ຄະນະບໍລິຫານງານຊາວໜຸ່ມ ສມປຊ ນຳພາ ສະມາຊິກຊາວໜຸ່ມ ແລກປ່ຽນບົດຮຽນຮ່ວມກັບ ຄະນະບໍລິຫານງານຊາວໜຸ່ມ ແຂວງສະຫວັນນະເຂດ

ເພື່ອເປັນການຮັດແໜ້ນຄວາສາມັກຄີ ເວົ້າສະເພາະ ແມ່ນສອງຄະນະຊາວໜຸ່ມສະຖາບັນການເມືອງ ແລະ ການປົກຄອງແຫ່ງຊາດ ກັບ ຄະນະບໍລິຫານງານຊາວໜຸ່ມແຂວງສະຫວັນນະເຂດ ໃຫ້ນັບມື້ນັບເຕີບໃຫຍ່ເຂັ້ມແຂງ. ການພົບປະແລກປ່ຽນບົດຮຽນດັ່ງກ່າວໄດ້ມີຂຶ້ນໃນຕອນເຊົ້າຂອງວັນທີ 7 ກຸມພາ ທີ່ ຫ້ອງປະຊຸມ ໂຮງຮຽນການເມືອງ-ການປົກຄອງແຂວງສະຫວັນນະເຂດ ນຳພາຄະນະໂດຍ ສະຫາຍ ປອ ສາຍຄຳ ມູນມະນີວົງ ກຳມະການສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ ສມປຊ ພ້ອມດ້ວຍຄະນະຊາວໜຸ່ມຮາກຖານ ແລະ ສະມາຊິກ 22 ສະຫາຍ, ຍິງ 7 ສະຫາຍ ໂດຍໃຫ້ການຕ້ອນຮັບຂອງ ສະຫາຍ ລຳແກ້ວ ແສງໜູທອງ ກຳມະການສູນກາງຊາວໜຸ່ມປະຊາຊົນປະຕິວັດ, ເລຂາຄະນະບໍລິຫານງານຊາວໜຸ່ມແຂວງສະຫວັນນະເຂດ ແລະ ຕາງໜ້າເລຂາຊາວໜຸ່ມຮາກຖານ ຢູ່ບັນດາພາຍໃນຂອງແຂວງ.

 

ຈຸດປະສົງ ຂອງການໄປພົບປະ ແລະ ແລກ ປ່ຽນບົດຮຽນ ໃນຄັ້ງນີ້ແມ່ນເພື່ອແລກປ່ຽນບົດຮຽນການຊີ້ນຳ-ນຳພາວຽກງານຊາວໜຸ່ມ 4 ບຸກຂອງຄະນະຊາວໜຸ່ມແຂວງສະຫວັນນະເຂດ ເຊິ່ງແຂວງດັ່ງກ່າວແມ່ນໄດ້ຮັັບນາມມະຍົດເປັນຊາວໜຸ່ມ 4 ບຸກ ໃນຕົ້ນປີນີ້ ແລະ ຈຸດປະສົງແລກປ່ຽນ ເພື່ອປະກອບສ່ວນ ກະກຽມກອງປະຊຸມໃຫຍ່ 3 ຂັ້ນຂອງຄະນະຊາວໜຸ່ມ ສມປຊ.

ໃນລະຫວ່າງການແລກປ່ຽນ ສະຫາຍ ລຳແກ້ວ ແສງໜູທອງ ໄດ້ຂຶ້ນລາຍງານສະພາບ ແລະ ຈຸດພິເສດຂອງການຊີ້ນຳ-ນຳພາວຽກງານຊາວໜຸ່ມ 4 ບຸກຂອງແຂວງສະຫວັນນະເຂດ ແລະ ແລກປ່ຽນເນື້ອໃນບາງດ້ານກ່ຽວກັບຊາວໜຸ່ມ 4 ບຸກກັບ ຄະນະຊາວໜຸ່ມ ສມປຊ ແລະ ໄດ້ພ້ອມກັນຕີລາຄາຄືນບັນດາຜົນງານ ແລະ ຂໍ້ຄົງຄ້າງທີ່ສາມາດຖອດຖອນໄດ້ ໃນໄລ ຍະຜ່ານມາ. ນອກນັ້ນ, ສະຫາຍ ລຳແກ້ວ ແສງໜູທອງ ໄດ້ຍົກແບບແຜນວິທີເຮັດວຽກຂອງຊາວໜຸ່ມແຂວງສະຫວັນນະເຂດ ແມ່ນເລັ່ງໃສ່ການແກ້ໄຂວຽກງານຢ່າງມີຈຸດສຸມ ແລະ ມີເປົ້າໝາຍຢ່າງຊັດເຈນ ກໍຄືມີແຜນການ, ແຜນງານ ແລະ ໂຄງການລະອຽດ ຢ່າງໜ້ອຍ 2-3 ວຽກຈຸດສຸມຂອງແຕ່ລະຂະແໜງ ເພື່ອເຄື່ອນໄຫວໃນແຕ່ລະປີ ເຊິ່ງໄດ້ຜັນຂະຫຍາຍມາຈາກ 7 ແຜນງານ 42 ໂຄງການແຜນຍຸດທະສາດການພັດທະນາຊາວໜຸ່ມ-ເຍົາວະຊົນ ທີ່ສູນກາງວາງອອກ, ສໍາລັບແຂວງພວກເຮົາ ມີ 28 ໂຄງການ, ຄຽງຄູ່ກັບການຈັດຕັ້ງປະຕິບັດໄດ້ເອົາໃຈໃສ່ ເຄື່ອນໄຫວຢູ່ຂັ້ນຮາກຖານ, ມີການຕິດຕາມກວດກາ ແລະ ສະຫຼຸບຖອດຖອນບົດຮຽນໃນແຕ່ລະໄລຍະ ລາຍງານໃຫ້ສາຍຕັ້ງ ແລະ ສາຍຂວາງຢ່າງເປັນປົກກະຕິ. ປະຕິບັດການສ່ອງແສງກັບແຕ່ຂະແຫນງການຢ່າງເປັນປົກກະຕິປະຈຳອາທິດ ແລະ ປະຈຳເດືອນ, ນອກຈາກນິີ້ ທຸກໆວັນທີ 14 ຈະມີການສ່ອງແສງວຽກງານຊາວໜຸ່ມຮາກຖານ ແລະ ໜ່ວຍອ້ອມຂ້າງແຂວງ, ເຊິ່ງແຕ່ລະຄັ້ງຂອງການຮ່ວມປະຊຸມ ສະຖານທີ່ແມ່ນຂຶ້ນກັບແຕ່ລະຮາກຖານທີ່ມີເງື່ອນໄຂ ຜັດປ່ຽນກັນເປັນເຈົ້າພາບ, ກອງປະຊຸມຄະນະເລຂາຈະມີອາທິດລະຄັ້ງ, ກອງປະຊຸມຄະນະປະຈໍາຊາວໜຸ່ມ 3 ເດືອນ ແລະ ກອງປະຊຸມສະຫຼຸບປະຈໍາປີຕິດພັນກັບກອງປະຊຸມຄົບຄະນະບໍລິຫານງານຊາວໜຸ່ມແຂວງແມ່ນຈັດປີລະຄັ້ງ. ການລາຍງານດັ່ງກ່າວນັ້ນ, ສະຫາຍ ປອ ສາຍຄຳ ມູນມະນີວົງ ພ້ອມດ້ວຍຄະນະ ໄດ້ໃຫ້ຄວາມສົນໃຈຕໍ່ກັບແບບແຜນ ແລະ ພ້ອມກັນສົນທະນາແລກປ່ຽນ ຕໍ່ກັບແບບແຜນການຊີ້ນຳ-ນຳພາຂອງຄະນະຊາວໜຸ່ມແຂວງສະຫວັນນະເຂດ.

