ຈັດຕັ້ງພິທີສະເຫຼີມສະຫຼອງ ວັນສ້າງຕັ້ງ ສມປຊ ຄົບຮອບ 20 ປີ

ໃນຕອນເຊົ້າຂອງວັນທີ 24 ກຸມພາທີ່ຜ່ານມາ ຢູ່ທີ່ສະຖາບັນການເມືອງ ແລະ ການປົກຄອງແຫ່ງຊາດ   ໄດ້ຈັດຕັ້ງໃຫ້ມີພິທີສະເຫຼີມສະຫຼອງວັນສ້າງຕັ້ງສະຖາບັນ ຄົບຮອບ 20 ປີ (27/2/1995-27/2/201 5). ແລະ ເປັນກຽດ ເຂ້ົາຮ່ວມໃນພິທີທີ່ມີຄວາມໝາຍ ແລະ ສຳຄັນນີ້ ມີ: ທ່ານ ດຣ ທອງລຸນ ສີສຸລິດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ວ່າການກະຊວງການຕ່າງ ປະເທດ, ທ່ານ ຮສ ດຣ ທອງສະລິດ ມັງໜໍ່ເມກເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດບັນດາທ່ານອາດີດຫົວໜ້າສະຖາບັນ, ອາດີດຮອງຫົວໜ້າສະຖາບັນ, ບັນດາ ທ່ານການນຳຂັ້ນ ສູງຂອງພັກ-ລັດ, ບັນດາທ່ານຄະນະພັກ, ຄະນະອຳນວຍການສະຖາບັນ ພ້ອມດ້ວຍ ພະ ນັກງານ-ຄູອາຈານ ລວມໄປເຖິງຄະນະພັກ-ຄະນະຫ້ອງນັກສຶກສາທຸກຮຸ່ນທຸກລະບົບ ເຂົ້າຮ່ວມທັງໝົດກວ່າ 200 ທ່ານ. 

 

ໃນພິທີດັ່ງກ່າວ ທ່ານ ຮສ ດຣ ທອງສະລິດ ມັງໝໍ່ເມກ ກໍ່ໄດ້ກ່າວຫວນຄືນເຖິງປະຫວັດຄວາມເປັນ ມາ ແລະ ມູນເຊື້ອ 20 ປີ ແຫ່ງການເຕີບໃຫຍ່ຂະຫຍາຍຕົວ ຂອງ ສະຖາບັນການເມືອງ ແລະ ການປົກ ຄອງແຫ່ງຊາດ, ພ້ອມກັນນັ້ນ ກໍ່ໄດ້ສະຫຼຸບຜົນສຳເລັດ ທີ່ສະຖາບັນຍາດມາໄດ້ຕະຫຼອດ 20 ຜ່ານມາ. ມີບາງ ຕອນທ່ານ ໄດ້ກ່າວວ່າ: "ສະຖາບັນການເມືອງ ແລະ ການປົກຄອງແຫ່ງຊາດ ໄດ້ກຳເນີດເກີດຂຶ້ນໃນປີ 1960 ທີ່ ເຂດປົດປ່ອຍເມືອງວຽງໄຊ ແຂວງຫົວພັນ ໄດ້ໃສ່ຊື່ວ່າໂຮຽນສາມັກຄີ ຂອງສູນກາງເຮັດໜ້າ ທີ່ສຶກສາອົບ ຮົມ ແລະ ປະກອບອາວູດແນວຄິດໃຫ້ແກ່ຖັນແຸວພະນັກງານຫຼັກແຫຼ່ງ ໃຫ້ຮູ້ນຳພາຂົນຂວາຍ ປະຊາຊົນ, ຕີສັດຕູ, ກໍ່ສ້າງຮາກຖານການເມືອງ, ສ້າງເຂດປົດປ່ອຍ ເພື່ອກາຍເປັນບ່ອນເຕົ້າໂຮມກຳລັງແຮງ ຂອງການ ປະຕິວັດດຳເນີນການຕໍ່ສູ້ກັບພວກສັດຕູຜູ້ຮຸກຮານ. ພາຍຫຼັງປະເທດຊາດ ໄດ້ຮັບການປົດປ່ອຍໂຮງຮຽນ ສາ ມັກຄີໄດ້ຮັບການປັບປຸງ ແລະ ປ່ຽນຊື່ເປັນໂຮງຮຽນຊັ້ນສູງພັກ-ລັດຂອງສູນກາງພັກເຮັດໜ້າ ທີ່ຝຶກອົບຮົມ ລັດທິມາກ-ເລນິນ ແລະ ແນວທາງຂອງພັກ. ໃນຊຸມປີ 1990 ຍ້ອນສະພາບການຂອງໂລກ ໄດ້ມີການປ່ຽນ ແປງ ເຊິ່ງມີທັງຂໍ້ສະດວກ ແລະ ຂໍ້ຫຍຸ້ງຍາກ ທີ່ສົ່ງຜົນກະທົບຕໍ່ພາລະກິດປະຕິວັດຂອງ ປະເທດເຮົາ. ສະ ເພາະຢູ່ພາຍໃນປະເທດ ການຈັດຕັ້ງປະຕິບັດແນວທາງປ່ຽນແປງໃໝ່ໄດ້ຮັບຜົນສຳເລັດຫຼາຍດ້ານ. ຍ້ອນ ແນວນັ້ນ ກົມການເມືອງສູນກາງພັກ ແລະ ລັດຖະບານ ໄດ້ຕົກລົງສ້າງຕັ້ງສະຖາບັນການ ເມືອງ ແລະ ການປົກຄອງແຫ່ງຊາດຂຶ້ນ ໃນວັນທີ 27 ກຸມພາ ປີ 1995 ໂດຍໂຮມເອົາໂຮງຮຽນການເມືອງແຫ່ງຊາດ ກັບ ໂຮງຮຽນການປົກຄອງ ແລະ ຄຸ້ມຄອງແຫ່ງຊາດ ລວມເຂົ້າກັນ ເປັນສະຖາບັນການເມືອງ ແລະ ການປົກຄອງແຫ່ງຊາດໃນປະຈຸບັນ ເຊິ່ງມາຮອດປີນີ້ສະຖາບັນການເມືອງ ແລະ ການປົກຄອງ ມີອາຍຸຄົບ 20 ປີ.

ໃນໄລຍະ 20 ປີ ຜ່ານສະຖາບັນ ໄດ້ປັບປຸງຍົກລະດັບຄຸນນະພາບການບຳລຸງ ແລະ ກໍ່ສ້າງພະນັກ ງານນຳພາ-ຄຸ້ມຄອງ ແຕ່ລະຂັ້ນໃຫ້ສູງຂຶ້ນເລື້ອຍໆດ້ວຍການຝຶກອົບຮົມແນວທາງການເມືອງໄລຍະສັນຕາມ ລະບົບຮຽນ 45 ວັນ, 2 ເດືອນ, 4 ເດືອນ, 10 ເດືອນ ກ້າວຂຶ້ນມາຈັດຕັ້ງລະບົບຮຽນ ຊັ້ນສູງ  1 ປີ 6 ເດືອນ, ຊັ້ນສູງ 2 ປີ, ປະລິນຍາຕີ 4 ປີ ແລະ ປະລິນຍາໂທ 2 ປີ ຢ່າງເປັນລະບົບ. ໄດ້ປັບປຸງຫຼັກສູດການ ຮຽນການ ສອນຮັບປະກັນໄດ້ມາດຕະຖານຫຼັກສູດຂອງລະບົບການສຶກສາແຫ່ງຊາດ. ສັງລວມແລ້ວຕະຫຼອດໄລຍະ 20 ປີ ຜ່ານມາສະຖາບັນການເມືອງ ແລະ ການປົກຄອງ ແຫ່ງຊາດ ໄດ້ກໍ່ສ້າງພະນັກງານທັງໝົດ 4.805 ຄົນ ຍິງ 827 ຄົນ. ໃນນັ້ນໄດ້ຈົບອອກຮັບໃຊ້ສັງຄົມແລ້ວ 3.269 ຄົນ, ຍິງ 589 ຄົນ.   ຈັດຕັ້ງຝຶກອົບຮົມໄລຍະສັ້ນ ຢູ່ບັນດາຂະແໜງການ ໄດ້ 105 ຊຸດ ມີຜູ້ເຂົ້າຮ່ວມຝຶກອົບຮົມ 4.812, ຍິງ 1.493 ຄົນ. ນອກຈາກນັ້ນ ໄດ້ ຊີ້ນຳທາງດ້ານວິຊາການ ໃນການບຳລຸງ ແລະ ກໍ່ສ້າງພະນັກງານຢູ່ບັນດາໂຮງຮຽນການເມືອງ-ການ ປົກ ຄອງທ້ອງຖິ່ນ ໄດ້ 149 ຊຸດ ມີຜູ້ເຂົ້າຮຽນທັງໝົດ 9.733 ຄົນ, ຍິງ 1.237 ຄົນ.

