ກອງປະຊຸມໃຫຍ່ຄັ້ງທີ V ຂອງອົງຄະນະພັກສະຖາບັນການເມືອງ ແລະ ການປົກຄອງແຫ່ງຊາດ ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 31 ກໍລະກົດ 2020 ທີ່ ສະຖາບັນການເມືອງ ແລະການປົກຄອງແຫ່ງຊາດ, ໂດຍການເປັນ ປະທານຂອງ ສະຫາຍ ຮສ ພູວົງ ອຸ່ນຄຳແສນ ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າ ສມປຊ, ໃຫ້ກຽດເຂົ້າຮ່ວມກອງປະຊຸມຂອງສະຫາຍ ສຈ. ປອ ກິແກ້ວ ໄຂຄໍາພິທູນ, ເລຂາທິການສູນກາງພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທຳແລະທ່ອງທ່ຽວ, ມີສະຫາຍໃນຄະນະບໍລິຫານງານພັກ, ຕາງໜ້າ 3 ອົງການຈັດຕັ້ງມະຫາຊົນ, ຜູ້ຕາງໜ້າຈາກອົງການຈັດຕັ້ງພັກ-ລັດຂັ້ນສູນກາງ ແລະທ້ອງຖິ່ນທີ່ກ່ຽວຂ້ອງ ພ້ອມທັງຜູ້ແທນສົມບູນທັງ 284 ສະຫາຍ, ຍິງ 82 ສະຫາຍ ເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ຮສ ພູວົງ ອຸ່ນຄຳແສນ ຮັກສາການເລຂາຄະນະບໍລິຫານງານພັກໄດ້ຂຶ້ນຜ່ານບົດລາຍງານການເມືອງທັງ 2 ພາກຄື:
ໜຶ່ງ, ຜົນສຳເລັດ ຂອງການນຳພາຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກສະຖາບັນການເມືອງ ແລະການປົກຄອງແຫ່ງຊາດໄລຍະ 2015-2020 ຊຶ່ງເນື້ອໃນໄດ້ສ່ອງແສງໃຫ້ເຫັນວ່າຄະນະບໍລິຫານງານພັກສະຖາບັນການເມືອງ ແລະການປົກຄອງແຫ່ງຊາດ ຍັງສືບຕໍ່ຖືເອົາວຽກງານການເມືອງ-ແນວຄິດເປັນວຽກງານກົກ, ເປັນວຽກງານບູລິມະສິດອັນສຳຄັນອັນດັບໜຶ່ງໃນການຈັດຕັ້ງ ແລະການເຄື່ອນໄຫວນຳພາ ຂອງຕົນ ແລະໄດ້ນໍາພາ-ຊີ້ນຳການຈັດຕັ້ງປະຕິບັດວຽກງານນີ້ຢ່າງເປັນລະບົບ, ປົກກະຕິຕໍ່ເນື່ອງ ໂດຍນໍາເອົາວຽກງານດັ່ງກ່າວສອດຫ້ອຍເຂົ້າກັບທຸກຂົງເຂດວຽກງານ ຂອງສະຖາບັນ ເຮັດໃຫ້ສະມາຊິກພັກ, ພະນັກງານ, ຄູ-ອາຈານ ແລະນັກສຶກສາທົ່ວ ສະຖາບັນການເມືອງ ແລະການປົກຄອງແຫ່ງຊາດມີຄວາມອຸ່ນອ່ຽນທຸນທ່ຽງ ຕັ້ງໜ້າປະຕິບັດໜ້າທີ່ວຽກງານ ແລະສຶກສາຄົ້ນຄວ້າຮໍ່າຮຽນດ້ວຍຄວາມເອົາໃຈໃສ ແລະມີຄວາມຮັບຜິດຊອບສູງ; ທາງດ້ານວິຊາສະເພາະການຮຽນ-ການສອນ ນັບແຕ່ປີ 2015 ມາຮອດປັດຈຸບັນ ມີຜູ້ເຂົ້າຮຽນລະບົບຕ່າງໆ ສະເພາະຢູ່ສະຖາບັນການເມືອງ ແລະການປົກຄອງແຫ່ງຊາດ ທັງໝົດ 2.287 ຄົນ, ຍິງ 512 ຄົນ; ຮຽນຈົບໄປແລ້ວ 1.480 ຄົນ, ຍິງ 315 ຄົນ ແລະ ກຳລັງສືບຕໍ່ຄົ້ນຄວ້າຮ່ຳຮຽນ 807 ຄົນ, ຍິງ 197 ຄົນ. ສ່ວນຫຼັກສູດຝຶກອົບຮົມຕາມຫົວຂໍ້ສະເພາະ ມີຜົນສຳເລັດ ເຊັ່ນ: ຫຼັກສູດຝຶກອົບຮົມເລຂາພັກບ້ານ ນາຍບ້ານ ໄດ້ເຮັດທົດລອງ ຢູ່ແຂວງຫົວພັນ 1 ຊຸດ ມີຜູ້ເຂົ້າຮ່ວມ 120 ຄົນ, ຍິງ 3 ຄົນ, ຫຼັງຈາກນັ້ນ ກໍໄດ້ມອບເປັນຄວາມຮັບຜິດຊອບ ຂອງໂຮງຮຽນການເມືອງ ແລະການປົກຄອງທ້ອງຖິ່ນ ເປັນຜູ້ຈັດຕັ້ງປະຕິບັດ, ຫຼັກສູດຝຶກອົບຮົມເລຂາພັກເມືອງ ຄະນະປະຈຳພັກເມືອງ ມີ 100 ຄົນ, ຍິງ 7 ຄົນ; ຫຼັກສູດຝຶກອົບຮົມ ຄະນະບໍລິຫານລັດວິສາຫະກິດ ມີຜູ້ເຂົ້າຮ່ວມ 48 ຄົນ, ຍິງ 3 ຄົນ; ຫຼັກສູດຝຶກອົບຮົມ 45 ວັນ ທີ່ຢູ່ກະຊວງ-ອົງການ ມີ 4.486 ຄົນ, ຍິງ 1.805 ຄົນ. ພິເສດຄະນະບໍລິຫານງານພັກສະຖາບັນ ໄດ້ເອົາໃຈໃສ່ນຳພາ-ຊີ້ນຳຢ່າງເປັນລະບົບ ກ່ຽວກັບວຽກງານຄົ້ນຄວ້າແນວຄິດໄກສອນພົມວິຫານ ຕາມມະຕິ ຂອງກົມການເມືອງສູນກາງພັກ ວ່າດ້ວຍການຄົ້ນຄວ້າແນວຄິດໄກສອນ ພົມວິຫານ ສະບັບເລກທີ 058/ກມສພ, ລົງວັນທີ 13 ທັນວາ 2018. ໄດ້ສຸມໃສ່ເກັບກຳ ແລະຮິບໂຮມເອກະສານກ່ຽວກັບການເຄື່ອນໄຫວ ຂອງປະທານ ໄກສອນ ພົມວິຫານ ເປັນຕົ້ນ: ເອກະສານ, ບົດໂອ້ລົມ, ບົດກ່າວປາໄສ, ບົດສູນທອນພົດ ແລະປຶ້ມການເຄື່ອນໄຫວຕ່າງໆ ເຊິ່ງເກັບກຳໄດ້ທັງໝົດ 500 ກວ່າລາຍການ, ລວມມີ 14.000 ກວ່າໜ້າ; ການນຳພາວຽກງານຕິດຕາມກວດກາ ແລະປ້ອງກັນພັກ. ແຕ່ປີ 2015-2017 ມີສະມາຊິກພັກເຂັ້ມແຂງ-ຮູ້ນຳພາຮອບດ້ານ 786 ສະຫາຍ, ຍິງ 178 ສະຫາຍ; ສະມາຊິກພັກແຂງ ມີ 23 ສະຫາຍ, ຍິງ 4 ສະຫາຍ; ສະຊິກພັກກາງ ແລະອ່ອນ ບໍ່ມີ; ມາຮອດປີ 2018-2019 ໄດ້ຕີລາຄາຈັດແບ່ງປະເພດສະມາຊິກພັກ ຕາມເນື້ອໃນສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເຊິ່ງມີສະມາຊິກພັກແຂງ 448 ສະຫາຍ, ຍິງ 111 ສະຫາຍ; ກາງ 15 ສະຫາຍ, ຍິງ 3 ສະຫາຍ; ມອບບັດໃຫ້ສະມາຊິກພັກ 789 ສະຫາຍ, ຍິງ 174 ສະຫາຍ…
