ສະຖາບັນການເມືອງ ແລະ ການປົກຄອງແຫ່ງຊາດ ສະຫຼຸບການລົງກໍ່ສ້າງຮາກຖານການເມືອງ ຂອງນັກສຶກສາ ຢູ່ເມືອງນາຊາຍທອງ

ໃນວັນທີ 15 ກຸມພາ ທີ່ຜ່າມມາ, ກົມວິຊາການ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ສະຫຼຸບພ້ອມທັງຕີລາຄາ ການລົງກໍ່ສ້າງຮາກຖານການເມືອງ ຂອງນັກສຶກສາປະລິນຍາຕີ ຮຸ່ນທີ XXII ແລະ ອະນຸປະລິນຍາ ຮຸ່ນທີ XVI ທີ່ໄດ້ດຳເນີນແຕ່ວັນທີ 20 ພະຈິກ ເຖິງ ວັນທີ 16 ທັນວາ 2018, ທັງນີ້ກໍເພື່ອເປັນການການສະຫຼຸບ, ຖອດຖອນບົດຮຽນ ແລະ ແລກປ່ຽນບາງດ້ານ, ທັງເປັນການຊອກຮູ້ພຶດຕິກໍາ ສົມທຽບກັບທິດສະດີທີ່ໄດ້ສຶກສາຄົ້ນຄວ້າຕະຫຼອດໄລຍະຂອງການສຶກສາຢູ່ທີ່ ສມປຊ ເຊິ່ງສະເພາະປີນີ້ແມ່ນລະບົບປະລິນຍາຕີ ຮຸ່ນທີ XXII ຫ້ອງ ກ ແລະ ຫ້ອງ ຂ, ນັກສຶກສາອະນຸປະລິນຍາ ຮຸ່ນທີ XVI ຈຳນວນທັງໝົດ 181 ທ່ານ, ຍິງ 46 ທ່ານ ທີ່ໄດ້ຄັດເລືອກເອົາເມືອງນາຊາຍທອງ ເປັນບ່ອນລົງກໍ່ສ້າງຮາກຖານການເມືອງ. ໃນນັ້ນໄດ້ແບ່ງອອກເປັນ 2 ກຸ່ມຄື: ກຸ່ມບ້ານສີເກີດ ແລະ ກຸ່ມບ້ານນາຊາຍທອງ. ກອງປະຊຸມດັ່ງກ່າວ ພາຍໃຕ້ການເປັນປະທານ ຂອງທ່ານ ຮສ ສະໝຸດທອງ ສົມພານິດ ຄະນະບໍລິຫານງານພັກ, ຮອງຫົວໜ້າ ສມປຊ, ມີ ທ່ານ ວຽງຄຳ ສີຫາໂຄດ ຮອງເລຂາພັກເມືອງ, ຮອງເຈົ້າເມືອງນາຊາຍທອງ, ມີຕາງໜ້າຄະນະອຳນາດການປົກຄອງບ້ານ 16 ບ້ານ ແລະ ນັກສຶກສາທັງສອງຮຸ່ນທີ່ລົງກໍ່ສ້າງຮາກຖານເຂົ້າຮ່ວມ.

 

ທ່ານ ປທ ສີຈັນ ສູນດາລາ ຮອງຫົວໜ້າກົມວິຊາການ ໃນນາມຄະນະຊີ້ນຳລວມຂອງການລົງກໍ່ສ້າງຮາກຖານການເມືອງ ຂອງນັກສຶກສາໃນຄັ້ງນີ້ ກໍໄດ້ຂຶ້ນຜ່ານບົດສະຫຼຸບລາຍງານໂດຍສັງເຂບ ເຊິ່ງທ່ານໄດ້ໃຫ້ຮູ້ວ່າ: ໂດຍປະຕິບັດຕາມທິດຊີ້ນໍາ ຂອງຄະນະພັກ-ຄະນະນໍາ ສມປຊ, ດັ່ງນັ້ນ ຄະນະຮັບຜິດຊອບຊີ້ນໍາວຽກງານກໍ່ສ້າງຮາກຖານການເມືອງ ໄດ້ສົມທົບກັບອົງການປົກຄອງເມືອງ ເມືອງນາຊາຍທອງ ໃນການຈັດຕັ້ງນໍາພານັກສຶກສາ ລະບົບອະນຸປະລິນຍາ ຮຸ່ນທີ XVI ແລະລະບົບປະລິນຍາຕີ ຮຸ່ນທີ XXII, ລົງກໍ່ສ້າງຮາກຖານການເມືອງ ກຸ່ມບ້ານສີເກີດ ແລະກຸ່ມບ້ານນາຊາຍທອງ ເຫັນໄດ້ວ່ານັກສຶກສາ ທັງສອງຮຸ່ນດັ່ງກ່າວ ໄດ້ຕັ້ງໜ້າສຶກສາອົບຮົມການເມືອງ-ແນວຄິດ, ເຊື່ອມຊຶມ ແລະ ເຜີຍແຜ່ບັນດາເອກະສານມູນເຊື້ອວັນສໍາຄັນຕ່າງໆຂອງພັກ, ຂອງຊາດ, ມະຕິກອງປະຊຸມໃຫຍ່ຂອງພັກແຕ່ລະຂັ້ນ, ລະບຽບ, ແຈ້ງການ ຂອງຂັ້ນເທິງ ແລະຂໍ້ກຳນົດຕ່າງໆຂອງບ້ານ ດ້ວຍຮູບການປາຖະກະຖາເລົ່າມູນເຊື້ອ ແລະຈັດຕັ້ງນໍາພາຂະບວນການຕົວຈິງ ພ້ອມທັງສະຫຼຸບ 5 ກຸ່ມວຽກງານເຊັ່ນ: ກຸ່ມວຽກງານການເມືອງ, ກຸ່ມວຽກງານເສດຖະກິດ, ກຸ່ມວຽກງານວັດທະນະທຳ-ສັງຄົມ ແລະ ກຸ່ມວຽກງານປ້ອງກັນຊາດ-ປ້ອງກັນຄວາມສະຫງົບ. ນອກນັ້ນ, ບັນດາຄະນະຜູ້ຮັບຜິດຊອບ ແລະ ຄະນະນັກສຶກສາ ທີ່ໄດ້ລົງເຄື່ອນໄຫວກໍ່ສ້າງຮາກຖານການເມືອງ ໄດ້ມີຄວາມເປັນເອກະພາບ, ເອົາໃຈໃສ່ໃນການປະຕິບັດວຽກງານຂອງຕົນໄດ້ເປັນຢ່າງດີ, ມີການແບ່ງງານ, ແບ່ງຄວາມຮັບຜິດຊອບໃນໝູ່ຄະນະຢ່າງລະອຽດຈະແຈ້ງ, ເປັນເຈົ້າການເຂົ້າຮ່ວມຂະບວນການຢ່າງເປັນຂະບວນຟົດຟື້ນ, ມີຄວາມຈູບຈ້າວຫ້າວຫັນ ແລະມີຄວາມຮັບຜິດຊອບສູງຕໍ່ໜ້າທີ່ໄດ້ຮັບມອບໝາຍ ຄຽງຄູ່ກັບຄະນະພັກ-ອໍານາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນ ທີ່ໄດ້ໃຫ້ຄວາມຮ່ວມມື ແລະເອື້ອອໍານວຍຄວາມສະດວກເປັນຕົ້ນແມ່ນທາງດ້ານສະຖານທີ່ບ່ອນເຮັດວຽກ, ວັດຖຸອຸປະກອນຕ່າງໆເພື່ອຮັບໃຊ້ໃນການດໍາລົງຊີວິດ ແລະການເຄື່ອນໄຫວວຽກງານຕ່າງໆ, ພ້ອມທັງເບິ່ງແຍງຊີວິດການເປັນຢູ່ຂອງຄະນະທີມງານລົງກໍ່ສ້າງຮາກຖານໄດ້ເປັນຢ່າງດີ.

