ລັດຖະກອນໃໝ່ຂອງສະຖາບັນການເມືອງ ແລະ ການປົກຄອງແຫ່ງຊາດ ຈຳນວນ 15 ຄົນໄດ້ສໍາເລັດການເຝິກອົບຮົມ

ທ່ານ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ ໄດ້ເປັນປະທານໃນບັ້ນເຝິກອົບຮົມລັດຖະກອນໃໝ່ ທີ່ຈັດຂຶ້ນໃນລະຫວ່າງວັນທີ 03-07 ກັນຍາ 2018 ເຊິ່ງທ່ານໄດ້ໂອ້ລົມຕໍ່ກັບລັດຖະກອນໃໝ່ ທັງໝົດ 15 ທ່ານ, ຍິງ 6 ທ່ານ ໄດ້ຮັບຮູ້, ເຂົ້າໃຈ, ເຊື່ອມຊຶມບັນດາແນວທາງນະໂຍບາຍຂອງພັກ ແລະກໍາແໜ້ນບັນດາຂໍ້ກໍານົດກົດໝາຍຂອງລັດ ແລະລະບຽບຫຼັກການຕ່າງໆທີ່ວາງອອກ ເພື່ອນຳໄປດັດປັບ, ໝູນໃຊ້ເຂົ້າໃນແບບແຜນວິທີເຮັດວຽກ, ບໍາລຸງສ້າງທັດສະນະຫຼັກໝັ້ນແນວຄິດການເມືອງ, ອຸດົມການ, ຄຸນສົມບັດສິນທໍາປະຕິວັດ ຂອງພະນັກງານ-ລັດຖະກອນ, ຍົກສູງຄວາມຕັດສິນໃຈ ແລະກຽມພ້ອມໃນການຈັດຕັ້ງປະຕິບັດວຽກງານຕົວຈິງ, ເຮັດສໍາເລັດໜ້າທີ່ການເມືອງທີ່ໄດ້ຮັບມອບໝາຍ ພ້ອມທັງຮັບປະກັນທາງດ້ານປະລິມານ ແລະຄຸນນະພາບ.

 

ໃນພິທີປິດການເຝິກອົບຮົມ, ທ່ານ ປທ ນ. ໃບຊ່ຽນ ມູນຕີວົງ ຄະນະພັກ, ຫົວໜ້າກົມຈັດຕັ້ງ-ພະນັກງານ ໄດ້ສະຫຼຸບລາຍງານ ແລະຕີລາຄາວ່າ: ບັ້ນເຝິກອົບຮົມຄັ້ງນີ້ໄດ້ຮັບຜົນສຳເລັດເປັນຢ່າງດີ ທັງນີ້ກໍຍ້ອນຄວາມເອົາໃຈໃສ່ຂອງຄະນະນຳຂອງສະຖາບັນ ໃນການໃຫ້ທິດຊີ້ນຳຕໍ່ການຈັດເຝິກອົບຮົມ, ຄະນະຈັດຕັ້ງພິທີ ແລະວິທະຍາກອນ ມີຄວາມຮັບຜິດຊອບສູງຕໍ່ ເນື້ອໃນເອກະສານທີ່ນຳມາສະເໜີ, ແທດເໝາະກັບສະພາບຄວາມເປັນຈິງ. ສໍາລັບຫຼັກສູດ ແມ່ນນໍາໃຊ້ຫຼັກສູດ ຂອງກະຊວງພາຍໃນ ແລະໄດ້ດໍາເນີນໄປໄລຍະ 05 ວັນ, 35 ຊົ່ວໂມງ ປະກອບມີ 10 ຫົວຂໍ້.

 

 

ບັນນາທິການ: ທ່ານ ປທ ນ. ຄຳຮູ້ ວິລະທອນ

ຂ່າວ/ພາບ: ທ່ານ ຕາອັອດ ແສນທະວີສຸກ