ເພື່ອເຮັດໃຫ້ການຈັດຕັ້ງເຜີຍແຜ່ ແລະເຊື່ອມຊຶມບັນດາມະຕິ, ຄໍາສັ່ງ ແລະ ນິຕິກຳຕ່າງໆ ຂອງຂັ້ນເທິງວາງອອກ ໃຫ້ໄດ້ຮັບການຈັດຕັ້ງເຊື່ອມຊຶມຢ່າງທົ່ວເຖິງໃນຂອບເຂດທົ່ວປະເທດ. ເວົ້າລວມ, ເວົ້າສະເພາະກໍ່ແມ່ນຢູ່ໃນສະຖາບັນການເມືອງ ແລະ ການປົກຄອງແຫ່ງຊາດ ໃຫ້ໄດ້ຮັບການຈັດຕັ້ງເຜີຍແຜ່ ແລະເຊື່ອມຊຶມໃຫ້ບັນດາສະມາຊິກພັກ, ຄູ-ອາຈານ ແລະ ນັກສຶກສາທຸກຮຸ່ນ, ທຸກລະບົບໃນທົ່ວສະຖາບັນ ສມປຊ ຢ່າງທົ່ວເຖິງ ແລະໄດ້ຮັບຜົນສໍາເລັດຕາມລະດັບຄາດໝາຍ.
ດັ່ງນັ້ນ, ໃນຕອນບ່າຍຂອງວັນທີ 10 ກັນຍາ 2021 ເວລາ 13:00 ໂມງ ຢູ່ໃນຫ້ອງຮຽນອະນຸປະລິນຍາຮຸ່ນທີ XIX ໄດ້ຈັດຕັ້ງການເຊື່ອມຊຶມບັນດາມະຕິ, ຄໍາສັ່ງ ແລະນິຕິກຳຕ່າງໆຂອງຂັ້ນເທິງ ໃຫ້ແກ່ນັກສຶກສາຢູ່ພາຍໃນຫ້ອງຮຽນອະນຸປະລິນຍາ ຮຸ່ນທີ XIX ໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ.
ພິທີເຊື່ອມຊຶມບັນດາມະຕິ, ຄໍາສັ່ງ ແລະນິຕິກຳຕ່າງໆໃນຄັ້ງນີ້ ແມ່ນພາຍໃຕ້ການເປັນປະທານ ຂອງ ສະຫາຍ ນາງ ສອນດາວັນ ວົງສັນຕິ ເລຂາຄະນະພັກ, ຫົວໜ້າຫ້ອງຮຽນອະນຸປະລິນຍາ ຮຸ່ນທີ XIX, ພ້ອມດ້ວຍຄະນະພັກ, ຄະນະຫ້ອງ ແລະ ນັກສຶກສາ ທັງໝົດຈໍານວນ 55 ສະຫາຍ, ຍິງ 14 ສະຫາຍ.
ເຊິ່ງບັນດາເອກະສານ ແລະນິຕິກຳຕ່າງໆ ທີ່ໄດ້ນໍາມາຈັດຕັ້ງເຊື່ອມຊຶມ ໃຫ້ນັກສຶກສາໃນຄັ້ງນີ້ມີຄື:
1. ແຈ້ງການ ຂອງຫົວໜ້າສະຖາບັນ ສມປຊ ສະບັບເລກທີ 979/ສມປຊ-ຈຕງ, ລົງວັນທີ 03 ກັນຍາ 2021 ວ່າດ້ວຍຈັດຕັ້ງກອງປະຊຸມເຊື່ອມຊຶມ ກົດລະບຽບຂອງພັກ ແລະຄໍາແນະນໍາກ່ຽວກັບ ການຈັດຕັ້ງປະຕິບັດກົດລະບຽບພັກປະຊາຊົນປະຕິວັດລາວ ສະໄໝທີ XI.
2. ຄໍາແນະນໍາຂອງຫົວໜ້າຄະນະຈັດຕັ້ງສູນກາງພັກ ສະບັບເລກທີ 102/ຄຈສພ, ລົງວັນທີ 24 ມິຖຸນາ 2021 ກ່ຽວກັບການຈັດຕັ້ງປະຕິບັດກົດລະບຽບ ຂອງພັກປະຊາຊົນປະຕິວັດລາວ ສະໄໝທີ XI.
3. ມະຕິຕົກລົງຂອງຄະນະບໍລິຫານງານສູນກາງພັກ ສະບັບເລກທີ 01/ຄບສພ, ລົງວັນທີ 29 ມີນາ 2021 ວ່າດ້ວຍການປະກາດໃຊ້ກົດລະບຽບຂອງພັກປະຊາຊົນປະຕິວັດລາວ ສະໄໝທີ XI.
ບັນດາເອກະສານ ແລະ ນິຕິກຳຕ່າງໆ ທີ່ໄດ້ນໍາມາເຊື່ອມຊຶມໃນຄັ້ງນີ້ ແມ່ນໄດ້ຮັບຄວາມສົນໃຈຢ່າງກວ້າງຂວາງ ຈາກນັກສຶກສາ, ນອກຈາກນັ້ນແລ້ວ ເພື່ອເຮັດໃຫ້ມີຄວາມຮັບຮູ້ ແລະເຂົ້າໃຈຢ່າງເລິກເຊິ່ງເຖິງຖອງ ກໍ່ຍັງໄດ້ມີການປະກອບຄໍາຄິດຄໍາເຫັນຢ່າງຟົດຟື້ນ ແລະກົງໄປກົງມາຈາກຄະນະພັກ, ຄະນະຫ້ອງ ແລະບັນດານັກສຶກສາ ຢູ່ໃນຫ້ອງຮຽນອະນຸປະລິນຍາຮຸ່ນທີ XIX ຢ່າງເປັນຂະບວນຟົດຟື້ນ.
ພິທີໄດ້ເຊື່ອມຊຶມ ແຈ້ງການ, ຄໍາແນະນໍາ ແລະກົດລະບຽບ ຂອງພັກປະຊາຊົນປະຕິວັດລາວ ສະໄໝທີ XI ໃນຄັ້ງນີ້ ໄດ້ດຳເນີນໄປດ້ວຍບັນຍາກາດຟົດຟື້ນ, ມີຄວາມໝາຍ ແລະ ຄວາມສໍາຄັນເປັນຢ່າງຍິ່ງ, ເປັນບາດກ້າວໜຶ່ງເຊິ່ງໄດ້ເຮັດໃຫ້ຄະນະພັກ, ຄະນະຫ້ອງ ແລະນັກສຶກສາ ຫ້ອງຮຽນອະນຸປະລິນຍາ ຮຸ່ນທີ XIX ມີຄວາມຮັບຮູ້ ແລະ ເຂົ້າໃຈຕໍ່ກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ຢ່າງເລິກເຊິ່ງເຖິງຖອງ.
ພິທີດັ່ງກ່າວໄດ້ດຳເນີນມາຮອດເວລາ 16:00 ໂມງ, ເປັນເວລາ 1 ຕອນ ແລະກໍ່ໄດ້ປິດລົງ ດ້ວຍໝາກຜົນອັນຈົບງາມ ແລະ ສໍາເລັດຕາມລະດັບຄາດໝາຍທີ່ວາງໄວ້.
ຂ່າວ/ພາບ: ເຈດຕະນາ ພັນທະລາ.
ບັນນາທິການ: ປທ ບຸນປັນ ສຸມຸນທອງ