສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນ, ກຳແໜ້ນເຊື່ອມຊຶມແນວທາງນະໂຍບາຍຂອງພັກຢ່າງເລິກເຊິ່ງ; ຖືເອົາວຽກງານວິຊາສະເພາະເປັນໃຈກາງ ໃນການປະຕິບັດພາລະບົດບາດ ແລະໜ້າທີ່ ຊີ້ນຳ-ນຳພາສະມາຊິກ ໃຫ້ມີຄວາມຮັບຜິດຊອບສູງໃນການຈັດຕັ້ງປະຕິບັດແຜນການຮຽນ-ການສອນຂອງສະຖາບັນ, ເອົາໃຈໃສ່ຕື່ມອີກໃນການຄົ້ນຄວ້າ, ປະກອບສ່ວນພັດທະນາຫຼັກສູດ, ປື້ມແບບຮຽນ. ປື້ມຄູ່ມື, ເອກະສານ  ແລະການຄົ້ນຄວ້າອື່ນໆໃຫ້ເປັນລະບົບຄົບຊຸດ; ເອົາໃຈໃສ່ໃນການຄົ້ນຄວ້າທິດສະດີ ແລະພຶດຕິກຳ ຕິດພັນກັບຂະແໜງການທີ່ຄະນະວິຊາຮັບຜິດຊອບ; ເອົາໃຈໃສ່ແກ້ໄຂຊີວິດການເປັນຢູ່ ຂອງພະນັກງານ-ລັດຖະກອນ ກໍຄືຄູ-ອາຈານໃຫ້ດີ, ຊຸກຍູ້ຄູ-ອາຈານໃຫ້ຂຽນບົດລົງວາລະສານ, ໜັງສືພິມ; ເອົາໃຈໃສ່ປັບປຸງອົງການຈັດຕັ້ງມະຫາຊົນໃຫ້ມີຄວາມເຂັ້ມແຂງ ເປັນຕົ້ນຂະບວນການຮຽນ-ການສອນ, ການຄົ້ນຄວ້າວິທະຍາສາດ, ຂໍ້ແຂ່ງຂັນພະນັກງານດີເດັ່ນ, ຄູ-ອາຈານສອນດີ-ສອນເກັ່ງ. ພ້ອມທັງປຸກລະດົມມະຫາຊົນເຂົ້າຮ່ວມການສ້າງພັກປອດໃສ, ເຂັ້ມແຂງ, ໜັກແໜ້ນ; ເອົາໃຈໃສ່ປັບປຸງແບບແຜນວິທີເຮັດວຽກ, ວິທີນຳພາ ຂອງຄະນະໃຫ້ສອດຄ່ອງ, ເໝາະສົມ ແລະທັນກັບສະພາບການປ່ຽນແປງໃໝ່ ໃຫ້ມີຜົນສຳເລັດໃໝ່ໃຫຍ່ຫຼວງກວ່າເກົ່າ.

ຂ່າວ/ພາບໂດຍ: ນ. ດອກໄມ້ ຈັນດາລາ

ທ. ລຳພູນ ຖຸນໄຊຍາ

 

ບັນນາທິການໂດຍ: ປທ ນ. ອາພອນ ຂາວພັນ