ໜ່ວຍພັກຮາກຖານ ຄະນະວິຊາບໍລິຫານສາດ-ສູນຂໍ້ມູນຂ່າວສານ ຈັດຕັ້ງພິທີຮັບສະມາຊິກພັກໃໝ່

ໜ່ວຍພັກຮາກຖານ ຄະນະວິຊາບໍລິຫານສາດ-ສູນຂໍ້ມູນຂ່າວສານ ໄດ້ຈັດພິທີຮັບສະຫາຍ ນ. ອາໄລ ພາລິໃບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ໃນວັນທີ 04 ສິງຫາ 2018 ທີ່ຜ່ານມາ, ພາຍໃຕ້ການເປັນປະທານຂອງ ສະຫາຍ ທອງສະລິດ ມັງໜໍ່ເມກ ກໍາມະການສູນກາງພັກ, ສະມາຊິກສະພາແຫ່ງຊາດ ຊຸດທີ 8, ເລຂາຄະນະບໍລິຫານງານພັກ, ຫົວໜ້າ ສມປຊ, ເຂົ້າຮ່ວມໃນພິທີມີສະຫາຍຕາງໜ້າກົມຈັດຕັ້ງ,  ຕາງໜ້າພະແນກພັກ ແລະອົງການຈັດຕັ້ງມະຫາຊົນ ແລະຕາງໜ້າໜ່ວຍພັກຮາກຖານອ້ອມຂ້າງ.

 

ໃນພິທີສະຫາຍ ນ. ອາໄລ ພາລິໃບ ໄດ້ຂຶ້ນຜ່ານໃບສະໝັກເຂົ້າເປັນສະມາຊິກພັກ ຈາກນັ້ນ ສອງສະຫາຍຜູ້ຕິດຕາມໄດ້ຂຶ້ນຜ່ານຜົນຂອງການຕິດຕາມ ນັບທັງງປະຫວັດ ແລະຄວາມກ້າວໜ້າຂອງຜູ້ກ່ຽວຜ່ານໄລຍະ 1 ປີກວ່ານັບແຕ່ມື້ຮຽນກົດລະບຽບພັກ ແລະ ເພື່ອຢັ້ງຢືນການຮັບສະມາຊິກພັກໃໝ່ຢ່າງເປັນທາງການ ສະຫາຍ ປອ ວັນລາຕີ ຄຳວານວົງສາ ເລຂາໜ່ວຍພັກຄະນະວິຊາບໍລິຫານສາດ-ສູນຂໍ້ມູນຂ່າວສານ ໄດ້ອ່ານຜ່ານມະຕິຕົກ ລົງຂອງຄະນະບໍລິຫານງານພັກ ສມປຊ ວ່າດ້ວຍການອະນຸມັດມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ພ້ອມທັງໄດ້ກ່າວມອບເອກະສານດັ່ງກ່າວໃຫ້ຜູ້ກ່ຽວ.

ໃນຕອນທ້າຍຂອງພິທີ ສະຫາຍ ທອງສະລິດ ມັງໜໍ່ເມກ ໄດ້ໃຫ້ກຽດໂອ້ລົມເພື່ອເປັນການໃຫ້ທິດເຍືອງທາງຕໍ່ກັບສະມາຊິກພັກໃໝ່ ເຊິ່ງສະຫຍໄດ້ສະແດງຄວາມຊົມເຊີຍພ້ອມຮຽກຮ້ອງໃຫ້ສະມາຊິກພັກໃໝ່ ຄວນໄດ້ເອົາໃຈໃສ່ປະຕິບັດຕາມກົດລະບຽບຂອງພັກຢ່າງເຂັ້ມງວດ, ເອົາໃຈໃສ່ເຄື່ອນໄຫວເຮັດສໍາເລັດໜ້າທີ່ການເມືອງຂອງຕົນ ດ້ວຍຄວາມຮັບຜິດຊອບ ແລະມີຫົວຄິດປະດິດສ້າງ; ເປັນແບບເປັນຢ່າງທີ່ດີແກ່ມະຫາຊົນ ພ້ອມທັງປຸກລະດົມ ຂົນຂວາຍມະຫາຊົນ ປະຕິບັດໜ້າທີ່ວຽກງານຢ່າງຫ້າວຫັນ ເພື່ອສ້າງຄວາມສາມັກຄີ ແລະເປັນກຳລັງແຮງແກ່ພັກ ກ້າວໄປເຖິງການສ້າງໜ່ວຍພັກຮາກຖາກໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ບັນລຸຕາມແຜນການທີ່ໄດ້ຕັ້ງໄວ້. 

ບັນນາທິການ: ທ່ານ ປທ ນ. ຄຳຮູ້ ວິລະທອນ

 

ຂ່າວ/ພາບ: ທ່ານ ຕາອັອດ ແສນທະວີສຸກ