ກຳມະບານຮາກຖານ ສູນຂໍ້ມູນຂ່າວສານ ການເມືອງ-ການປົກຄອງ ແລະ ສູນຄົ້ນຄວ້າແນວຄິດໄກສອນ ພົມວິຫານ ທັດສະນະສຶກສາ ຢູ່ ບໍລິສັດດາວທຽມລາວເອເຊຍປາຊີຟິກ – ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ)

ໃນຕອນເຊົ້າ ວັນທີ 27/08/2020 ກຳມະບານຮາກຖານ ສູນຂໍ້ມູນຂ່າວສານ ການເມືອງ-ການປົກຄອງ ແລະ ສູນຄົ້ນຄວ້າແນວຄິດໄກສອນ ພົມວິຫານ ໄປທັດສະນະສຶກສາ ຢູ່ ບໍລິສັດດາວທຽມລາວເອເຊຍປາຊີຟິກ ພາຍໃຕ້ການນໍາພາຂອງ ທ່ານ ນາງ ອໍາພອນ ບຸນລືໄຕ ປະທານກໍາມະບານ ຮາກຖານສູນຂໍ້ມູນຂ່າວສານການ ເມືອງ-ການປົກຄອງ ແລະ ສູນຄົ້ນຄວ້າແນວຄິດໄກສອນ ພົມວິຫານ. ໃຫ້ການຕ້ອນຮັບຂອງທ່ານ ປທ ນາງ ທິດາວັນ ໝອກອິນຕາ ປະທານຮາກຖານກຳມະບານບໍລິສັດດາວທຽມລາວເອເຊຍປາຊີຟິກ.

ທ່ານ ສີສັນ ປອງນະທີ ຮອງອຳນວຍການໃຫຍ່ ບໍລິສັດດາວທຽມລາວເອເຊຍປາຊີຟິກຈຳກັດ ໄດ້ໃຫ້ກຽດເປັນວິທະຍາກອນ ອະທິບາຍກ່ຽວກັບຄວາມເປັນມາຂອງໂຄງການ ດາວທຽມລາວ (Laosat) ເຊິ່ງເລີ່ມແຕ່ວັນທີ 12 ທັນວາ 2012 ກະຊວງ ປທສ ຕາງໜ້າໃຫ້ລັດຖະບານລາວ ໄດ້ເຊັນສັນຍາກັບບໍລິສັດ APMT ສປ ຈີນ ເພື່ອປະຕິບັດໂຄງການສ້າງ, ສົ່ງດາວທຽມ ແລະ ກໍ່ສ້າງສູນບັນຊາພາກພື້ນດິນ ພ້ອມດ້ວຍການສ້າງນັກວິຊາການບັນຊາດາວທຽມໃຫ້ແກ່ຝ່າຍລາວ, ມາໃນຕອນເຊົ້າມືດວັນທີ 21 ພະຈິກ 2015 ທີ່ແຂວງເສສວນ ສປ ຈີນ. ດາວທຽມລາວດວງທຳອິດ “LAOSAT-1” ໄດ້ຖືກສົ່ງຂຶ້ນສູ່ອາວະກາດໃນຕຳແໜ່ງເສັ້ນໂຄຈອນ 128.5 ອົງສາ ດ້ວຍຜົນສຳເລັດ.

ໃນຕອນແລງວັນທີ 9 ມີນາ 2016 ໄດ້ມີພິທີມອບ-ຮັບ ດາວທຽມລາວເຊັດ 1 (LAOSAT-1) ແລະ ເປີດໂຕບໍລິສັດ ດາວທຽມລາວ ເອເຊຍ-ປາຊີຟິກ ຈຳກັດ ຂຶ້ນຢ່າງເປັນທາງການທີ່ ສະຖານີດາວທຽມພາກພື້ນດິນ ຫຼັກ 14 ເມືອງຫາດຊາຍຟອງ ນະຄອນຫຼວງວຽງຈັນ.

ປັດຈຸບັນມີຫຼາຍບໍລິສັດພາຍໃນ ແລະ ບໍລິສັດຕ່າງປະເທດ. ໃນນັ້ນ, ມີຮົງກົງ (ສປ.ຈີນ), ປະເທດຈີນຕອນໃຕ້ ແລະ ອິນໂດເນເຊຍ ເຊິ່ງກວມອັດຕາສ່ວນຫຼາຍກວ່າໝູ່ ໄດ້ເຊົ່າ ຕຼານສະປອນເດີ (ປ່ອງຮັບສົ່ງຜ່ານສັນຍານ) ໂດຍທີ່ບໍລິສັດດາວທຽມລາວ ໄດ້ກຳນົດຕຼຮານສະປອນເດີໄວ້ 17 ປ່ອງ ໄວ້ສຳລັບລູກຄ້າຕ່າງປະເທດ ຈາກທັງໝົດທີ່ມີ 22 ປ່ອງ.

ໂຄງການດາວທຽມລາວ (Laosat-1) ດັ່ງກ່າວນີ້ເປັນການຮ່ວມທຶນ ລະຫວ່າງ ລັດຖະບານ ສປປ ລາວ 45%, ບໍລິສັດ China-Pacific Mobile Telecommunications Satellite (APMT) ຂອງຈີນ 35%, ບໍລິສັດ Space Star Technology (SSTC) ຂອງຈີນ 15% ແລະ ບໍລິສັດ Asia Pacific Satellite Technology (APST) (ຮົງກົງ) 5% ເຊິ່ງການເຊັນສັນຍາຮ່ວມທຶນດັ່ງກ່າວ ແມ່ນເພື່ອສ້າງຄວາມສະດວກໃນວຽກບໍລິການ ການສື່ສານຜ່ານດາວທຽມປະເພດຕ່າງໆຢູ່ພາຍໃນ ແລະ ຕ່າງປະເທດເຊັ່ນ: ການສື່ສານສຳລັບວຽກງານຂອງລັດ ການໃຫ້ເຊົ່າຊ່ອງດາວທຽມ, ການບໍລິການໂທລະພາບຜ່ານດາວທຽມ, ການສື່ສານສຳລັບເຂດຊົນນະບົດ ແລະ ຫ່າງໄກສອກຫຼີ, ການສຶກສາ ແລະ ການແພດທາງໄກ, ລະບົບໂທລະຄົມມະນາຄົມ ແລະ ອິນເຕີເນັດການສື່ສານໃນວຽກງານບັນເທົາທຸກ ແລະ ຟື້ນຟູຈາກໄພພິບັດ.