ຄະນະບໍລິຫານງານພັກ ສະຖາບັນການເມືອງ ແລະ ການປົກຄອງແຫ່ງຊາດ ມອບໃບຢັ້ງຢືນ ໜ່ວຍພັກແຂງ-ຮູ້ນຳພາຮອບດ້ານ

ໃນອາທິດທີ່ຜ່ານມາ ໄດ້ມີພິທີມອບ-ຮັບໃບຢັ້ງຢືນໜ່ວຍພັກແຂງ-ຮູ້ນຳພາຮອບດ້ານ ໃຫ້ແກ່ 3 ໜ່ວຍພັກຮາກຖານ ຊື່ງແຕ່ລະໜ່ວຍພັກ ແມ່ນຈັດພິທີມອບ-ຮັບເຊັ່ນ: ໜ່ວຍພັກຮາກຖານຄະນະວິຊາກໍ່ສ້າງພັກ ແລະ ປະຫວັດສາດພັກ-ຄະນະວິຊາລັດທິສັງຄົມນິຍົມວິທະຍາສາດ ຄັ້ງທີ III, ວັນທີ 10.7.2018, ໜ່ວຍພັກຮາກຖານ ກົມວິຊາການ ແລະ ກົມຄຸ້ມຄອງການຄົ້ນຄວ້າວິທະຍາສາດ ຄັ້ງທີ V ວັນທີ 13.7.2018 ແລະ ໜ່ວຍພັກຮາກຖານ ຄະນະວິຊາບໍລິຫານສາດ ແລະ ສູນຂໍ້ມູນຂ່າວສານ ຄັ້ງທີ V ວັນທີ 13.7.2018. ພິທີດັ່ງກ່າວ, ພາຍໃຕ້ການເປັນປະທານຂອງສະຫາຍ ຮສ ພູວົງ ອຸ່ນຄຳແສນ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ, ຜູ້ເຂົ້າຮ່ວມມີປະທານກວດກາພ້ອມດ້ວຍຄະນະ, ຄະນະພັກຮາກຖານ, ເລຂາ, ຮອງເລຂາ ແລະ ຕາງໜ້າ 3 ອົງການຈັດຕັ້ງມະຫາຊົນ ລວມເຖິງສະມາຊິກພັກສົມບູນ ແລະສຳຮອງ ຂອງທັງ 3 ພາກສ່ວນ ກໍໃຫ້ກຽດເຂົ້າຮ່ວມ.

 

ວາລະທຳອິດສະຫາຍເລຂາໜ່ວຍພັກຮາກຖານໄດ້ຜ່ານຮ່າງບົດລາຍປະຈຳປີ 2016-2017 ຜ່ານມາ ໂດຍໄດ້ຍົກໃຫ້ເຫັນຜົນງານໃນ 4 ດ້ານ ເຊັ່ນ: ດ້ານການເມືອງ, ດ້ານແນວຄິດ, ດ້ານການ ຈັດຕັ້ງ, ແບບແຜນວິທີນຳພາ, ເຮັດໃຫ້ພະນັກງານມີແນວຄິດອຸ່ນອ່ຽນທຸ່ນທ່ຽງ, ມີຄວາມກະຕືລືລົ້ນ, ຫ້າວຫັນ ແລະ ມີຄວາມສາມັກຄີ, ຈົງຮັກພັກດີຕໍ່ປະເທດຊາດ, ມີຄວາມຮັບຜິດຊອບສູງຕໍ່ໜ້າທີ່ວຽກງານ ແລະມີຄວາມເຂົ້າໃຈ ແລະ ເປັນເອກະພາບຕໍ່ກັບແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ເຊື່ອໝັ້ນຕໍ່ອຸດົມການ ແລະ ການນຳພາຂອງພັກ ໄດ້ເປັນຢ່າງດີ.

ພ້ອມກັນນັ້ນ ສະຫາຍ ຮສ ພູວົງ ອຸ່ນຄຳແສນ ກໍໄດ້ມອບໃບຢັ້ງຢືນໜ່ວຍພັກແຂງ-ຮູ້ນຳພາຮອບດ້ານ ເຊິ່ງຕາງໜ້າຮັບໂດຍສະຫາຍເລຂາໜ່ວຍພັກຮາກຖານ ພ້ອມດ້ວຍຄະນະໜ່ວຍພັກຮາກຖານ. ໃນໂອກາດດຽວກັນສະຫາຍໄດ້ສະແດງຄວາມຊົມເຊີຍຕໍ່ຜົນສໍາເລັດໃນການຊີ້ນຳໆພາຂອງໜ່ວຍພັກເວົ້າລວມ, ເວົ້າສະເພາະກໍຄືຜົນການຈັດຕັ້ງປະຕິບັດວຽກງານໃນໄລຍະຜ່ານມາ. ພ້ອມດຽວກັນນັ້ນ ກໍໄດ້ເນັ້ນໃຫ້ເພີ່ມທະວີໃນການຍົກສູງບົດບາດການນຳພາຂອງພັກ, ການຄຸ້ມຄອງຂອງລັດ, ພ້ອມກັນຕັ້ງໜ້າແກ້ໄຂປະກົດການຫຍໍ້ທໍ້ຕ່າງໆ ຊຶ່ງຄະນະໜ່ວຍພັກຮາກຖານ, ຕ້ອງໄດ້ຄົ້ນຄວ້າເຊື່ອມຊຶມມະຕິກອງປະຊຸມໃຫຍ່ ຄັ້ງທີ X ຂອງພັກ, ຄຽງຄູ່ກັບມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກ ສມປຊ ກໍຄືກອງປະຊຸມໃຫຍ່ຂອງໜ່ວຍພັກຮາກຖານຂັ້ນຂອງຕົນ, ສືບຕໍ່ຜັນຂະຫຍາຍ ມະຕິຄຳສັ່ງຂອງກົມການເມືອງ ສູນກາງພັກ ເປັນຕົ້ນມະຕິວ່າ ດ້ວຍການສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ, ໂດຍນຳເອົາຄຳຕຳນິສົ່ງຂ່າວຕໍ່ການນຳພາລວມຂອງຄະນະພັກ, ໜ່ວຍພັກ ແລະ ບຸກຄົນໃນຄະນະພັກ ໄປຄົ້ນຄວ້າປຶກສາຫາລື ເພື່ອຫາວິທີແກ້ໄຂໃຫ້ຖືກຕ້ອງ ແລະມີຜົນສຳເລັດ.

ກວດແກ້ໂດຍ: ທ່ານ ປທ ນ. ຄຳຮູ້ ວິລະທອນ

ຂ່າວ/ພາບ: ທ່ານ ຕາອັອດ ແສນທະວີສຸກ