ພິທີເຊັນບົດບັນທຶກການຮ່ວມມື 3 ຝ່າຍ ແລະ ກອງປະຊຸມສຳມະນາວິທະຍາສາດ ທີ່ ສະຖາບັນການເມືອງ ແລະ ການປົກຄອງແຫ່ງຊາດ

ໃນວັນສຸກ 18 ມັງກອນ 2019 ທ້າຍອາທິດຜ່ານມາ ໃນເວລາ 8:20 ໂມງ ຢູ່ທີ່ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ໄດ້ຈັດພິທີເຊັນບົດບັນທຶກການຮ່ວມມື 3 ຝ່າຍເຊິ່ງປະກອບມີ ສມປຊ, ວິທະຍາຄານປ້ອງກັນຊາດ ໄກສອນ ພົມວິຫານ ແລະ ວິທະຍາຄານສັນຕິບານປະຊາຊົນ ໂດຍການເປັນປະທານຮ່ວມລົງນາມຂອງ ທ່ານ ຮສ ປອ    ທອງສະລິດ ມັງໜໍ່ເມກ ກໍາມະການສູນກາງພັກ, ຫົວຫນ້າສະຖາບັນການເມືອງ ແລະ ການປົກຄອງແຫ່ງຊາດ, ທ່ານ ພົຕ   ຄໍາຫຼ້າ ພັນໄຊຍະສຸກ ຫົວໜ້າການເມືອງ ວິທະຍາຄານປ້ອງກັນຊາດ ໄກສອນ ພົມວິຫານ, ທ່ານ ພົຈວ ປອ ວັນເຮືອງ ນັນທະຈັກ ອໍານວຍການວິທະຍາຄານສັນຕິບານປະຊາຊົນ.

 ການຮ່ວມມືລົງນາມໃນຄັ້ງນີ້ແມ່ນເພື່ອປະກອບສ່ວນຍົກສູງບົດບາດ ຂອງສະຖາບັນການສຶກສາແຫ່ງຊາດ ຢູ່ ສປປ ລາວ ໃຫ້ນັບມື້ເຂັ້ມແຂງຂຶ້ນ ໃນການຄົ້ນຄວ້າສິດສອນທິດສະດີ ແລະ ພຶດຕິກໍາ ໃນເງື່ອນໄຂໃໝ່ໃຫ້ກ້າວໄປສູ່ຄຸນນະພາບໃໝ່, ເຊິ່ງເນື້ອໃນບົດບັນທຶກໄດ້ປະກອບດ້ວຍການຮ່ວມມືໃນຂົງເຂດການສິດສອນ, ຂົງເຂດການຄົ້ນຄວ້າວິທະຍາສາດ, ຂົງເຂດແລກປ່ຽນ ແລະ ສະໜອງຂໍ້ມູນຂ່າວສານ ພ້ອມທັງການຈັດຕັ້ງປະຕິບັດ ເຊິ່ງແຕ່ລະຝ່າຍຈະໄດ້ພ້ອມກັນສ້າງໂຄງການຮ່ວມມືຕາມເນື້ອໃນຂອງບົດບັນທຶກ ໂດຍເລີ່ມແຕ່ໄລຍະ 2019-2024.

  ເວລາ 9:00 ໂມງ ຂອງວັນດຽວກັນທັງ 3 ຝ່າຍໄດ້ເຂົ້າຮ່ວມກອງປະຊຸມສໍາມະນາວິທະຍາສາດ ເພື່ອຊົມເຊີຍວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີພາຍໃຕ້ຫົວຂໍ້: ວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນໃນເງື່ອນໄຂໃໝ່, ພາຍໃຕ້ການເປັນປະທານຮ່ວມຂອງທ່ານ ຮສ ປອ ທອງສະລິດ ມັງໜໍ່ເມກ, ທ່ານ ພົຕ ຄໍາຫຼ້າ ພັນໄຊຍະສຸກ, ທ່ານ ພົຈວ ປອ ວັນເຮືອງ ນັນທະຈັກ, ບັນດາຜູ້ເຂົ້າຮ່ວມກອງປະຊຸມປະກອບມີ ພະນັກຂອງວິທະຍາຄານປ້ອງກັນຊາດ ໄກສອນ ພົມວິຫານ, ວິທະຍາຄານສັນຕິບານປະຊາຊົນ ແລະບັນດາອົງການອ້ອມຂ້າງສູນກາງ.

ກອງປະຊຸມສໍາມະນາ ໄດ້ດໍາເນີນໄປດ້ວຍເນື້ອໃນທີ່ມີຄວາມອຸດົມສົມບູນ ສ່ອງແສງໃຫ້ເຖິງບັນຫາໃໝ່ ກ່ຽວກັບວຽກງານປ້ອງກັນຊາດ-ປ້ອງກັນຄວາມສະງົບ ໃນເງື່ອນໄຂເຊື່ອມໂຍງ ແລະ ການປະຕິວັດອຸດສາຫະກໍາຄັ້ງ ທີ 4.0.ບັນດານັກວິທະຍາສາດ ແລະ ແຂກເຂົ້າຮ່ວມກອງປະຊຸມໄດ້ສຸມຈິດສຸມໃຈຮັບຟັງ ແລະ ພ້ອມກັນປະກອບ ຄໍາຄິດຄໍາເຫັນ, ສົນທະນາກັນ, ແລກປ່ຽນບົດຮຽນ ເຕັມໄປດ້ວຍບັນຍາກາດທີ່ຟົດຟື້ນ ແລະ ມີຄວາມໝາຍເລິກເຊິ່ງ, ເນື້ອໃນບົດປະກອບຄໍາເຫັນຂອງນັກວິທະຍາສາດ ແລະ ແຂກເຂົ້າຮ່ວມກອງປະຊຸມໄດ້ສຸມໃສ່ບັນດາເນື້ອໃນສໍາຄັນຄື:

- ບັນດານັກວິທະຍາສາດ ໄດ້ພ້ອມກັນຄົ້ນຄວ້າທິດສະດີ ສ້າງຄວາມກະຈ່າງແຈ້ງ ກ່ຽວກັບພື້ນຖານປ້ອງກັນຊາດທົ່ວປວງຊົນໃນເງື່ອນໄຂໃໝ່, ໂດຍມີພື້ນຖານບ່ອນອີງທາງດ້ານວິທະຍາສາດ ທີ່ໜາແໜ້ນ, ໄດ້ມີການຊີ້ແຈງບັນດາເນື້ອໃນການສ້າງພື້ນຖານປ້ອງກັນຊາດທົ່ວປວງຊົນຂ້ອນຂ້າງຈະແຈ້ງ, ຮັດກຸມ, ຮັບປະກັນໄດ້ລັກສະນະພັກ, ລັກສະນະວິທະຍາສາດ, ລັກສະນະປະດິດສ້າງ ແລະ ລັກສະນະຍຸກສະໄຫມ. ພ້ອມດຽວກັນນີ້ ຍັງໄດ້ນໍາສະເໜີບັນດາແນວຄວາມຄິດທີ່ດີ, ທັດສະນະທີ່ມີປະໂຫຍດ ເຊິ່ງຈະກາຍເປັນຊ່ອງທາງໃນການປັບປຸງກໍ່ສ້າງກໍາລັງປ້ອງກັນຊາດໃຫ້ເຂັ້ມແຂງ, ໜັກແໜ້ນ ແລະ ມີແບບແຜນທີ່ທັນສະໄໝ.

- ນັກວິທະຍາສາດໄດ້ໃຫ້ຄວາມກະຈ່າງແຈ້ງທາງດ້ານທິດສະດີກ່ຽວກັບເນື້ອໃນຄວາມສະຫງົບໃໝ່ ຊຶ່ງໄດ້ເນັ້ນໜັກເຖິງຄວາມສະຫງົບດ້ານເສດຖະກິດ, ການເມືອງພາຍໃນ, ດ້ານສັງຄົມ, ການສື່ສານ, ການຍາດແຍ່ງອະທິປະໄຕໃນຊາຍແດນ, ການກໍ່ການຮ້າຍ, ການປ່ຽນແປງຂອງດິນຟ້າອາກາດ ແລະ ອື່ນໆ. ພ້ອມນີ້ ຍັງໄດ້ນໍາສະເໜີຂໍ້ມູນພຶດຕິກໍາຕໍ່ກັບຮູບແບບຄວາມສະຫງົບໃໝ່ທີ່ເກີດຂຶ້ນຈາກພຶດຕິກໍາຂອງບັນດາອົງການ ແລະ ບຸກຄົນພະນັກງານ, ນັກຮົບ, ນັກວິທະຍາສາດ ໄດ້ຄົ້ນຄວ້າຊອກຫາບັນດາສາເຫດ, ເງື່ອນໄຂຂອງການກໍາເນີດ ແລະ ແຜ່ລາມຂອງບັນດາ ບັນຫາຂົ່ມຂູ່ຈາກຄວາມສະຫງົບໃໝ່, ຊອກໃຫ້ເຫັນສາຍພົວພັນຂອງບັນຫາດັ່ງກ່າວ ກັບບັນດາບັນຫາທີ່ເປັນຈຸດອ່ອນ, ຊ່ອງຫວ່າງໃນການດໍາລົງຊີວິດສັງຄົມ, ເປັນຕົ້ນແມ່ນບັນຫາທີ່ເດືອດຮ້ອນໃນສັງຄົມ: ໄພຫວ່າງງານ, ການແຕກໂຕນ ຂວ້າຮັ່ງ-ຂວ້າທຸກ, ການເສື່ອມຖອຍຄຸນສົມບັດ-ຄຸນທາດ, ຄວາມບໍ່ຄ່ອງໃນການວາງແນວທາງນະໂຍບາຍ, ແຜນນະໂຍບາຍ ຫຼືລະບຽບກົດຫມາຍ; ໄດ້ຊີ້ໃຫ້ເຫັນແຈ້ງກ່ຽວກັບລັກສະນະ, ລະດັບ, ຂະຫນາດຜົນກະທົບ ຂອງບັນຫາ ຄວາມສະຫງົບໃໝ່ ທີ່ມີຕໍ່ພາລະກິດສ້າງສາ ແລະພັດທະນາເສດຖະກິດ-ສັງຄົມ ຂອງປະເທດເຮົາ.

 

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