ສະຖາບັນການເມືອງ ແລະ ການປົກຄອງແຫ່ງຊາດຈັດຕັ້ງເຊື່ອມຊຶມບັນດານິຕິກຳຕ່າງໆ ໃຫ້ແກ່ພະນັກງານ, ຄູ-ອາຈານ

ທີ່ສະໂມສອນ ສມປຊ ໃນວັນທີ 28 ສິງຫາ 2019 ທີ່​ຜ່ານ​ມາ, ສະຖາບັນການເມືອງ ແລະການປົກຄອງແຫ່ງຊາດ ໄດ້ຈັດກອງປະຊຸມເຊື່ອມຊືມບັນດານິຕິກຳຕ່າງໆຂອງກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ VIII  ສະໄໝທີ X ຂອງກົມການເມືອງສູນກາງພັກເຊິ່ງດຳເນີນເປັນເວລາ 1 ວັນ, ໃຫ້ກຽດເປັນປະທານກອງປະຊູມ ຂອງທ່ານ ຮສ ປອ ທອງສະລິດ ມັງໜໍ່່ເມກ  ກຳມະການສູນກາງພັກ, ສະມາຊິກສະພາແຫ່ງຊາດຊຸດທີ 8, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ພ້ອມດ້ວຍພະນັກງານ, ຄູ-ອາຈານເຂົ້າຮ່ວມທັງໝົດກວ່າ 154 ຄົນ.ຈຸດປະສົງຂອງການຈັດກອງປະຊຸມຄັ້ງນີ້ ແມ່ນເພື່ອເຮັດໃຫ້ພະນັກງານ, ຄູ-ອາຈານ ມີຄວາມຮັບຮູ້, ເຂົ້າໃຈ ຕໍ່ແນວທາງນະໂຍບາຍຂອງພັກທີ່ໄດ້ວາງອອກແຕ່ລະໄລຍະ ເປັນຕົ້ນແມ່ນມະຕິ, ຄຳສັ່ງ, ຄຳແນະນຳທີ່່ພົວພັນໂດຍກົງຕໍ່ສະຖາບັນການເມືອງ ແລະ ການປົກຄອງແຫ່ງຊາດ, ສຳລັບເອກະສານທີ່ນຳມາເຜີຍແຜ່ເຊື່ອມຊຶມໃນຄັ້ງນີ້ ປະກອບມີ 7 ເອກະສານຄື:

 

1)  ມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ VIII  (ສະໄໝທີ X ).

2)  ມະຕິຕົກລົງຂອງກົມການເມືອງສູນກາງພັກສະບັບເລກທີ 075/ກມສພ, ສົງວັນທີ 30 ກໍລະກົດ 2019 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະຖາບັນການເມືອງ ແລະ ການປົກຄອງແຫ່ງຊາດ.

3)  ຄຳສັ່ງສະບັບເລກທີ 03/ຄລສພ, ລົງວັນທີ 15 ພຶດສະພາ 2019 ວ່າດ້ວຍການປັບປຸງຫຼັກສູດການຮຽນ-ການສອນທິດສະດີການເມືອງຢູ່ໂຮງຮຽນພັກ ແລະລະບົບການສຶກສາແຫ່ງຊາດ.

4)  ມະຕິສະບັບເລກທີ 72/ກມສພ ລົງວັນທີ 14 ພຶດສະພາ 2019 ວ່າດ້ວຍລະບຽບການຮໍ່າຮຽນທິດສະດີການເມືອງ.

5)  ຂໍ້ກຳນົດສະບັບເລກທີ 01/ຄລສພ, ລົງວັນທີ 15 ພຶດສະພາ 2019 ວ່າດ້ວຍການຢັ້ງຢືນລະດັບທິດສະດີ ການເມືອງ.

6)  ດຳລັດສະບັບເລກທີ 116/ລບ ລົງວັນທີ 22 ເມສາ 2019 ວ່າດ້ວຍການແຂ່ງຂັນຍ້ອງຍໍ.

7)  ຄຳແນະນຳສະບັບເລກທີ 03/ພນ, ລົງວັນທີ 26 ກໍລະກົດ 2019 ກ່ຽວກັບການຈັດຕັ້ງປະຕິບັດດຳລັດສະບັບເລກທີ 116/ລບ ລົງວັນທີ 22 ເມສາ 2019 ວ່າດ້ວຍການແຂ່ງຂັນຍ້ອງຍໍ.

ໃນທີ່ກອງປະຊຸມໄດ້ເຜີຍແຜ່ເຊື່ອມຊຶມມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ VIII  (ສະໄໝທີ X) ນຳສະເໜີໂດຍທ່ານ ຮສ ປອ ທອງສະລິດ ມັງໜໍ່ເມກ, ເຊິ່ງທ່ານຍົກໃຫ້ເຫັນສະພາບຄວາມຫຍຸ້ງຍາກທາງດ້ານເສດຖະກິດ, ການແກ້ໄຂບັນຫາໜີ້ສິນຂອງລັດ, ບັນຫາການປ່ຽນແປງຂອງດິນຟ້າອາກາດ, ການແຜ່ລະບາດຂອງພະຍາດອະຮິວາອາຟຣິກາ, ການຄຸ້ມຄອງບໍລິການຫານລັດ ແລະ ທິດທາງຂອງພັກໃນການແກ້ໄຂບັນຫາດັ່ງກ່າວ.