ມາໃນຕອນທ້າຍຂອງກອງປະຊຸມ ເພື່ອເຮັດໃຫ້ບົດສະຫຼຸບດັ່ງກ່າວມີເນື້ອໃນສົມບູນຂຶ້ນຕື່ມ ແລະ ສາມາດສ່ອງແສງໃຫ້ເຫັນໄດ້ທາງດ້ານຂໍ້ຄົງຄ້າງທີ່ຄວນຈະນຳໄປປັບປຸງ ບັນດາຜູ້ເຂົ້າຮ່ວມທີ່ປະຊຸມກໍໄດ້ແລກປ່ຽນຄຳຄິດຄຳເຫັນ ຕໍ່ກັບເນື້ອໃນ ແລະ ຂໍ້ສະເໜີ ໃນບາງດ້ານຕື່ມ ຕໍ່ກັບການລົງກໍ່ສ້າງຮາກຖານການເມືອງ ເພື່ອເປັນແນວທາງໃຫ້ແກ່ການລົງກໍ່ສ້າງຮາກຖານໃນຄັ້ງຕໍ່ໄປນັ້ນ ມິີຜົນສຳເລັດ ແລະ ຄຸນນະພາບ ດີຂຶ້ນກວ່າເກົ່າ, ພ້ອມດຽວກັນນັ້ນ ທ່ານ ຮສ ສະໜຸດທອງ ສົມພານິດ ໄດ້ເປັນກຽດຕາງໜ້າ ສມປຊ ຂຶ້ນມອບໃບຊົມເຊີຍໃຫ້ຄະນະພັກເມືອງ, ກຸ່ມບ້ານສີເກີດ ແລະ ກຸ່ມບ້ານນາຊາຍທອງ ແລະ ຕາງໜ້າຄະນະອຳນາດການປົກຄອງບ້ານ 16 ບ້ານ ພ້ອມທັງໄດ້ໂອ້ລົມ ແລະ ສະແດງຄວາມຍ້ອງຍໍຊົມເຊີຍຕໍ່ກັບຜົນສຳເລັດຂອງ ນັກສຶກສາທັງ 2 ຮຸ່ນດັ່ງກ່າວ ທີ່ໄດ້ທຸ່ມເທເຫື່ອແຮງ, ສະຕິປັນຍາ ຕໍ່ກັບການລົງກໍ່ຮາກຖານການເມືອງ ຢູ່ທັງ 2 ກຸ່ມບ້ານ ໃຫ້ມີໃບໜ້າໃໝ່ ແລະ ໄດ້ຊີ້ທິດໃຫ້ແກ່ຄະນະຮັບຜິດຊອບການລົງກໍ່ສ້າງຮາກຖານການເມືອງ ໃນຄັ້ງຕໍ່ໄປນັ້ນ ສັງລວມເອົາບົດຮຽນ, ປະສົບການໃນຄັ້ງນີ້ ເພື່ອເປັນບ່ອນອີງໃນການຈັດຕັ້ງການການລົງຮາກຖານໃນຄັ້ງຕໍ່ໄປໃຫ້ມີປະສິດທິຜົນຂຶ້ນກວ່າເກົ່າ.

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