ສອງ, ທິດທາງ ແລະໜ້າທີ່ຕົ້ນຕໍໃນການນຳພາຂອງອົງຄະນະພັກສະຖາບັນການເມືອງ ແລະການປົກຄອງແຫ່ງຊາດໄລຍະ 2020-2025 ໃນການຍົກລະດັບທາງດ້ານແນວຄິດ-ທິດສະດີ, ສະຖາບັນການເມືອງແລະການປົກຄອງແຫ່ງຊາດມີພາລະບົດບາດ, ໜ້າທີ່ສຳຄັນແຖວໜ້າໃນການກໍ່ສ້າງ, ບຳລຸງພະນັກງານ, ຖືເປັນເບົ້າຫຼອມພະນັກງານຜູ້ສືບທອດພາລະກິດປະຕິວັດຂອງພັກທີ່ຈົງຮັກພັກດີ ແລະມີຄວາມເດັດດ່ຽວໜຽວແໜ້ນທາງດ້ານແນວຄິດ-ທິດສະດີຕໍ່ອຸດົມການປະຕິວັດຂອງພັກເຮົາ; ເປັນສູນກາງແຫ່ງການຄົ້ນຄວ້າລັດທິມາກ-ເລນິນ, ແນວຄິດໄກສອນ ພົມວິຫານ, ມູນເຊື້ອ ແລະປະຫວັດສາດຂອງພັກ, ຂອງຊາດ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ວິທະຍາສາດການເມືອງ-ການປົກຄອງ, ວິທະຍາສາດການນຳພາຄຸ້ມຄອງ, ຮັບໃຊ້ການຮຽນ-ການສອນ, ສະໜອງຂໍ້ມູນວິທະຍາສາດໃຫ້ແກ່ການວາງແນວທາງ, ນະໂຍບາຍຂອງພັກ-ລັດ ໃນຊຸມປີຕໍ່ໜ້າຕ້ອງຮັບປະກັນໃຫ້ສະຖາບັນການເມືອງ ແລະການປົກຄອງແຫ່ງຊາດ ມີລະບົບພື້ນຖານໂຄງລ່າງ- ວັດຖຸເຕັກນິກ ທີ່ມີຄວາມທັນສະໄໝ; ມີຫຼັກສູດບຳລຸງ ແລະກໍ່ສ້າງທິດສະດີການເມືອງທີ່ເປັນລະບົບ; ດຳເນີນການຄົ້ນຄວ້າວິທະຍາສາດໂຄງການລະດັບຊາດໃນຫຼາຍຫົວຂໍ້, ສ້າງໄດ້ປື້ມແບບຮຽນ ແລະເອກະສານຄົ້ນຄວ້າທີ່ທັນກັບສະພາບການແຕ່ລະໄລຍະ ເພື່ອຮອງຮັບການປະຕິບັດໜ້າທີ່ການເມືອງຂອງສະຖາບັນ.
ກອງປະຊຸມຍັງໄດ້ຮັບຟັງການປະກອບຄໍາເຫັນຈາກຜູ້ຕາງໜ້າອົງການຈັດຕັ້ງມະຫາຊົນ, ຜູ້ຕາງໜ້າຄູ-ອາຈານອາວຸໂສ, ຜູ້ຕາງໜ້າຄູ-ອາຈານໜຸ່ມ ແລະຜູ້ຕາງໜ້ານັກສຶກສາ.
ຈາກນັ້ນ ຄະນະບໍລິຫານງານພັກຊຸດທີ IV ໄດ້ຂຶ້ນຜ່ານບົດສຳຫຼວກການຊີ້ນຳ-ນຳພາໃນໄລຍະ 2015-2020 ເຊິ່ງໄດ້ຕີລາຄາດ້ານດີ, ດ້ານອ່ອນ ຂໍ້ຄົງຄ້າງ ບົດຮຽນທີ່ຖອດຖອນໄດ້ ຈາກນັ້ນໄດ້ກ່າວອໍາລາໜ້າທີ່ ແລະມອບໜ້າທີ່ນໍາພາໃຫ້ຄະນະປະທານກອງປະຊຸມ ເພື່ອຊີ້ນໍາ-ນໍາພາກອງປະຊຸມ.
