ສໍາເລັດການຝຶກອົບຮົມທິດສະດີການເມືອງ-ການປົກຄອງໄລຍະສັ້ນ 45 ວັນ ຊຸດທີ I ໃຫ້ແກ່ພະນັກງານ, ຄູ-ອາຈານ ຮຸ່ນໜຸ່ມຢູ່ ສມປຊ

ໃນຕອນແລງວັນທີ 4 ກຸມພາ ປີ 2019 ທີ່ຫ້ອງປະຊຸມຊັ້ນ 3 ຫ້ອງ 302 ຂອງ ສມປຊ ໄດ້ສະຫຼຸບບັ້ນການຝຶກອົບຮົມທິດສະດີການເມືອງ-ການປົກຄອງໄລຍະສັ້ນ 45 ວັນ ຊຸດທີ I ປີ 2018 ໄດ້ເລີ່ມແຕ່ວັນທີ 12 ພະຈິກ 2018 ເປັນຕົ້ນມາ ແລະ ໃນວັນທີ 4 ກຸມພາ 2019 ຈຶ່ງສໍາເລັດຕາມຫຼັກສູດ ແລະ ເພື່ອເປັນການສະຫຼຸບຄືນຜົນການຈັດຕັ້ງປະຕິບັດ ຄະນະຮັບຜິດຊອບໄດ້ຈັດກອງປະຊຸມຂຶ້ນ. ພາຍໃຕ້ການເປັນປະທານຂອງ ທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ, ສະມາຊິກສະພາແຫ່ງຊາດ ຊຸດທີ VIII, ເລຂາຄະນະບໍລິຫານງານພັກ, ຫົວໜ້າ ສມປຊເຂົ້າຮ່ວມໃນພິທີຄັ້ງນີ້ມີທ່ານຫົວໜ້າຫ້ອງການກົມຄະນະວິຊາ, ສູນຂໍ້ມູນຂ່າວສານ ການເມືອງ-ການປົກຄອງ ພ້ອມດ້ວຍນັກຝຶກອົບຮົມ.

 ໃນພິທີ ທ່ານ ປທ ນ. ໃບຊ່ຽນ ມູນຕີວົງ ຄະນະພັກ, ຫົວໜ້າກົມຈັດຕັ້ງ-ພະນັກງານ ໄດ້ຂຶ້ນຜ່ານບົດສະຫຼຸບການຝຶກອົບຮົມຊຸດທີ I ປີ 2018 ເຊິ່ງມີນັກຝຶກອົບຮົມເຂົ້າຮ່ວມທັງໝົດຈໍານວນ 30 ທ່ານ, ຍິງ 10 ທ່ານ. ຜ່ານການຈັດຕັ້ງການຝຶກ ແລະ ຄົ້ນຄວ້າຮໍ່າຮຽນເຫັນວ່າ: ຄູ-ອາຈານສອນ ລ້ວນແລ້ວແຕ່ເປັນຜູ້ທີ່ມີປະສົບການ, ມີວຸດທິການສຶກສາລະດັບສູງ ແລະ ໄດ້ເອົາໃຈໃສ່ຄົ້ນຄວ້າ, ແຕ່ງບົດສອນ ແລະ ຖ່າຍຖອດຄວາມຮູ້ຢ່າງຕັ້ງໜ້າ ເໝາະສົມກັບໄລຍະເວລາຂອງຫຼັກສູດ ເຮັດໃຫ້ນັກຝຶກອົບຮົມໄດ້ຮັບຮູ້ເຂົ້າໃຈແຈ້ງ; ທາງດ້ານສື່ການສອນມີປຶ້ມແບບຮຽນສະໜອງໃຫ້ນັກຝຶກອົບຮົມ ເພື່ອການຄົ້ນຄວ້າຮໍ່າຮຽນຢ່າງພຽງພໍ; ສະຖານທີ່ໃນຈັດຝຶກອົບຮົມແມ່ນເໝາະສົມ ແລະ ສະດວກສະບາຍພໍສົມຄວນ.

ທາງດ້ານນັກຝຶກອົບຮົມກໍເອົາໃຈໃສ່ປະຕິບັດໂມງເວລາຂຶ້ນຫ້ອງຮຽນຢ່າງເຂັ້ມງວດ, ມີຄວາມບຸກບືນ, ຫ້າວຫັນໃນການຄົ້ນຄວ້າຮໍ່າຮຽນ, ແລກປ່ຽນຄວາມຮູ້, ປະສົບການ, ປະກອບຄໍາຄິດຄໍາເຫັນກັບຄູ-ອາຈານສອນ ກັບນັກຝຶກອົບຮົມດ້ວຍກັນ ແບບກົງໄປກົງມາ, ຕັ້ງໃຈຟັງການບັນລະຍາຍ, ຮັດແໜ້ນຄວາມສາມັກຄີ ຊ່ວຍເຫຼືອ, ຮັກແພງເຊິ່ງກັນ ແລະ ກັນ ແລະ ຄົ້ນຄວ້າເອກສານຢ່າງສຸດກົກສຸດປາຍ.

ຕະຫຼອດໄລຍະການຝຶກອົບຮົມຄະນະພັກ, ຄະນະອໍານວຍການຂອງການສະຖາບັນການເມືອງ ແລະ ການປົກຄອງແຫ່ງຊາດ ຕະຫຼອດຮອດຄະນະຮັບຜິດຊອບໄດ້ເອົາໃຈໃສ່ຊີ້ນໍາ-ນໍາພາ ແລະ ຕິດຕາມກວດກາຢ່າງເປັນປົກຕິ ແລະ ຕໍ່ເນື່ອງ ເຮັດໃຫ້ຊຸດຝຶກອົບຮົມໃຫ້ແກ່ສະມາຊິກພັກ-ພະນັກງານໜຸ່ມຮຸ່ນສືບທອດຂອງສະຖາບັນການເມືອງ ແລະ ການປົກຄອງແຫ່ງຊາດ ສໍາເລັດຕາມລະດັບຄາດໝາຍ.

ເພື່ອເປັນການຢັ້ງຢືນຜົນສໍາເລັດໃນພິທີຍັງໄດ້ມີການຈັດຕັ້ງມອບ-ຮັບໃບຢັ້ງຢືນໃຫ້ແກ່ນັກຝຶກອົບຮົມທັງໝົດ ເຊິ່ງໃຫ້ກຽດມອບ ໂດຍທ່ານ ຮສ ປອ ທອງສະລິດ ມັງໜໍ່ເມກ ປະທານກອງປະຊຸມ. ຈາກນັ້ນທ່ານ ປະທານໄດ້ໂອລົມຕໍ່ທີ່ປະຊຸມ ແລະ ເນັ້ນໜັກໃຫ້ຜູ້ທີ່ສໍາເລັດການຝຶກອົບຮົມ ຈົ່ງຕັ້ງໜ້ານໍາເອົາບົດຮຽນທີ່ໄດ້ໄປໝູນໃຊ້ເຂົ້າໃນໜ້າທີ່ວຽກງານໃຫ້ດອກອອກຜົນ ແລະ ມີຜົນສໍາເລັດ.

ບັນນາທິການ: ທ່ານ ປທ ນ. ຄຳຮູ້ ວິລະທອນ

ພາບ: ທ່ານ ຕາອັອດ ແສນທະວີສຸກ

ຂ່າວ: ທ່ານ ນ. ພູວຽງ ແກ້ວສີມີໄຊ