ຄະນະວິຊາບໍລິຫານສາດ ສະຫຼຸບຜົນງານການຈັດຕັ້ງປະຕິບັດການຮຽນ-ການສອນ

ກອງປະຊຸມສະຫຼຸບຖອດຖອນບົດຮຽນດັ່ງກ່າວໄດ້ຈັດຂຶ້ນໃນວັນທີ 11 ກັນຍາ 2018 ໂດຍການເປັນປະທານຂອງ ທ່ານ ປທ ໝອນແກ້ວ ຈິດຕະລາດ ຮັກສາການຄະນະວິຊາບໍລິຫານສາດ, ເຂົ້າຮ່ວມມີ ພະນັກງານ, ຄູ-ອາຈານ ສອນຊ່ວຍ-ສອນປະຈຳຂອງຄະນະວິຊາທັງໝົດ ຈຳນວນ 40 ກວ່າທ່ານ.

 ບັນດາຜູ້ເຂົ້າຮ່ວມໄດ້ຮັບຟັງການຜ່ານບົດສະຫຼຸບ ແລະທິດທາງແຜນການການໃນຕໍ່ໜ້າຈາກທ່ານ ປອ ຄຳຫຼ້າ ລໍວານໄຊ ຮອງຫົວໜ້າຄະນະວິຊາບໍລິຫານສາດ ເຊິ່ງທ່ານໄດ້ຍົກໃຫ້ເຫັນເຖິງຈຸດດີ, ຂໍ້ຄົງຄ້າງທີ່ຄວນປັບປຸງແກ້ໄຂ ແລະຜົນງານທີ່ສາມາດຍາດມາໄດ້ໃນຕະຫຼອດໄລຍະ 1 ປີຜ່ານມາ, ເຊິ່ງໃນນັ້ນພົ້ນເ

ດັ່ນກໍແມ່ນ ຄະນະວິຊາບໍລິຫານສາດໄດ້ສຸມໃສ່ຂຶ້ນຫ້ອງສິດສອນທັງພາຍໃນ ແລະພາຍນອກ ທັງລະບົບບຳລຸງ-ກໍ່ສ້າງຢ່າງເຂັ້ມງວດ ລວມທັງໝົດ 1877 ຊົ່ວໂມງ; ຄຽງຄູ່ກັນນັ້ນກໍໄດ້ຈັດຕັ້ງປະຕິບັດການຄົ້ນຄວ້າຂຽນບົດລົງວາລະສານ ຈຳນວນ 05 ບົດ, ຜ່ານປື້ມ 5 ເດືອນ ແລະ 45 ວັນໄດ້ສຳເລັດຕາມແຜນການ.

ຫຼັງຈາກຜູ້ເຂົ້າຮ່ວມກອງປະຊຸມກໍໄດ້ປະກອບຄຳຄິດຄຳເຫັນ, ແລກປ່ຽນບົດຮຽນຮ່ວມກັນ ເຮັດໃຫ້ເນື້ອໃນບົດສະຫຼຸບ ກໍຄືທິດທາງແຜນການສົມບູນຍິ່ງຂຶ້ນ. ຫຼາຍທ່ານໄດ້ສະເໜີໃຫ້ຄະນະວິຊາຈະຕ້ອງໄດ້ປັບປຸງເນື້ອໃນບົດສະຫຼຸບບາງດ້ານໃຫ້ສອດຄ່ອງກັບຜົນງານຕົວຈິງ, ສັບຊ້ອນພະນັກງານ, ຄູ-ອາຈານໜຸ່ມ ທີ່ສອນຊ່ວຍໃຫ້ ຄະນະວິຊາ ໄດ້ມີສ່ວນຮ່ວມໃນການຕິດຕາມຂຶ້ນຫ້ອງສິດສອນ, ເປັນອະນຸກຳມະການ, ເຂົ້າຮ່ວມທັດສະນະສຶກສາແລກປ່ຽນຕາມສະຖານທີ່ຕ່າງໆ ເພື່ອຮັບຮູ້ ແລະເຂົ້າໃຈຂອງວຽກງານສິດສອນໃຫ້ຫຼາຍຂຶ້ນ.

ໃນຕອນທ້າຍຂອງກອງປະຊຸມ ທ່ານປະທານໄດ້ຮຽກຮ້ອງບັນດາຄູອາຈານທີ່ສອນຊ່ວຍ ແລະສອນປະຈຳທຸກຄົນ ຕ້ອງໄດ້ສືບຕໍ່ເພີ່ມທະວີເປັນເຈົ້າການໃນປັບປຸງ, ແຕ່ງບົດສອນ ໃຫ້ມີປະສິດທິພາບດີກວ່າເກົ່າກຳໄດ້ຫຼັກການສິດສອນແບບໃໝ່, ເອົາໃຈໃສ່ພັດທະນາຕົນເອງໃຫ້ເຂັ້ມແຂງຂຶ້ນນັບມື້ ດ້ວຍການຄົ້ນຄວ້າບົດວິທະຍາສາດ, ປະກອບສ່ວນຂຽນບົດວາລະສານໃຫ້ເພີ່ມຂຶ້ນ ແລະຫຼາກຫຼາຍບົດ ເພື່ອຍົກສູງບົດບາດຂອງຄູ-ອາຈານ ຄຽງຄູ່ກັບຂໍ້ແຂ່ງຂັນຄູ-ອາຈານ ສອນດີ-ສອນເກັ່ງ ພ້ອມກັນປັບປຸງຂອດທີ່ເປັນຂໍ້ຄົງຄ້າງໃຫ້ໄດ້ຮັບການແກ້ໄຂຢ່າງທັນການ ເພື່ອຫັນໄປສູ່ຄຸນນະພາບ ແລະຫັນເປັນມືອາຊີບ.

ບັນນາທິການ: ທ່ານ ປທ ນ. ຄຳຮູ້ ວິລະທອນ

ຂ່າວ/ພາບ: ທ່ານ ຕາອັອດ ແສນທະວີສຸກ