ໃນພາກບ່າຍຄະນະປະທານກອງປະຊຸມໄດ້ຊີ້ນໍາ-ນໍາພາການປ່ອນບັດເພື່ອເລືອກເອົາຄະນະພັກຊຸດໃໝ່ ແລະຜູ້ແທນໄປຮ່ວມກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ.
ຜ່ານການໃຊ້ສິດປະຊາທິປະໄຕຢ່າງເຕັມສ່ວນຂອງຜູ້ແທນກອງປະຊຸມຈໍານວນ 284 ສະຫາຍ ຕໍ໋ຜູ້ລົງຮັບສະໝັກເລືອກຕັ້ງທັງໝົດ 12 ສະຫາຍ, ຍິງ 4 ສະຫາຍ. ເລືອກເອົາ 9 ສະຫາຍ, ຜົນການປ່ອນບັດເລືອກຕັ້ງໄດ້ 9 ສະຫາຍ, ຍິງ 4 ສະຫາຍ.
ກອງປະຊຸມຄັ້ງປະຖົມມະລືກໄດ້ເປັນເອກະສັນເລືອກຕັ້ງເອົາ:
- ສະຫາຍ ຮສ ພູວົງ ອຸ່ນຄຳແສນ ເປັນເລຂາ ຄະນະບໍລິຫານງານພັກ
- ສະຫາຍ ປທ ນ. ບຸນມີ ຈຸນລະຈັກ ເປັນຮອງເລຂາ ຄະນະບໍລິຫານງານພັກ
- ສະຫາຍ ປທ ນ. ໃບຊ່ຽນ ມູນຕີວົງ ເປັນຄະນະປະຈຳ ຄະນະບໍລິຫານງານພັກ
- ສະຫາຍ ປອ ຄຳໃບ ມາລາສິງ ເປັນກຳມະການ ຄະນະບໍລິຫານງານພັກ
- ສະຫາຍ ປອ ດາວສະຫວັນ ເຄືອມີໄຊ ເປັນກຳມະການ ຄະນະບໍລິຫານງານພັກ
- ສະຫາຍ ປອ ນ. ໄກສອນ ຈັນສີນາ ເປັນກຳມະການ ຄະນະບໍລິຫານງານພັກ
- ສະຫາຍ ປທ ແສງທອງ ພຸດທະວົງ ເປັນກຳມະການ ຄະນະບໍລິຫານງານພັກ
- ສະຫາຍ ປອ ສາຍຄຳ ມູນມະນີວົງ ເປັນກຳມະການ ຄະນະບໍລິຫານງານພັກ
- ສະຫາຍ ປທ ນ. ຄຳຫຼ້າ ແກ້ວອຸ່ນຄຳ ເປັນກຳມະການ ຄະນະບໍລິຫານງານພັກ
ກອງປະຊຸມປະຖົມມະລຶກຍັງໄດ້ເລືອກຕັ້ງເອົາປະທານ ແລະ ຮອງປະທານກວດກາດັ່ງນີ້:
- ສະຫາຍ ປທ ນ. ບຸນມີ ຈຸນລະຈັກ ເປັນປະທານກວດກາ
- ສະຫາຍ ປອ ຄຳຫຼ້າ ລໍວານໄຊ ເປັນຮອງປະທານກວດກາ
- ສະຫາຍ ປທ ນ. ອານົງ ຂັນທະຍົງ ເປັນຮອງປະທານກວດກາ
ກອງປະຊຸມຄັ້ງນີ້ຜູ້ແທນກອງປະຊຸມຍັງໄດ້ໃຊ້ສິດຂອງຕົນປ່ອນບັດເລືອກເອົາຜູ້ແທນສົມບູນ ແລະສຳຮອງເພື່ອເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວໃນຄັ້ງຕໍ່ໄປທີ່ຈະມາເຖິງນີ້.