ສະຖາບັນການເມືອງ ແລະ ການປົກຄອງ ແຫ່ງຊາດ ໄດ້ສຸມໃສ່ການຄົ້ນຄວ້າທິດສະດີ ແລະ ພຶດຕິ ກຳ ຕິດພັນກັບການຮຽນ- ການສອນ ແລະ ການຜັນຂະຫຍາຍແນວທາງຂອງພັກ-ນະໂຍບາຍຂອງລັດ, ອັນ ພົ້ນເດັ່ນແມ່ນການສ້າງປຶ້ມແບບຮຽນນັບມື້ນັບອຸດົມສົມບູນ ແລະ ສອດຄ່ອງກັບສະພາບຕົວຈິງ ຂອງປະ ເທດເຮົາຫຼາຍຂຶ້ນ. ມາຮອດປັດຈຸບັນມີປຶ້ມຕຳລາ ທັງໝົດ 150 ກວ່າວິຊາ. ເຂົ້າຮ່ວມການຄົ້ນຄວ້າວິທະຍາ ສາດລະດັບຊາດ ແລະ ສາກົນຫຼາຍຂຶ້ນ. ໄດ້ປັບປຸງບູລະນະກົງຈັກການຈັດຕັ້ງ, ບຳລຸງຍົກລະດັບ ແລະ ກໍ່ ສ້າງພະນັກງານວິຊາການຄູ ໃຫ້ສອດຄ່ອງກັບໜ້າທີ່ການເມືອງຂອງສະຖາບັນຫຼາຍຂຶ້ນ.  ໄດ້ປັບປຸງຍົກລະ ດັບພື້ນຖານໂຄງລ່າງວັດຖຸເຕັກນິກ ໃຫ້ນັບມື້ນັບສະດວກ ແລະ ທັນສະໄໝ; ໄດ້ເອົາໃຈໃສ່ຍົກລະດັບ ການ ພົວພັນຮ່ວມມືກັບສະຖາບັນເພື່ອນມິດທັງລວງເລິກ ແລະ ລວງກວ້າງໄດ້ຫັນປ່ຽນຮູບການເຊີນຊ່ຽວຊານ ຕ່າງ ປະເທດມາສິດສອນເປັນປະຈຳ ໄປສູ່ຮູບແບບແລກປ່ຽນບົດຮຽນບາງ ບັນຫາ ແລະ ຍາດແຍ່ງການລົງທຶນ ກໍ່ສ້າງພື້ນຖານໂຄງລ່າງໃຫ້ທັນສະໄໝ ແລະ ບຳລຸງກໍ່ສ້າງພະນັກງານ ຄູອາຈານ ຂອງສະຖາບັນ."

