ໃນວັນທີ 23 ກຸມພາ ສະຫະພັນກໍາມະບານສະຖາບັນການເມືອງ ແລະການປົກຄອງແຫ່ງຊາດ ໄດ້ຈັດຕັ້ງພິທີປາຖະກະຖາເລົ່າມູນເຊື້ອການກໍາເນີດ ແລະເຕີບໃຫຍ່ຂະຫຍາຍຕົວ ຂອງອົງການຈັດຕັ້ງກໍາມະບານລາວຄົບຮອບ 65 ປີ (1 ກຸມພາ ປີ 1956 -1 ກຸມພາ ປີ 2021) ໂດຍໃຫ້ກຽດເລົ່າມູນເຊື້ອຂອງ ທ່ານ ນ.ອາລີ ວົງໝໍ່ບຸນທໍາ ກໍາມະການສູນກາງພັກ, ເລຂາຄະນະພັກ, ປະທານຄະນະບໍລິຫານງານສູນກາງສະຫະພັນກໍາມະບານລາວ, ໃຫ້ກຽດເຂົ້າຮ່ວມຮັບຟັງຂອງ ທ່ານ ຮສ ພູວົງ ອຸ່ນຄໍາແສນ ກໍາມະການສູນກາງພັກ, ເລຂາຄະນະພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຄະນະພັກ, ຄະນະນໍາທຸກຂັ້ນທົ່ວ ສມປຊ ແລະພະນັກງານ, ຄູ-ອາຈານທີ່ເປັນສະມາຊິກກໍາມະບານສມປຊ ເຂົ້າຮ່ວມຢ່າງພ້ອມພຽງ.
ປະທານຄະນະບໍລິຫານງານສູນກາງສະຫະພັນກໍາມະບານລາວ ໄດ້ຍົກໃຫ້ເຫັນມູນເຊື້ອການກໍາເນີດ ແລະເຕີບໃຫຍ່ຂະຫຍາຍ ຕົວຂອງອົງການຈັດຕັ້ງກໍາມະບານລາວ ຊຶ່ງໄດ້ຕິດພັນກັບຂະບວນວິວັດການປະຕິວັດຊາດ ແລະຕິດພັນກັບການປົກປ້ອງສິດ ແລະຜົນປະໂຫຍດອັນຊອບທໍາ ຂອງກຳມະກອນ ແລະຊາວຜູ້ອອກແຮງງານ ໃນແຕ່ລະໄລຍະຕະຫຼອດມາ. ໂດຍສະເພາະນັບຕັ້ງແຕ່ທ້າຍສະຕະວັດທີ 19, ພວກລ່າເມືອງຂຶ້ນຝຣັ່ງໄດ້ເຂົ້າມາ ແລະ ຍຶດຄອງ 3 ປະເທດອິນດູຈີນ ເຊິ່ງມີລາວ, ຫວຽດນາມແລະ ກໍາປູເຈຍ, ພວກເຂົາເອົາ 3 ຊາດນີ້ລວມເຂົ້າກັນເປັນອັນດຽວເອີ້ນຊື່ວ່າ: ສະຫະພັນອິນດູຈີນຝຣັ່ງເສດ. ນອກຈາກນີ້ ຍັງໄດ້ຍົກໃຫ້ເຫັນເຖິງຄວາມໂຫດຮ້າຍຂອງຝຣັ່ງທີ່ກົດຂີ່ຂູດຮີດກຳມະກອນ ແລະ ຊາວຜູ້ອອກແຮງ ງານລາວໃນເມື່ອກ່ອນ ຈົນເຮັດໃຫ້ກຳມະກອນ ແລະຊາວຜູ້ອອກແຮງງານໄດ້ລຸກຂຶ້ນຕໍ່ສູ້ຫຼາຍຄັ້ງ. ນັບຕັ້ງແຕ່ ປີ 1956 ເຖິງປັດຈຸບັນ ອົງການ
ກໍາມະບານລາວ ໄດ້ມີຄວາມເຕີບໃຫຍ່ຂະຫຍາຍຕົວເປັນກ້າວໆມາພາຍໃຕ້ການນຳພາຂອງພັກ ຊຶ່ງໄດ້ສຸມໃສ່ໂຄສະນາຂົນຂວາຍ, ເຕົ້າໂຮມກໍາມະກອນ, ຊາວຜູ້ອອກແຮງງານບັນດາເຜົ່າ ໃຫ້ມີຄວາມຕື່ນຕົວປະຕິວັດ, ນີນໍ້າໃຈຮັກຊາດ, ມີທັດຊະນະຊົນຊັ້ນກໍາມະກອນ, ມີຄວາມຕື່ນຕົວທາງດ້ານຊົນຊັ້ນຈະແຈ້ງ, ເສີມຂະຫຍາຍປະຊາທິປະໄຕ, ມີລະບຽບແບບແຜນ, ເປັນພົນລະເມືອງດີຂອງຊາດ, ສົ່ງເສີມການມີວຽກເຮັດງານທໍາ ແລະເປັນຕົວແທນໃຫ້ແກ່ການປົກປ້ອງສິດຜົນປະໂຫຍດອັນຊອບທໍາໃຫ້ແກ່ກໍາມະກອນ, ຊາວຜູ້ອອກແຮງງານ, ກາຍເປັນກໍາລັງແຮງເຂົ້າຮ່ວມຢ່າງຕັ້ງໜ້າ ແລະເປັນເຈົ້າການໃນການຕໍ່ສູ້ກູ້ຊາດ, ປົກປັກຮັກສາ, ສ້າງສາ ແລະ ພັດທະນາປະເທດຊາດຕາມທິດກ້າວຂຶ້ນສັງຄົມນິຍົມ.
