ສະຖາບັນການເມືອງ ແລະ ການປົກຄອງແຫ່ງຊາດສຳເລັດກອງປະຊຸມ ສະຫຼຸບຖອດຖອນບົດຮຽນການຈັດຕັ້ງປະຕິບັດຫຼັກສູດການຮຽນ-ການສອນ

ສະຖາບັນການເມືອງ ແລະ ການປົກ ຄອງແຫ່ງຊາດ ໄດ້ຈັດຕັ້ງກອງປະຊຸມສະຫຼຸບຖອດຖອນບົດຮຽນການຈັດຕັ້ງປະຕິບັດຫຼັກສູດການຮຽນ-ການສອນ ປະຈຳປີ 2017-2018 ແລະທິດທາງແຜນການ 2018-2019 ຂຶ້ນ ໃນວັນທີ 29 ເຖິງ 31 ສິງຫາ 2018, ເພື່ອເປັນການສະຫຼຸບການຂຶ້ນຫ້ອງສິດສອນສົກປີຜ່ານມາ, ສະຫຼຸບຕີລາຄາຄືນຕໍ່ກັບວຽກງານຝຶກອົບຮົມ 45 ວັນ, ປຶກສາຫາລືກັນໃນການປັບປຸງແບບແຜນວິທີການເຮັດວຽກ, ເຊື່ອມຊຶມນິຕິກໍາໜັງສືແນະນໍາປ້ອງກັນບົດຈົບຊັ້ນກາງ, ອະນຸປະລິນຍາ, ປະລິນຍາຕີ, ຊັ້ນສູງເລັ່ງລັດ 5 ເດືອນ ແລະ ປະລິນຍາໂທ.

 ໂດຍການເປັນປະທານກອງປະຊຸມທັງ 3 ວັນ ຂອງທ່ານ ຮສ ປອ ທອງສະລິດ ມັງໜໍ່ເມກ ກຳມະການສູນກາງພັກສະມາຊິກສະພາແຫ່ງຊາດ ຊຸດທີ VIII, ເລຂາຄະນະບໍລິຫານງານພັກຫົວໜ້າ ສມປຊ, ເຂົ້າຮ່ວມມີບັນດາຄະນະພັກ, ຄະນະອຳນວຍການຄະນະວິຊາກົມ, ຫ້ອງການສູນຂໍ້ມູນຂ່າວສານ, ຄູ-ອາຈານ ພາຍໃນ ສມປຊ ລວມເຖິງຜູ້ຕາງໜ້າໃຫ້ແກ່ກົມກອງອ້ອມຂ້າງ 22 ພາກສ່ວນ.

