ໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງວຽງຈັນ, ແມ່ນອົງການວິຊາການຂັ້ນແຂວງ, ນະຄອນຫຼວງ ທີ່ມີຖານະທຽບເທົ່າກັບຄະນະຕ່າງໆຂອງພັກ ແລະ ພະແນກການຕ່າງໆປະຈຳຢູ່ຂັ້ນແຂວງ, ນະຄອນຫຼວງເຊິ່ງຢູ່ພາຍໃຕ້ການນໍາພາ-ຊີ້ນໍາໂດຍກົງທາງດ້ານການເມືອງ, ແນວຄິດ ແລະ ການຈັດຕັ້ງຂອງຄະນະບໍລິຫານງານພັກ, ຄະນະປົກຄອງແຂວງ ຫຼື ນະຄອນຫຼວງ, ພ້ອມດຽວກັນນີ້ກໍ່ຢູ່ພາຍໃຕ້ການນໍາພາ-ຊີ້ນໍາທາງດ້ານວິຊາສະເພາະ ແລະ ວິຊາການຂອງສະຖາບັນການເມືອງ ແລະ ການປົກຄອງແຫ່ງຊາດ; ມີ 3 ພາລະບົດບາດໃຫຍ່ຄື: ໜຶ່ງ, ພາລະບົດບາດໃນການຄົ້ນຄ້ວາທິດສະດີ ແລະ ພຶດຕິກໍາ ຮັບໃຊ້ການຮຽນ-ການສອນ, ສະໜອງຂໍ້ມູນທາງດ້ານວິທະຍາສາດໃຫ້ແກ່ການວາງແນວທາງ, ນະໂຍບາຍ ຂອງຄະນະບໍລິຫານງານພັກ ອົງການປົກຄອງແຂວງ ຫຼື ນະຄອນຫຼວງ; ສອງ, ມີພາລະບົດບາດໃນການຈັດຝຶກອົບຮົມ, ຍົກລະດັບພະນັກງານ-ລັດຖະກອນ, ນາຍທະຫານ ແລະ ນາຍຕໍາຫຼວດ ທີ່ມີຕໍາແໜ່ງລະດັບກາງ, ລະດັບຕົ້ນຂັ້ນແຂວງ, ຂັ້ນເມືອງ ແລະ ພະນັກງານຂັ້ນບ້ານ ກ່ຽວກັບທິດສະດີການເມືອງ-ການປົກຄອງ ຕາມຫຼັກສູດຂອງສະຖາບັນການເມືອງ ແລະ ການປົກຄອງແຫ່ງຊາດ; ສາມ, ມີພາລະບົດບາດຊີ້ນໍາດ້ານວິຊາສະເພາະ ແລະ ວິຊາການຕໍ່ສູນຝຶກອົບຮົມທິດສະດີການເມືອງ ແລະ ການປົກຄອງ ຫຼື ສູນຝຶກອົບຮົມບັນດາພະແນກການອ້ອມແຂວງ ຫຼື ນະຄອນຫຼວງ; ມີ 12 ໜ້າທີ່ຫຼັກ ແລະ 7 ຂອບເຂດສິດ ຕາມຂໍ້ກໍານົດເລກທີ 1131/ສມປຊ, ລົງວັນທີ 24 ຕຸລາ 2019.
ສະນັ້ນ, ເພື່ອເປັນການສະຫຼຸບຖອດຖອນບົດຮຽນ ຜູ້ບໍລິຫານ-ຄຸ້ມຄອງໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ສົກປີ 2020-2021 ແລະ ທິດທາງແຜນການ 2021-2022, ພາຍໃຕ້ການເປັນ ປະທານຂອງ ທ່ານ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຕາງໜ້າຫົວໜ້າກົມ, ຫ້ອງການ, ຄະນະຕ່າງໆ ແລະ ສູນຕ່າງໆ, ຕາງໜ້າຫົວໜ້າຄະນະໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງເຂົ້າຮ່ວມພາກສ່ວນລະ 2 ທ່ານ.