ທ້າຍພິທີສະຫາຍ ສຈ. ປອ ກິແກ້ວ ໄຂຄໍາພິທູນ ເລຂາທິການສູນກາງພັກ ໄດ້ມີຄໍາເຫັນ ແລະສະແດງຄວາມຊົມເຊີຍຕໍ່ຜົນສຳເລັດກອງປະຊຸມໃຫຍ່ຄັ້ງນີ້ ເຊິ່ງສະຫາຍໄດ້ເນັ້ນບາງຈຸດດັ່ງນີ້:
ໜຶ່ງ, ເພື່ອຕອບສະໜອງໄດ້ຄວາມຮຽກຮ້ອງຕ້ອງການຂອງການປ່ຽນແປງໃໝ່, ພິເສດແມ່ນຄວາມຮຽກຮ້ອງຕ້ອງການກ່ຽວກັບການປ່ຽນແປງໃໝ່ໃນການກໍ່ສ້າງ-ບຳລຸງສ້າງຖັນແຖວພະນັກງານໃຫ້ມີຄຸນທາດການເມືອງໜັກແໜ້ນ, ມີຄວາມສາມາດແລະໄດ້ຮັບຄວາມເຊື່ອໝັ້ນ, ສົມກັບຖານະຕຳແໜ່ງນັ້ນ, ອີງໃສ່ພາລະບົດບາດ, ໜ້າທີ່ໃໝ່ຂອງຕົນ.
ສອງ,ເອົາໃຈໃສ່ນຳພາ-ຊີ້ນຳສ້າງການຫັນປ່ຽນຢ່າງຕັ້ງໜ້າຕື່ມອີກໃນການປະຕິບັດໜ້າທີ່ບຳລຸງ-ກໍ່ສ້າງພະນັກງານໃຫ້ແກ່ພັກ, ໂດຍກໍາແໜ້ນທິດນຳໃນການກໍ່ສ້າງ-ບຳລຸງພະນັກງານຂອງພັກໃນແຕ່ລະໄລຍະ, ໃນຕໍ່ໜ້າສະຖາບັນຄວນສືບຕໍ່ພັດທະນາຫຼັກສູດການຮຽນ-ການສອນໃຫ້ມີຄວາມຕໍ່ເນື່ອງຕາມມະຕິຂອງກົມການເມືອງສູນກາງພັກ, ສາມາດສ້າງໄດ້ນັກການເມືອງ, ພະນັກງານນຳພາຄຸ້ມຄອງທີ່ເກັ່ງ, ມີຄວາມຮູ້ຄວາມສາມາດ, ມີຄວາມໜັກແໜ້ນທາງດ້ານຄຸນສົມບັດ, ສິນທຳປະຕິວັດຕອບສະໜອງໃຫ້ກັບສູນກາງແລະທ້ອງຖິ່ນ; ໃນຕໍ່ໜ້າຄວນຫັນທິດໄປສູ່ການບຳລຸງໃຫ້ຫຼາຍຂຶ້ນ.
ສາມ,ເພີ່ມທະວີການປະຕິບັດພາລະບົດບາດໃນການຄົ້ນຄວ້າທິດສະດີມາກ-ເລນິນ, ແນວຄິດໄກສອນພົມວິຫານ, ມູນເຊື້ອແລະປະຫວັດສາດຂອງພັກ, ຂອງຊາດ,… ໃນຕໍ່ໜ້ານີ້ການຄົ້ນຄວ້າວິທະຍາສາດຕ້ອງຕິດພັນກັບການຜັນຂະຫຍາຍມະຕິຂອງພັກ, ຄົ້ນຄວ້າທິດສະດີແລະສະຫຼຸບພຶດຕິກຳກ່ຽວກັບການພັດທະນາເສດຖະກິດສັງຄົມໃນແຕ່ລະໄລຍະ, ໃຫ້ມີຫຼາຍໂຄງການຄົ້ນຄວ້າລະດັບຊາດທີ່ມີລັກສະນະບຸກທະລຸປະດິດສ້າງທາງດ້ານທິດສະດີເພື່ອປະກອບສ່ວນເຂົ້າໃນການວາງແນວທາງຂອງພັກ, ນະໂຍບາຍຂອງລັດ. ສຳລັບການຄົ້ນຄວ້າແນວຄິດໄກສອນພົມວິຫານພວກສະຫາຍຕ້ອງຖືສຳຄັນແທ້ໆຖືເອົາວຽກງານດັ່ງກ່າວເປັນໃຈກາງໃນການເຄື່ອນໄຫວຄົ້ນຄວ້າວິທະຍາສາດໃນຊຸມປີຕໍ່ໜ້າ, ພ້ອມນີ້ສະຖາບັນກໍຄວນເຮັດບົດບາດເປັນໃຈກາງປະສານງານແລະດຶງເອົາສະຖາບັນຄົ້ນຄວ້າຕ່າງໆເຂົ້າຮ່ວມການຄົ້ນຄວ້າແນວຄິດໄກສອນພົມວິຫານ, ເມື່ອຮອດປີ 2025 ແນວຄິດ ໄກສອນ ພົມວິຫານ ຕ້ອງໄດ້ຮັບການຄົ້ນຄວ້າຢ່າງເປັນລະບົບ.
