ພິທີເປີດຊຸດຝຶກອົບຮົມ ທິດສະດີການເມືອງ-ການປົກຄອງ 45 ວັນ ທີ່ກະຊວງກະສິກຳ ແລະ ປ່າໄມ້ ຊຸດທີ XVII

 ໃນຕອນແລງຂອງວັນທີ 26 ເມສາ 2019 ຜ່ານມາ, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ອະນຸມັດເປີດຊຸດຝຶກອົບຮົມ ທິດສະດີການເມືອງ-ການປົກຄອງ ລະບົບ 45 ວັນ ໃຫ້ແກ່ພະນັກງານຫຼັກແຫຼ່ງອ້ອມຂ້າງ ກະຊວງກະສິກໍາ ແລະ ປ່າໄມ້ ໃຫ້ກຽດເປັນປະທານໂດຍທ່ານ ທອງເພັດ ວົງມະນີ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງກະສິກຳ ແລະ ປ່າໄມ້ ແລະໃຫ້ກຽດເປັນປະທານຮ່ວມ ຂອງ ທ່ານ ຮສ ສະໝຸດທອງ ສົມພານິດ ຄະນະພັກຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ເຂົ້າຮ່ວມມີ ທ່ານ ປອ ນ. ໄກສອນ ຈັນສີນາ ຮັກສາການຫົວໜ້າກົມວິຊາການສະຖາບັນການເມືອງ ແລະ ການປົກຄອງແຫ່ງຊາດ ແລະ ສໍາມະນາກອນເຂົ້າຮ່ວມ. ເຊິ່ງຊຸດຝຶກອົບຮົມ 45 ວັນ ຄັ້ງນີ້ ແມ່ນຈັດຂຶ້ນເປັນຊຸດທີ່ XVII ແລະ ເປັນຊຸດຝຶກອົບຮົມວຽກພັກ-ພະນັກງານ ຫຼັກສູດ 5 ວັນ ຄັ້ງທີ XIII ເຊິ່ງຈະໄດ້ດຳເນີນຕັ້ງແຕ່ວັນທີ 29 ເມສາ ເຖິງວັນທີ 08 ກໍລະກົດ 2019 ເປັນອັນສິ້ນສຸດການຝຶກອົບຮົມ.

 

 ສຳມະນາກອນທີ່ເຂົ້າຮ່ວມຝຶກອົບຮົມທັງໝົດຄັ້ງນີ້ ມີ 50 ທ່ານຍິງ 15 ທ່ານ ທີ່ເປັນສະມາຊິກພັກເປັນພະນັກງານຫຼັກແຫຼ່ງຂອງບັນດາຄະນະພັກຮາກຖານໜ່ວຍພັກຮາກຖານ ແລະ ຕາງໜ້າໃຫ້ແກ່ ອົງການຈັດຕັ້ງມະຫາຊົນອ້ອມຂ້າງກະຊວງກະສິກຳ ແລະ ປ່າໄມ້. ດ້ານເນື້ອໃນຫຼັກສູດແບ່ງອອກເປັນ 5 ພາກວິຊາລວມ ມີ 39 ບົດ ຄື: ພາກວິຊາປັດຊະຍາ ມີ 8 ບົດເສດຖະສາດການເມືອງມີ 10 ບົດ, ວິຊາລັດທິສັງຄົມນິຍົມວິທະຍາສາດມີ 8 ບົດວິຊາບໍລິຫານສາດມີ 8 ບົດ ແລະ ວິິຊາກໍ່ສ້າງພັກມີ 5 ບົດ. 

ໃນພິທີດັ່ງກ່າວທ່ານປະທານ ກໍໄດ້​​ໃຫ້ຄຳໂອ້ລົມ ແລະ ທິດຊີ້ນຳ ໂດຍໄດ້ຍົກໃຫ້ເຫັນເຖິງຄວາມສຳຄັນຂອງການຝຶກອົບຮົມ ໂດຍສະເພາະແມ່ນການປະຕິບັດຕາມແຜນບຳລຸງ-ກໍ່ສ້າງພະນັກງານຂອງກະຊວງກະຊິກຳ ແລະ ປ່າໄມ້ ເພື່ອເຮັດໃຫ້ການປະຕິບັດວຽກງານພາຍໃນຂອງກຊວງໃຫ້ມີປະສິດທິຜົນສູງຂຶ້ນກວ່າເກົ່າ, ເພື່ອສ້າງໃຫ້ບັນດາສະມາຊິກພັກພະນັກງານນຳພາ-ຄຸ້ມຄອງມີທັດສະນະຫຼັກໝັ້ນຊົນຊັ້ນໜັກແໜ້ນມີຄຸນສົມບັດສິນທຳປະຕິວັດ ແລະມີແນວຄິດອຸ່ນອ່ຽນທຸ່ນທ່ຽງເຊື່ອໝັ້ນຕໍ່ການນຳພາຂອງພັກກໍາແໜ້ນແນວຄິດການເມືອງຢ່າງໜັກແໜ້ນ ເພື່ອຍົກລະດັບວິຊາຄວາມຮູ້ຂອງຕົນພ້ອມທັງນໍາເອົາບົດຮຽນ ທີ່ໄດ້ຮຽນມາໄປຜັນຂະຫຍາຍໃນໜ້າວຽກທີ່ຕົນເອງຮັບຜິດຊອບໃຫ້ໄດ້ຮັບຜົນສໍາເລັດໃນຕໍ່ໜ້າ.

ຕະຫຼອດໄລຍະເວລາຂອງການຝຶກອົບຮົມຜູ້ເຂົ້າຮ່ວມຝຶກອົບຮົມ ຈະໄດ້ມີການຄົ້ນຄ້ວາຮ່ຳຮຽນ, ຍົກລະດັບຄວາມຮູ້ພື້ນຖານທາງດ້ານທິດສະດີການເມືອງ-ການປົກຄອງ, ທິດສະດີມາກ-ເລນິນ, ແນວທາງການປ່ຽນແປງໃໝ່ຂອງພັກໃນແຕ່ລະໄລຍະເຊິ່ງການ​ຝຶກ​ອົບ​ຮົມ​ນີ້ ແນ່​ໃສ່ເພື່ອໃຫ້ພະນັກງານນຳພາ-ຄຸ້ມຄອງພະນັກງານສືບທອດ ກໍຄືສະມາຊິກພັກພະນັກງານຫຼັກແຫຼ່ງ ມີວິທີການເຮັດວຽກທີ່ຖືກຕ້ອງ ແລະ ຮູ້ໝູນໃຊ້ບັນດາບົດຮຽນດັ່ງກ່າວເຂົ້າໃນໜ້າທີ່ວຽກງານຂອງຕົນຢ່າງເປັນລະບົບ ແລະເປັນອັນລະອຽດ.

 

ຂ່າວ/ພາບ: ທ່ານ ປທ ນ. ອາພອນ ຂາວພັນ