ໃນພິທີບັນດາຜູ້ເຂົ້າຮ່ວມກອງປະຊຸມໄດ້ຮັບຟັງບົດສະຫຼຸບລາຍງານ ແລະ ທິດທາງແຜນການໃນຕໍ່ໜ້າ, ຊຶ່ງສົກປີ 2020-2021 ຜູ້ບໍລິຫານ-ຄຸ້ມຄອງໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ໄດ້ສ້າງຜົນງານການເຄື່ອນໄຫວຫຼາຍໆດ້ານທີ່ພົ້ນເດັ່ນໄດ້ຖືສຳຄັນ ແລະ ເອົາໃຈໃສ່ສຶກສາອົບຮົມການເມືອງ-ແນວຄິດ, ໃນນີ້ບັນຫາສຳຄັນກວ່າໝູ່ແມ່ນການສຶກສາອົບຮົມແນວທາງ, ແຜນນະໂຍບາຍຂອງພັກ, ລະບຽບ, ກົດໝາຍຂອງລັດ ສາມາດຈັດຕັ້ງການເຊື່ອມຊຶມໄດ້ຈຳນວນ 348 ຄັ້ງ, ມີຜູ້ເຂົ້າຮ່ວມຈໍານວນທັງໝົດ 9.824 ເທື່ອຄົນ, ຍິງ 2.927 ເທື່ອຄົນ.ຖ້າທຽບໃສ່ສົກປີຜ່ານມາເຫັນວ່າຈຳນວນຄັ້ງນັ້ນແມ່ນຫຼຸດຫຼົງ 13 ຄັ້ງ, ສ່ວນຈໍານວນຄົນເຂົ້າຮ່ວມແມ່ນມີຈໍານວນເພີ່ມຂຶ້ນ 1.111 ເທື່ອຄົນ ແລະ ການຈັດຕັ້ງໂຄສະນາເຜີຍແຜ່ເອກະສານທີ່ສໍາຄັນຂອງພັກ-ຂອງຊາດມີຈໍານວນທັງໝົດ 187 ຄັ້ງ, ມີຜູ້ເຂົ້າຮ່ວມທັງໝົດ 14.838 ເທື່ອຄົນ, ຍິງ 4.220 ເທື່ອຄົນ. ຖ້າທຽບໃສ່ສົກປີຜ່ານມາເຫັນວ່າດ້ານຈຳນວນແມ່ນເພີ່ມຂຶ້ນ 33 ຄັ້ງ, ຈໍານວນຄົນເພີ່ມຂຶ້ນ 3.551 ເທື່ອຄົນ.
ຜູ້ບໍລິຫານ ຕະຫຼອດໄລຍະຜ່ານມາ ຍັງໄດ້ນໍາພາ-ຊີ້ນໍາທາງດ້ານວິຊາການ ຕໍ່ບັນດາໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ແມ່ນພາລະບົດບາດໜຶ່ງທີ່ສໍາຄັນເຊິ່ງພັກ-ລັດ ໄດ້ມອບໝາຍໃຫ້ສະຖາບັນການເມືອງ ແລະ ການປົກຄອງແຫ່ງຊາດ, ກຳແໜ້ນຈິດໃຈດັ່ງກ່າວ ຄະນະບໍລິຫານງານພັກສະຖາບັນ ໄດ້ເອົາໃຈໃສ່ຊີ້ນໍາບັນດາກົມ, ຫ້ອງການ, ບັນດາຄະນະຕ່າງໆໃນສະຖາບັນ ໃນການອໍານວຍຄວາມສະດວກແຕ່ລະດ້ານໃຫ້ໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ຢ່າງເປັນປົກກະຕິຕະຫຼອດມາ ໂດຍສະເພາະໄດ້ຊີ້ນໍາກົມຄຸ້ມຄອງການຮຽນ-ການສອນ ເຊິ່ງເປັນເສນາທິການໃນການປະສານງານໂດຍກົງທາງດ້ານວິຊາການ. ນອກນັ້ນ, ສົກປີ 2020-2021 ໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ໄດ້ສືບຕໍ່ດຳເນີນການຮຽນ-ການສອນລະບົບອະນຸປະລິນຍາ, ລະບົບຊັ້ນກາງ, ລະບົບຊັ້ນຕົ້ນ, ລະບົບ 45 ວັນ ແລະ ລະບົບ 10 ວັນໃຫ້ເລຂາພັກບ້ານ ແລະ ຄະນະພັກບ້ານ ມີທັງໝົດ 151 ຊຸດຮຽນ, ມີຜູ້ເຂົ້າຮຽນທັງໝົດ 8.592 ຄົນ, ຍິງ 2.087 ຄົນ.
ສັງລວມແລ້ວ, ຜູ້ບໍລິຫານງານ-ຜູ້ຄຸ້ມຄອງແມ່ນໄດ້ສຸມທຸກການເຄື່ອນໄຫວວຽກງານຄຸ້ມຄອງໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ແມ່ນໄດ້ເອົາແນວທາງອັນຖືກຕ້ອງຂອງພັກ ເປັນເຂັມທິດເຍືອງທາງ ແລະ ມີການນຳພາ-ຊີ້ນຳຢ່າງໃກ້ຊິດຕິດແທດ ແລະ ຕໍ່ເນື່ອງ ແລະ ຮອບດ້ານ ຂອງຄະນະພັກສະຖາບັນການເມືອງ ແລະ ການປົກຄອງແຫ່ງຊາດ ແລະ ຄະນະປະຈຳພັກແຂວງ, ນະຄອນຫຼວງ ຈຶ່ງເຮັດໃຫ້ວຽກງານການເມືອງປະກົດຜົນເປັນຈິງ.
ກອງປະຊຸມດຳເນີນເປັນເວລາ 3 ວັນ ລະຫວ່າງວັນທີ 15-16-17 ພະຈິກ ທີ່ ສະໂມສອນ ສະຖາບັນການເມືອງ ແລະ ການປົກຄອງແຫ່ງຊາດ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