ສອງສະຖາບັນຮ່ວມລົງນາມເຊັນບົດບັນທຶກການຮ່ວມມືໄລຍະ 2019-2023 ແລະ ຈັດຕັ້ງປະກາດຜະລິດຕະພັນແປປື້ມນິພົນໂຮ່ຈີມິນຄົບຊຸດ ເຫຼັ້ມ V, ເຫຼັ້ມ VII ແລະ ເຫຼັ້ມ VIII

ເພື່ອເປັນການສືບຕໍ່ສາຍພົວພັນມິດຕະພາບ ທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ສະຖາບັນການເມືອງ ແລະ ການປົກຄອງແຫ່ງຊາດລາວກັບສະຖາບັນການເມືອງແຫ່ງຊາດ ໂຮ່ຈີມິນ. ດັ່ງນັ້ນ, ໃນວັນທີ 15 ມັງກອນ 2019 ໄດ້ມີພິທີເຊັນບົດບັນທຶກການຮ່ວມມື ໄລຍະ 2019-2023 ຢູ່ສະຖາບັນການເມືອງ ແລະ ການປົກຄອງແຫ່ງຊາດ ລາວຂຶ້ນ ເຊິ່ງຕາງໜ້າຝ່າຍລາວໂດຍທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກ, ສະມາຊິກສະພາແຫ່ງຊາດ ຊຸດທີ 8, ເລຂາຄະນະບໍລິຫານງານພັກ, ຫົວໜ້າ ສະຖາບັນການເມືອງ ແລະ ການປົກຄອງແຫ່ງຊາດພ້ອມດ້ວຍຄະນະ ແລະ ຝ່າຍຫວຽດນາມແມ່ນ ທ່ານ ຫງວຽນ ຊວນ ຖັງ ເລຂາທິການສູນກາງພັກ, ປະທານສະພາທິດສະດີສູນກາງພັກ, ຫົວໜ້າສະຖາບັນການເມືອງແຫ່ງຊາດ ໂຮ່ຈີມິນ ສສ ຫວຽດນາມ ພ້ອມດ້ວຍຄະນະ, ເຂົ້າຮ່ວມເປັນສັກຄີພິຍານມີທ່ານ ສຈ ປອ ກິແກ້ວ ໄຂຄຳພິທູນ ເລຂາທິການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະໂຄສະນາອົບຮົມສູນກາງພັກ, ທ່ານ ຫວງຽນ ບາ ຮຸ່ງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສສ ຫວຽດນາມ, ຄະນະພົວພັນຕ່າງປະເທດສູນກາງພັກ, ຄະນະຈັດຕັ້ງສູນກາງພັກ, ຄະນະກຳມະການລາວ-ຫວຽດນາມໃນໂອກາດນີ້, ສອງຝ່າຍໄດ້ສະແດງຄວາມຍິນດີຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງສອງສະຖາບັນທີ່ໄດ້ສືບຕໍ່ ແລະ ທີ່ຜ່ານມາໄດ້ຮັບການເສີມຂະຫຍາຍໃນຫຼາຍໆດ້ານ, ເຊິ່ງສອດຄ່ອງກັບຫຼັກການພື້ນຖານທີ່ລະບຸໄວ້ໃນຖະແຫຼງການຮ່ວມມືຂອງສອງປະເທດ ເພື່ອເປັນການຕອບສະໜອງກັບຜົນປະໂຫຍດລວມຂອງປະຊາຊົນສອງຊາດລາວ-ຫວຽດນາມ ຢ່າງແທ້ຈິງ.

 

ພາຍຫຼັງສໍາເລັດການເຊັນບົດບັນທຶກຮ່ວມມື, ທັງສອງຝ່າຍໄດ້ຈັດຕັ້ງພິທີປະກາດຜະລິດຕະພັນການແປນິພົນ ໂຮ່ຈີມິນ ຄົບຊຸດ ຈາກພາສາຫວຽດນາມມາເປັນພາສາລາວເຫຼັ້ມ V, ເຫຼັ້ມ VII ແລະ ເຫຼັ້ມ VIII. ໃນນັ້ນ, ຄະນະຮັບຜິດຊອບທັງສອງຝ່າຍໄດ້ມີຄຳເຫັນຕໍ່ກັບຜົນສຳເລັດການແປນິພົນ ໂຮ່ຈີມິນ ຄົບຊຸດຄັ້ງນີ້, ເປັນຕົ້ນເຫຼັ້ມ Vເຊິ່ງລວມມີບັນດາເນື້ອຕີລາຄາ​​ໄດ້ສະພາບການ, ມີການປຽບທຽບຊັ່ງຊາກຳລັງລະຫວ່າງຕົນເອງກັບສັດຕູຢ່າງຊັດເຈນ,ພ້ອມທັງໄດ້ວາງແຜນແລະກຳນົດແນວທາງໃນການຕໍ່ຕ້ານ, ສ້າງສາປະເທດຊາດຢ່າງຖືກຕ້ອງ. ​ເນື້ອໃນຂອງນິພົນແມ່ນສ່ອງແສງຢ່າງເລິກເຊິ່ງ ​​ເຖິງທັດສະນະ, ຍຸດທະສາດ, ຍຸດໂທບາຍການປະຕິວັດອັນຄ່ອງແຄ້ວມີວິທະຍາສາດຂອງປະທານໂຮ່ຈີມິນ, ເຫຼັ້ມ VII ແມ່ນມີເນື້ອໃນ ວິໄສທັດຍຸດທະສາດແລະແຜນນະໂຍບາຍພາຍໃນແລະຕ່າງປະເທດ, ​ແຜນນະໂຍບາຍການກໍ່ສ້າງແລະພັດທະນາກຳລັງປະກອບອາວຸດ; ​ແຜນນະໂຍບາຍໃນການພັດທະນາກຳລັງທະຫານປະທານໂຮ່ຈີມິນໄດ້ “​​ເຮັດໃຫ້ກຳລັງຂອງທະຫານກອງຫຼອນກາຍເປັນຕາໜ່າງເຫຼັກທີ່ກວ້າງຂວາງແລະແໜ້ນໜາ, ກາງໄວ້ທົ່ວທຸກບ່ອນ, ສັດຕູຈອບມາຮອດ​​ໃສກໍຈະຖືກຕາໜ່າງຮອດຫັ້ນແລະ ເຫຼັ້ມ VIII ສ່ອງແສງເຖິງການເຄື່ອນໄຫວອັນອຸດົມສົມບູນ, ຟົດຟື້ນແລະການນຳພາອັນສະຫຼາດສ່ອງ​​ໃສຂອງປະທານໂຮ່ຈີມິນຕໍ່ບັນຫາຂອງຊາດ​ ​ແນໃສ່ປະຕິບັດໜ້າທີ່ ສຳຄັນໃຫ້ປະສົບຜົນສຳເລັດ. 

ຜະລິດຕະພັນການແປຄັ້ງນີ້ແມ່ນໝາກຜົນອັນຍິ່ງໃຫຍ່ຂອງສອງປະເທດ ກໍຄືສອງສະຖາບັນ, ເປັນຜະລິດຕະພັນໜຶ່ງທີ່ຈໍາເປັນ ປະກອບສ່ວນຮັບໃຊ້ໃຫ້ແກ່ການບຳລຸງສ້າງພະນັກງານ, ນັກວິທະຍາສາດທິດສະດີ ການເມືອງ-ການປົກຄອງ ແລະ ຮັບໃຊ້ໃຫ້ການປັບປຸງແນວທາງແຜນນະໂຍບາຍຂອງພັກ ປະຊາຊົນປະຕິວັດລາວ ໃນແຕ່ລະໄລຍະໃຫ້ສົມບູນຂຶ້ນກວ່າເກົ່າ.ໃຫ້ກຽດກ່າວມອບໂດຍທ່ານ ຫງວຽນ ຊວນ ຖັງ ແລະ ກ່າວຮັບໂດຍທ່ານ ຮສ ປອ ທອງສະລິດ ມັງໜໍ່ເມກ. ພາຍໃຕ້ການເຂົ້າຮ່ວມເປັນສັກຂີພິຍານ ແລະ ຮ່ວມຊົມເຊີຍຂອງບັນດາພາກສ່ວນທີ່ກ່ຽວຂ້ອງທັງສອງຝ່າຍ, ພະນັກງານຄູອາຈານ ແລະ ນັກສຶກສາທົ່ວສະຖາບັນການເມືອງ ແລະ ການປົກຄອງແຫ່ງຊາດ.

ບັນນາທິການ: ທ່ານ ປທ ນ. ຄຳຮູ້ ວິລະທອນ

ຂ່າວ: ທ່ານ ຕາອັອດ ແສນທະວີສຸກ

ພາບ: ທ່ານ ນ. ດອກໄມ້ ຈັນດາລາ