ແລະ ໃນຕອນທ້າຍພິທີ ທ່ານ ດຣ ທອງລຸນ ສີສຸລິດ ກໍ່ໄດ້ມີຄຳເຫັນຕໍ່ພິທີ, ທ່ານໄດ້ກ່າວຊົມເຊີຍ ແລະ ສະແດງຄວາມຍິນດີຕໍ່ກັບຜົນສຳເລັດອັນຫຍິ່ງໃຫຍ່ ທີ່ທາງສະຖາບັນການເມືອງ ແລະ ການປົກຄອງແຫ່ງຊາດ ສາມາດຍາດມາໄດ້ ແລະ ເຮັດຫຼ້ອນໜ້າທີ່ ທີ່ທາງພັກລັດໄດ້ມອບໝາຍໃຫ້ໃນທຸກຂົງເຂດ ແລະ ກ່າວຊົມເຊີຍຕໍ່ກັບຜົນງານ, ຄວາມກ້າວໜ້າ ຂອງ ສມປຊ ເຊັ່ນ: ພື້ນຖານໂຄງລ່າງ ລວມໄປເຖິງເນື້ອໃນຫຼັກສູດການຮຽນ-ການສອນ, ການກໍ່ສ້າງ ແລະ ບຳລຸງພະນັກງານຄູ-ອາຈານ ທີ່ມີຄວາມທັນສະໄໝ ແລະ ພັດທະນາຢ່າງບໍ່ຢຸດຢັ້ງຕະຫຼອດ ໄລຍະ 20 ປີ ທີ່ຜ່ານມາ. ພ້ອມກັນນັ້ນ ທ່ານ ກໍ່ໄດ້ໃຫ້ທິດຊີ້ນຳວ່າ: " ສະຖາບັນການເມືອງ ແລະ ການປົກຄອງແຫ່ງຊາດ ແຫ່ງນີ້ເປັນສູນກາງແຫ່ງການຄົ້ນຄວ້າ ແລະ ວິໄຈວິທະ ຍາສາດທາງດ້ານການເມືອງ-ການປົກຄອງ ເຊິ່ງເປັນບ່ອນອີງອັນໜັກແໜ້ນ ຂອງທິດສະດີການເມືອງ ແລະ ການປົກຄອງ  ເຊິ່ງພະນັກງານອອກຈາກສະຖາບັນແຫ່ງນີ້ ແມ່ນລ້ວນແລ້ວແຕ່ໄດ້ຮັບການບຳລຸງກໍ່ສ້າງທາງດ້ານທິດສະດີ, ຖອດຖອນຈາກພຶດຕິກຳຕົວຈິງ ຂອງຂະບວນການວຽກງານມາແລ້ວ, ບັນດາສະຫາຍທີ່ມາ ສຶກສາຮ່ຳຮຽນ, ຄົ້ນຄວ້າ ຢູ່ສະຖາບັນແຫ່ງນີ້ ແມ່ນໄດ້ເລືອກເຟັ້ນມາຈາກກົມກອງທ້ອງຖິ່ນ ເຊິ່ງກຳລັງເຮັດວຽກຢູ່ແລ້ວນັ້ນ ໃຫຫ້ໄດ້ບຳລຸງສ້າງທິດສະດີພື້ນຖານ ແລະ ຖອດຖອນຈາກບົດຮຽນຕົວຈິງ ແລະ ຫຼັງຈາກ ຮຽນຈົບແລ້ວ ກໍ່ກັບໄປເຮັດໜ້າທີ່ ທີ່ຕົນຮັບຜິດຊອບນັ້ນໃຫ້ມີຄວາມໜັກແໜ້ນຂຶ້ນຕື່ມ, ໂດຍສະເພາະວຽກງານການຊີ້ນຳ ແລະ ນຳພາການປະຕິບັດວຽກງານບັນຊາ ຜັນຂະຫຍາຍມະຕິຂອງພັກ, ແຜນການແຜນງານຂອງກົມກອງທ້ອງຖິ່ນໃນຖືກຈຸດ, ຖືກເປົ້າໝາຍ, ມີຄຸນນະພາບ ແລະ ປະສິດທິຜົນຂຶ້ນສູງເລື້ອຍໆ." ແລະ ນອກຈາກນີ້ທ່ານກໍ່ຍັງມີຄວາມຫວັງວ່າບັນດານັກສຶກສາ ແລະ ນັກຄົ້ນຄວ້າທີ່ມາຮຽນໝົດທຸກຄົນ ຢູ່ທີ່ ກຳລັງສຶກສາ ແລະ ຮ່ຳຮຽນຢູ່ທີ່ ສມປຊ ນີ້ ຈະເຊື່ອມຊຶມ ແລະ ນຳເອົາບັນດາຄວາມຮູ້ ແລະ ທິດສະດີ ທີ່ໄດ້ຮ່ຳຮຽນມານັ້ນ ນຳກັບໄປໝູນໃຊ້ເຂົ້າໃນວຽກງານຕົວຈິງ ເພື່ອພັດທະນາກົມກອງຕົນເອງໃຫ້ມີຄວາມກ້າວໜ້າ ແລະ ທັນກັບຍຸກສະໄໝຕະຫຼອດເວລາ.