ມາໃນວັນທີ 24-26 ກຸມພາ ຄະນະບໍລິຫານງານສະຫະພັນກໍາມະບານ ສມປຊ ໄດ້ສົມທົບກັບກົມໂຄສະນາອົບຮົມ ສູນກາງສະຫະ ພັນກຳມະບານລາວ ໄດ້ຈັດເຝິກອົບຮົມຄວາມຮູ້ພື້ນຖານວຽກງານກຳມະບານໃຫ້ແກ່ສະມາຊິກກຳມະບານ ສມປຊ ເພື່ອເປັນການຍົກລະດັບຄວາມຮູ້ຄວາມສາມາດໃນການຊີ້ນຳ-ນຳພາຂອງວຽກງານກຳມະບານ, ພິທີດັ່ງກ່າວ, ໃຫ້ກຽດເປັນປະທານຂອງ ທ່ານ ປອ ສາຍຄໍາ ມູນມະນີວົງ ຄະນະບໍລິຫານງານພັກ, ຜູ້ຊີ້ນຳວຽກງານອົງການຈັດຕັ້ງມະຫາຊົນ, ທ່ານ ປອ ສຸພາວະດີ ຫຼ້າຄໍາສາຍ ກໍາມະການຄະນະບໍລິຫານງານສູນກາງສະຫະພັນກໍາມະບານລາວ, ປະທານຄະນະບໍລິຫານງານສະຫະພັນກໍາມະບານ ສມປຊ, ທ່ານ ນາງ ຈົງຈິດ ວົງສາ ຫົວໜ້າກົມໂຄສະນາອົບຮົມ ສູນກາງສະຫະພັນກໍາມະບານລາວ, ມີຄະນະບໍລິຫານງານສະຫະພັນກໍາມະບານ ສມປຊ, ຄະນະວິທະຍາກອນ ຈາກສູນກາງສະຫະພັນກໍາມະບານລາວ ແລະນັກສໍາມະນາກອນທີ່ເປັນຕົວແທນຈາກກໍາມະບານຮາກຖານທົ່ວ ສມປຊ ເຂົ້າຮ່ວມ.
ທ່ານ ປອ ສີສົມພອນ ວົງພະຈັນ ຄະນະສະຫະພັນກຳມະບານ ສມປຊ ໄດ້ຜ່ານບົດສະຫຼຸບຂອງພິທີເຝິກອົບຮົມວຽກງານກຳມະບານວ່າ: ພິທີເຝິກອົບຮົມມີສໍາມະນາກອນຈຳນວນ 35 ທ່ານ, ຍິງ 17 ທ່ານ ຊຶ່ງຕະຫຼອດໄລຍະເວລາ 3 ວັນວິທະຍາກອນໄດ້ນໍາເອົາ 6 ບົດຮຽນມາບັນລະຍາຍເຝິກອົບຮົມເຊັ່ນ: 1). ທິດສະດີພຶ້ນຖານຂອງກຳມະບານ, 2). ທັດສະນະຂອງພັກຕໍ່ອົງການກຳມະບານ, 3). ຄວາມຮູ້ພຶ້ນຖານວຽກງານກໍາມະບານ, 4). ວຽກງານປົກປ້ອງແຮງງານ, 5). ຄວາມປອດໄພແຮງງານ ແລະ 6). ວຽກງານແຂ່ງຂັນ 5 ເປັນເຈົ້າ. ຜ່ານການຈັດຕັ້ງເຝິກອົບຮົມຄວາມຮູ້ພື້ນຖານວຽກງານກຳມະບານ ຂອງສະຫະພັນກໍາມະບານສະຖາບັນການເມືອງ ແລະການປົກຄອງແຫ່ງຊາດ ຊຶ່ງສາມາດເຮັດໃຫ້ນັກສໍາມະນາກອນກຳໄດ້ເນື້ອໃນໄດ້ຢ່າງເລິກເຊິ່ງ ເພື່ອໄປໝູນໃຊ້ເຂົ້າໃນວຽກງານຕົວຈິງຂອງຕົນ.
ຫຼັງຈາກນັ້ນ, ທ່ານ ນ. ຈົງຈິດ ວົງສາ ພ້ອມດ້ວຍທ່ານ ປອ ສຸພາວະດີ ຫຼ້າຄໍາສາຍ ໄດ້ມອບໃບຢັ້ງຢືນ ໃຫ້ນັກສຳມະນາກອນ ທີ່ໄດ້ຜ່ານການເຝິກອົບຮົມວຽກງານກຳມະບານ ແລະໄດ້ຮັບຟັງການໂອ້ລົມຊີ້ທິດຈາກ ທ່ານ ປອ ສາຍຄໍາ ມູນມະນີວົງ ກໍາມະການຄະນະພັກ ສມປຊ, ຜູ້ຊີ້ນໍາວຽກງານອົງການຈັດຕັ້ງມະຫາຊົນອີກດ້ວຍ.
ຂ່າວ: ຕາອັອດ ແສນທະວີສຸກ
ຮູູບພາບ: ນ. ທິດດາວອນ ດວງປະເສີດ
ບັນນາທິການ: ຄອນສະຫວັນ ແສນຍານຸພາບ