ມາໃນຕອນເຊົ້າຂອງວັນທີ 8 ຄະນະຊາວໜຸ່ມ ສມປຊ ໄດ້ເຄື່ອນໄຫວທັດສະນະສຶກສາ ເຂດເສດຖະກິດພິເສດສະ ຫວັນ-ເຊໂນ ໂດຍໃຫ້ການຕ້ອນຮັບ ແລະ ນຳພາທັດສະນະໂດຍ ທ່ານ ສຸກສາຄອນ ໄຊຊະນະ ຫົວໜ້າພະແນກສົ່ງເສີມການລົງທຶນ-ນິຕິກຳ ເພື່ອໃຫ້ຄະນະສະມາຊິກຊາວໜຸ່ມ ສມປຊ ຕິດຕາມເບິ່ງສະພາບດຳເນີນກິດຈະການຕົວຈິງຂອງການລົງທຶນໃນ ເຂດເສດຖະກິດພິເສດ ສະຫວັນ-ເຊໂນ ຢູ່ຈຸດຕ່າງໆ ໂດຍສະເພາະການລົງທຶນໂດຍກົງຈາກຕ່າງປະເທດ ທີ່ມີບໍລິສັດເຂົ້າມາລົງທຶນນັບມື້ນັບເພີ່ມຂຶ້ນ ພ້ອມທັງຮັບຟັງການລາຍງານສະພາບການລວມ ຂໍ້ສະດວກ, ສິ່ງທ້າທາຍ ແລະ ແຜນການຮອງຮັບການດຶງດູດການລົງທຶນໃນອະນາຄົດ ແລະ ເຂດດັ່ງກ່າວ, ເປັນເຂດ ສ້າງວຽກເຮັດງານທຳໃຫ້ແກ່ປະຊາຊົນລາວ ແລະ ຍັງມີຫຼາຍບໍລິສັດໃຫ້ຄວາມສົນໃຈມາລົງທຶນຕື່ມອີກ.

    ການພົບປະແລກປ່ຽນບົດຮຽນຄັ້ງນີ້ ສະມາຊິກຊາວໜຸ່ມ ສມປຊ ແມ່ນສາມາດ ຖອດຖອນບົດຮຽນໄດ້ຫຼາຍດ້ານ ໂດຍສະເພາະບົດຮຽນກ່ຽວການຊີ້ນຳ-ນຳພາວຽກງານ 4 ບຸກຂອງແຂວງສະຫວັນນະເຂດ ແລະ ການແກ້ໄຂຂໍ້ຄົງຄ້າງ. ນອກນັ້ນ, ສະມາຊິກຊາວໜຸ່ມ ຍັງສາມາດນຳເອົາເນື້ອໃນຈິດໃຈດັ່ງກ່າວຂອງການພົບປະແລກປ່ຽນຄັ້ງນີ້ ນຳໄປຜັນຂະຫຍາຍ-ພັດທະນາ ໃຫ້ແຕ່ລະຊາວໜຸ່ມຮາກຖານ ໄດ້ຮັບຮູ້ຂຶ້ນຕື່ມກ່ຽວກັບວຽກງານ 4 ບຸກ.

ປະມວນຮູບພາບ ການເຄື່ອນໄຫວການພົບປະແລກປ່ຽນບົດຮຽນ

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