ໃນວັນທີ 13/10/2021 ໂຮງຮຽນການເມືອງ ແລະ ການປົກຄອງແຂວງບໍ່ແກ້ວ ໄດ້ຈັດຕັ້ງກອງປະຊຸມສະຫຼຸບຖອດຖອນບົດຮຽນກ່ຽວກັບການຈັດຕັ້ງປະຕິບັດໂຄງການຫຼັກສູດການຮຽນ-ການສອນ ທີ່ໂຮງຮຽນການເມືອງ ແລະ ການປົກຄອງແຂວງບໍ່ແກ້ວ, ໂດຍການເປັນປະທານ ທ່ານ ປທ ຄຳແສງ ສຸລິຍະວົງ ກຳມະການພັກແຂວງ, ຫົວໜ້າໂຮງຮຽນການເມືອງ ແລະ ການປົກຄອງແຂວງບໍ່ແກ້ວ ເຂົ້າຮ່ວມມີຄະນະພັກ-ຄະນະນຳໂຮງຮຽນການເມືອງ ແລະ ການປົກຄອງແຂວງ, ພ້ອມດ້ວຍພະນັກງານ, ຄູ-ອາຈານທັງໝົດ,ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສະຫຼຸບຕີລາຄາຄືນການຄົ້ນຄວ້າ ແລະ ຈັດຕັ້ງປະຕິບັດແຜນການຮຽນ-ການສອນ ໃນໄລຍະ 2020-2021 ຜ່ານມາ. ໂດຍສະເພາະແມ່ນໄດ້ສຸມໃສ່ສະຫຼຸບການຈັດຕັ້ງປະຕິບັດໜ້າທີ່ວຽກງານຂອງ 4 ຂະແໜງການຕົ້ນຕໍຄື: ຂະແໜງການບໍລິຫານ-ຄຸ້ມຄອງ, ຂະແໜງຄຸ້ມຄອງການຮຽນ-ການສອນ, ຂະແໜງວິຊາການ, ຂະແໜງຂໍ້ມູນຂ່າວສານ ເຊິ່ງໃນກອງປະຊຸມໄດ້ຍົກໃຫ້ເຫັນຜົນງານດ້ານຕັ້ງໜ້າ, ບັນຫາຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້ຈາກການບໍລິຫານ-ຄຸ້ມຄອງການຮຽນ-ການສອນຜ່ານມາ; ພ້ອມນັ້ນກໍ່ໄດ້ກຳນົດທິດທາງແຜນການໃນຕໍ່ໜ້າ.
ໃນຕອນທ້າຍ ທ່ານ ປທ ຄຳແສງ ສຸລິຍະວົງ ກຳມະການພັກແຂວງ ຫົວໜ້າໂຮງຮຽນການເມືອງ ແລະ ການປົກຄອງແຂວງບໍ່ແກ້ວ ປະທານກອງປະຊຸມໄດ້ມີຄຳເຫັນແລກປ່ຽນ ແລະ ເນັ້ນໜັກບາງບັນຫາດັ່ງນີ້: 1). ພາຍຫຼັງສຳເລັດກອງປະຊຸມໃຫ້ແຕ່ລະຂະແໜງຮີບຮ້ອນປັບປຸງຄືນບົດສະຫຼຸບຂອງຕົນຕາມການປະກອບຄຳຄິດຄຳເຫັນ ຂອງຜູ້ແທນກອງປະຊຸມ ເພື່ອເປັນບ່ອນອີງໃຫ້ແກ່ການສືບຕໍ່ຈັດຕັ້ງປະຕິບັດໃນຕໍ່ໜ້າໃຫ້ດີຂຶ້ນ. 2). ຄະນະພັກ-ຄະນະນຳ, ພະນັກງານ, ຄູ-ອາຈານທຸກຄົນຕ້ອງຍົກສູງຄວາມຮັບຜິດຊອບຂອງຕົນ. 3). ເອົາໃຈໃສ່ສືບຕໍ່ປັບປຸງແບບແຜນວິທີເຮັດວຽກໃຫ້ມີວິທະຍາສາດ, ສອດຄ່ອງກັບສະພາບການ. 4). ສືບຕໍ່ເປັນເຈົ້າການຝຶກຝົນຫຼໍ່ຫຼອມຕົນເອງຢ່າງຮອບດ້ານ. 5). ເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ. 6). ສືບຕໍ່ກະກຽມເງື່ອນໄຂຮອບດ້ານໃຫ້ແກ່ການເປີດການຮຽນ-ການສອນຊັ້ນກາງ ຮຸ່ນທີ XI ຂອງແຂວງ.
ຂ່າວ: ທ່ານ ນ. ສາຍປະເສີດ ທອງມະນິໄຊ
ຮູບພາບ: ທ່ານ ຮັກ ໄຊຍະເດດ
ບັນນາທິການ: ທ່ານ ປທ ບຸນປັນ ສຸມຸນທອງ