     ໃນພິທີດັ່ງກ່າວ ທ່ານ ປອ ນ. ໄກສອນ ຈັນສີນາ ຮັກສາການຫົວໜ້າກົມວິຊາການ ໄດ້ຂຶ້ນຜ່ານບົດສະຫຼຸບ ການຈັດຕັ້ງການຮຽນ-ການສອນ ປະຈຳສົກປີ 2017-2018 ໂດຍທ່ານໃຫ້ຮູ້ວ່າ: ໃນສົກປີ 2017-2018 ເປັນສົກທີ່ ສມປຊ ສາມາດຍາດໄດ້ຜົນສຳເລັດໃນຫຼາຍດ້ານທີ່ເປັນພື້ນຖານ ໃນການຈັດຕັ້ງປະຕິບັດໜ້າທີ່ການເມືອງທີ່ພັກ-ລັດມອບໝາຍໃຫ້ ໂດຍສະເພາະການບຳລຸງກໍ່ສ້າງພະນັກງານທີ່ເປັນຫົວຈັກຫຼັກແຫຼ່ງ ໃຫ້ມີຄວາມຮູ້ຄວາມສາມາດກຳ ແໜ້ນທາງດ້ານທິດສະດີການເມືອງ-ການປົກຄອງ ເພື່ອຜັນຂະຫຍາຍແນວທາງຂອງພັກ ເຊິ່ງເຫັນໄດ້ໃນປີນີ້ຈາກການປະເມີນຂອງນັກສຶກສາແມ່ນຢູ່ໃນລະດັບທີ່ດີຫຼາຍ ເປັນຕົ້ນດ້ານເນື້ອໃນ ແລະຫຼັກສູດການຮຽນ-ການສອນ, ດ້ານວຸດທິການສຶກສາຂອງອາຈານສອນ, ດ້ານການບໍລິຫານ-ບໍລິການ ອື່ນໆ. ພ້ອມກັນນັ້ນຍັງໄດ້ຈັດຕັ້ງການຮຽນ-ການສອນຫຼາຍລະບົບຮຽນເຊິ່ງແຕ່ລະລະບົບຮຽນ ສາມາດດຳເນີນໄປໄດ້ຢ່າງຕໍ່ເນື່ອງລຽນຕິດ ບໍ່ວ່າຈະເປັນການຈັດຕັ້ງປະຕິບັດຫຼັກສູດການຮຽນ-ການສອນທຸກລະບົບຮຽນ ແມ່ນສາມາດຮຽນສຳເລັດຕາມໂຄງການຫຼັກສູດທີ່ໄດ້ກຳນົດໄວ້ນັບທັງພາກຮຽນລວມ ແລະພາກຮຽນລົງເລິກ ສາຂາໃນແຕ່ລະຊັ້ນຮຽນແມ່ນບໍ່ມີວິຊາຮຽນທີ່ຄ້າງສາມາດສຳເລັດໄດ້ຕາມຫຼັກສູດທີ່ໄດ້ກຳນົດໄວ້. ນອກຈາກນີ້ວຽກງານການຄຸ້ມຄອງຫົວຂໍ້ບົດປ້ອງກັນຈົບຊັ້ນລະບົບກໍ່ສ້າງຢູ່ພາຍໃນ ສມປຊ ສາມາດສະເໜີຫົວຂໍ້ປ້ອງກັນຈົບຊັ້ນໃຫ້້ປະທານສະພາວິທະຍາສາດ ສມປຊ ອະນຸມັດໄດ້ທັງໝົດຈຳນວນ 427 ຫົວຂໍ້, ສາມາດຈັດຕັ້ງພິທີປ້ອງກັນບົດ, ພິທີມອບ-ຮັບ ໃບປະກາສະນີຍະບັດ ໃຫ້ແກ່ນັກສຶກສາທັງໝົດໄດ້ 368, ຍິງ 75 ຄົນ.  ລວມເຖິງລາຍງານກ່ຽວກັບຜົນສຳເລັດຂອງການຮຽນການສອນ ຂອງຊຸດຝຶກອົບຮົມທິດສະດີການເມືອງ-ການປົກຄອງ 45 ວັນ ເຊິ່ງຜ່ານມາສາມາດຈັດໄດ້ຊຸດຮຽນ 22 ຊຸດ ລວມຜູ້ເຂົ້າຮຽນທັງໝົດ 1,055 ຄົນ ຍິງ 412 ຄົນ ກວມເອົາ 22 ພາກສ່ວນຂອງກົມກອງອ້ອມຂ້າງສູນກາງ.

ນອກນັ້ນທ່ານ ປອ ນ. ໄກສອນ ຈັນສີນາ ຍັງໄດ້ຍົກໃຫ້ເຫັນເຖິງຂໍ້ຄົງຄ້າງ ແລະບາງບົດຮຽນທີ່ສາມາດຖອດຖອນໄດ້ ພ້ອມທັງເປີດໂອກາດໃຫ້ແກ່ບັນດາທ່ານຫົວໜ້າຄະນະວິຊາກົມຫ້ອງການ ແລະ ສູນຂໍ້ມູນຂ່າວສານ ໄດ້ມີຄຳຖາມເຈາະຈີ້ມ ເພື່ອແລກປ່ຽນຄຳຄິດຄຳເຫັນ ທັງນີ້ກໍເພື່ອເຮັດໃຫ້ທຸກພາກສ່ວນສາມາດຖອດຖອນບົດຮຽນເຊິ່ງກັນ ແລະກັນໄດ້ ແລະພ້ອມກັນ ນຳໄປຈັດຕັ້ງປະຕິບັດເຂົ້າໃນວຽກງານການຮຽນ-ການສອນ ໃຫ້ມີບາດກ້າວໃໝ່.