ສຳລັບເອກະສານທີ 2,5,6 ແລະ 7 ນຳສະເໜີໂດຍ ທ່ານ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ໂດຍທ່ານໄດ້ຍົກໃຫ້ເຫັນໂຄງປະກອບການຈັດຕັ້ງ ແລະ ການເຄື່ອນໄຫວຂອງສະຖາບັນການເມືອງ ແລະ ການປົກຄອງແຫ່ງຊາດ, ເຊິ່ງມີບາງຈຸດທີ່ໄດ້ເພີ່ມເຕີມຈາກນິຕິກຳສະບັບເກົ່າ ເຊັ່ນ: ສະຖາບັນການເມືອງປະກອບມີ 12 ກົມທຽບເທົ່າ (ເມື່ອກ່ອນປະກອບມີ 10 ກົມທຽບເທົ່າ) ເຊັ່ນ: ຫ້ອງການ, ກົມຈັດຕັ້ງ-ພະນັກງານ, ກົມກວດກາ (ສ້າງຕັ້ງໃໝ່), ກົມຄຸ້ມຄອງການຮຽນ-ການສອນ (ປ່ຽນຊື່ມາຈາກກົມວິຊາການ), ກົມຄຸ້ມຄອງການຄົ້ນຄວ້າວິທະຍາສາດ, ສູນຂໍ້ມູນຂ່າວສານການເມືອງ-ການປົກຄອງ, ສູນຄົ້ນຄວ້າແນວຄິດໄກສອນພົມວິຫານ (ສ້າງຕັ້ງໃໝ່),​ ຄະນະປັດຊະຍາ, ຄະນະເສດຖະສາດ ແລະຄຸ້ມຄອງເສດຖະກິດ, ຄະນະລັດທິສັງຄົມນິຍົມວິທະຍາສາດ, ຄະນະກໍ່ສ້າງພັກ ແລະ ປະຫວັດສາດພັກ, ຄະນະບໍລິຫານສາດ.

ຈາກນັ້ນກໍໄດ້ຮັບຟັງເອກະສານທີ 3 ແລະ 4 ນໍາສະເໜີໂດຍທ່ານ ຮສ ສະໝຸດທອງ ສົມພານິດ ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ເນື້ອໃນເອກະສານໄດ້ເນັ້ນໜັກໃຫ້ຄູ-ອາຈານເຂົ້າໃຈເຖິງການປັບປຸງຫຼັກສູດການຮຽນ-ການສອນທິດສະດີການເມືອງຢູ່ໂຮງຮຽນພັກ ແລະລະບົບການສຶກສາແຫ່ງຊາດ, ລະບຽບການຮໍ່າຮຽນທິດສະດີການເມືອງ. ເຊິ່ງມີບາງມາດຕາໄດ້ກຳນົດວ່າ. ໂອນມອບລະບົບກໍ່ສ້າງວິຊາສະເພາະສາຍການເມືອງ, ການປົກຄອງຊັ້ນອະນຸປະລິນຍາ ແລະ ປະລິນຍາຕີທີ່ຂຶ້ນກັບສະຖາບັນການເມືອງ ແລະ ການປົກຄອງແຫ່ງຊາດ ໃຫ້ກັບກະຊວງສຶກສາທິການແລະກີລາເປັນຜູ້ຮັບຜິດຊອບຕໍ່ໄປ. 

ມາໃນຕອນທ້າຍທ່ານປະທານກອງປະຊຸມໄດ້ເນັ້ນໜັກໃຫ້ພະນັກງານ, ຄູ-ອາຈານທຸກຄົນພາຍໃນ ສະຖາບັນການເມືອງ ແລະ ການປົກຄອງແຫ່ງຊາດ ຈົ່ງພ້ອມກັນເຊື່ອມຊຶມ, ກຳແໜ້ນ, ສ້າງແຜນລະອຽດ, ຮີບຮ້ອນແບ່ງວຽກໃຫ້ແຕ່ລະພາກສ່ວນຢ່າງຖືກຕ້ອງ, ເໝາະສົມ, ພິເສດແມ່ນກົມທີ່ສ້າງຕັ້ງໃໝ່ຕ້ອງໄປກ່ອນກ້າວໜຶ່ງ ຕ້ອງປັບປຸງລະບອບ, ລະບຽບ, ການບໍລິຫານວຽກງານດ້ານຕ່າງໆໃຫ້ທັນຕາມກຳນົດເວລາ ແລະ ພ້ອມກັນຈັດຕັ້ງປະຕິບັດບັນດາມະຕິ, ຄຳສັ່ງ, ຄໍາແນະນຳໃຫ້ໄດ້ຮັບຜົນສໍາເລັດຢ່າງຈົບງາມ.

ບັນນາທິການ: ທ່ານ ປທ ນ. ອາພອນ ຂາວພັນ

 

ຂ່າວ/ພາບ: ທ່ານ ລຳພູນ ຖຸນໄຊຍາ