ໃນຕອນເຊົ້າເວລາ 8:00 ໂມງ ວັນທີ 22 ພະຈິກ 2021 ຢູ່ທີ່ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ເປີດຊຸດຝຶກອົບຮົມທິດສະດີການເມືອງ-ການປົກຄອງ ຕາມຫົວຂໍ້ສະເພາະໃຫ້ແກ່ ເລຂາພັກເມືອງ, ຄະນະປະຈຳພັກເມືອງ ແລະ ກຳມະການພັກເມືອງພາຍໃຕ້ການເປັນປະທານ ແລະ ກ່າວເປີດ ຂອງ ທ່ານ ຮສ. ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສມປຊ ມີ ຄະນະພັກ, ມີຜູ້ຕາງໜ້າຈາກຄະນະຈັດຕັ້ງສູນກາງພັກ, ຜູ້ຕາງໜ້າບັນດາ ຂັ້ນກົມ, ຄະນະຕ່າງໆ, ສູນຂໍ້ມູນຂ່າວສານການເມືອງ ແລະ ການປົກຄອງ ແລະ ສູນຄົ້ນຄວ້າແນວຄິດ ໄກສອນ ພົມວິຫານ.
ໃນພິທີ ທ່ານ ປອ. ນ. ໄກສອນ ຈັນສີນາ ກໍາມະການຄະນະບໍລິຫານງານພັກ ສມປຊ, ຫົວໜ້າກົມຄຸ້ມຄອງການຮຽນ-ການສອນ ໄດ້ກ່າວເຖິງຈຸດປະສົງຂອງການຝຶກຄັ້ງນີ້ແມ່ນເພື່ອສ້າງຄວາມຮັບຮູ້ຢ່າງເປັນລະບົບໃຫ້ແກ່ເລຂາພັກເມືອງ, ຄະນະປະຈຳພັກເມືອງ ແລະ ກຳມະການພັກເມືອງ ກ່ຽວກັບການໝູນໃຊ້ທິດສະດີມາກ-ເລນິນ, ທິດສະດີການເມືອງ ແລະ ການບໍລິຫານຄຸ້ມຄອງລັດ, ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ, ແຜນຍຸດທະສາດ ແລະ ວຽກງານຈຸດສຸມທີ່ໄດ້ກຳນົດໄວ້ໃນແຜນພັດທະນາ
ເສດຖະກິດ-ສັງຄົມ ແຫ່ງຊາດຄັ້ງທີ 9, ການຝຶກອົບຮົມທິດສະດີການເມືອງ-ການປົກຄອງຄັ້ງນີ້ ແມ່ນແນໃສ່ ເລຂາພັກເມືອງ, ຄະນະປະຈຳພັກເມືອງ ແລະ ກຳມະການພັກເມືອງ ປະຕິບັດແບບແຜນນໍາພາ ຄຸ້ມຄອງໃຫ້ເປັນເອກະພາບທາງດ້ານແນວຄິດ-ການເມືອງ, ປະຕິບັດຢ່າງເຂັ້ມງວດບັນດາຫຼັກການພື້ນຖານຂອງພັກ, ເພີ່ມທະວີການຕິດຕາມ, ກວດກາ, ການປະເມີນຜົນ ແລະ ການສະຫຼຸບລາຍງານການຈັດຕັ້ງປະຕິບັດວຽກງານທີ່ຕົນຮັບຜິດຊອບ ພ້ອມປັບປຸງແຜນການເຄື່ອນໄຫວແຕ່ລະໄລຍະ ສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດ ແລະ ຍົກສູງຄວາມສາມາດນຳພາ-ຊີ້ນຳ, ເຮັດວຽກງານແນວຄິດ-ການເມືອງໃຫ້ປະຊາຊົນພາຍໃນເມືອງຂອງຕົນ ມີຄວາມສາມັກຄີເປັນເອກະພາບຢ່າງໜັກແໜ້ນ, ພັດທະນາຊີວິດການເປັນຢູ່ດີຂຶ້ນຕາມຄາດໝາຍສູ້ຊົນທີ່ໄດ້ກໍານົດໄວ້ແຕ່ລະໄລຍະ.
ການຝຶກອົບຮົມໃນຄັ້ງນີ້ມີສຳມະນາກອນທັງໝົດ 45 ທ່ານ, ຍິງ 3 ທ່ານ ຊິ່ງປະກອບມີ ສະຫາຍກຳມະການພັກແຂວງ, ເລຂາພັກນະຄອນ, ເຈົ້ານະຄອນ 1 ທ່ານ, ກຳມະການພັກແຂວງ, ເລຂາພັກເມືອງ, ເຈົ້າເມືອງ 30 ທ່ານ, ຍິງ 1 ທ່ານ; ຮອງເລຂາພັກເມືອງ ຊີ້ນຳຂົງເຂດຕ່າງໆຢູ່ຂັ້ນເມືອງ 6 ທ່ານ, ຍິງ 1 ທ່ານ, ກຳມະການພັກເມືອງ, ຮອງເຈົ້າເມືອງ ແລະ ຫົວໜ້າຄະນະຈັດຕັ້ງເມືອງ 8 ທ່ານ, ຍິງ 1 ທ່ານ ເຊິ່ງຈະໄດ້ດໍາເນີນການຝຶກອົບຮົມເປັນໄລຍະເວລາ 14 ວັນ ເລີ່ມແຕ່ວັນທີ 22 ພະຈິກ ຫາ 10 ທັນວາ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