      ໃນຕອນທ້າຍພິທີທ່ານ ຮສ ປອ ທອງສະລິດ ມັງໜໍ່ເມກ ໄດ້ໃຫ້ຄຳໂອ້ລົມ ໂດຍທ່ານໄດ້ເນັ້ນໜັກວ່າ: ໃຫ້ພະນັກງານ, ຄູ-ອາຈານ ພ້ອມກັນສຸມໃສ່ສືບຕໍ່ປັບປຸງຫຼັກສູດການຮຽນ-ການສອນ ຂອງແຕ່ລະຄະນະວິຊາ ໃຫ້ມີປະສິດທິພາບ ແລະຕ້ອງໄດ້ຍົກສູງຄຸນນະພາບຂອງການຮຽນ-ການສອນ, ຄຽງຄູ່ກັບການຕິດຕາມ ກວດກາ ແລະສົ່ງເສີມໃຫ້ນັກສຶກສາ ມີສ່ວນຮ່ວມໃນຂະບວນການຮັບ-ສົ່ງຂໍ້ມູນຂ່າວສານ, ກ້າສະແດງອອກໃຫ້ຫຼາຍຂຶ້ນ; ນອກຈາກນີ້ຄູ-ອາຈານ ກໍຕ້ອງມີການປັບປຸງເນື້ອໃນທິດສະດີ-ພຶດຕິກຳ, ເອກະ ສານ, ມະຕິຕ່າງໆ ຂອງພັກ ເຂົ້າໃນບົດສອນໃຫ້ຫຼາຍຂຶ້ນ ເພື່ອໃຫ້ສອດຄ່ອງກັບເງື່ອນໄຂໃໝ່ ແລະມີລັກສະນະສືບທອດຕໍ່ເນື່ອງ; ເພີ່ມທະວີການເຜີຍແຜ່ຜົນຂອງການຄົ້ນຄວ້າເປັນຕົ້ນການຂຽນບົດວາລະສານ, ຂຽນບົດວິທະຍາສາດຫົວຂໍ້ຕ່າງໆໃຫ້ຫຼາຍຂຶ້ນ ເພື່ອເປັນເວທີແຫ່ງການແລກປ່ຽນຄວາມຮູ້, ບົດຮຽນວິທະຍາສາດວິທີວິທະຍາຄົ້ນຄວ້າວິເຄາະວິໄຈບັນຫາຕ່າງໆ ທັງເປັນການຊອກຫາວິທີທາງໃນການປັບປຸງການຮຽນ-ການສອນ ໃຫ້ມີປະສິດທິພາບແລະພ້ອມກັນຕັດສິນໃຈປັບປຸງຂອດທີ່ເປັນຂໍ້ຄົງຄ້າງໃຫ້ໄດ້ຮັບການແກ້ໄຂ ເພື່ອຫັນໄປສູ່ຄຸນນະພາບ, ຫັນເປັນມືອາຊີບ. ພ້ອມກັນປັບປຸງເອກະສານທີ່ເປັນຂໍ້ຄົງຄ້າງຕ່າງໆ ໃຫ້ກວດຄືນຕີລາຄາບັນຫາແນວຄິດ, ພາລະບົດບາດສິດ ແລະໜ້າທີ່ຂອງພວກເຮົາໃຫ້ສຳເລັດ ຄຽງຄູ່ກັບການເຄື່ອນໄຫວປະຕິບັດທິດທາງແຜນການປະຈຳສົກປີ 2018-2019 ໃຫ້ໄດ້ຮັບຜົນສໍາເລັດຂຶ້ນກວ່າເກົ່າ.

ບັນນາທິການ: ທ່ານ ປທ ນ. ອາພອນ ຂາວພັນ

ຂ່າວ/ພາບ: ທ່ານ ຕາອັອດ ແສນທະວີສຸກ