ສີ່,ອົງຄະນະພັກສະຖາບັນຄວນເອົາໃຈໃສ່ ກໍ່ສ້າງຖັນແຖວຄູ-ອາຈານ ແລະ ນັກວິ ທະຍາສາດໃຫ້ສູງຂຶ້ນກວ່າເກົ່າ, ມີລະດັບທາງດ້ານການຄົ້ນຄວ້າທິດສະດີ ແລະພຶດຕິກຳໃຫ້ຫຼາຍ, ມີຄວາມສາມາດ ແລະມີຫຼັກໝັ້ນການເມືອງໜັກແໜ້ນ, ມີຄຸນທາດການເມືອງທີ່ປອດໃສ, ມີຄວາມຮູ້ພາສາຕ່າງປະເທດ, ໄດ້ຮັບການກໍ່ສ້າງຢ່າງເປັນລະບົບ.
ຫ້າ,ຕໍ່ກັບວຽກງານພັກ, ບັນດາສະຫາຍຄົງເຂົ້າໃຈແຈ້ງແລ້ວວ່າສະຖາບັນເຮົາແມ່ນສະຖາບັນການສຶກສາຂັ້ນສູງຂອງພັກຫຼືຮຽກຢ່າງໜຶ່ງແມ່ນໂຮງຮຽນພັກ. ສະນັ້ນພວກສະຫາຍຈິ່ງຈະເຂົ້າໃຈແຈ້ງເຖິງຄວາມສຳຄັນໃນການຍົກສູງຄວາມເປັນແບບຢ່າງໃນວຽກງານກໍ່ສ້າງພັກ, ສ້າງໃຫ້ອົງຄະນະພັກສະຖາບັນກາຍເປັນອົງຄະນະພັກທີ່ເປັນແບບຢ່າງ, ສາມັກຄີ, ປອດໃສ, ເຂັ້ມແຂງ, ໜັກແໜ້ນ, ຍົກສູງຄວາມສາມາດໃນການນຳພາແລະກຳລັງແຮງສູ້ຮົບສູງຂຶ້ນ.
ຫົກ, ສຳລັບບັນດາສະຫາຍນັກສຶກສາ, ຖືເປັນກຽດຢ່າງສູງແລະມີຄວາມເອກອ້າງທະນົງໃຈທີ່ໄດ້ມີໂອກາດມາຮ່ຳຮຽນຢູ່ສະຖາບັນສູງສຸດຂອງພັກ, ກໍຍິ່ງຕ້ອງມີຄວາມຮັບຮູ້ຢ່າງເລິກເຊິ່ງຕໍ່ກັບຄວາມຮັບຜິດຊອບ, ໜ້າທີ່ຂອງຕົນ. ນີ້ແມ່ນໂອກາດເພື່ອໃຫ້ບັນດາສະຫາຍຍົກລະດັບ, ຄວາມຮູ້ຄວາມສາມາດໃນການປະຕິບັດໜ້າທີ່ວຽກງານ, ຝຶກຝົນຫລໍ່ຫຼອມຫຼັກໝັ້ນການເມືອງ, ບຳລຸງສ້າງອຸດົມການປະຕິວັດ.
ເຈັດ, ໃນການພັດທະນາໂຄງລ່າງແລະການປະກອບວັດຖຸເຕັກນິກຮັບໃຊ້ການຮຽນ-ການສອນໃຫ້ທັນສະໄໝເທື່ອລະກ້າວນັ້ນໃນເງື່ອນໄຂສະພາບເສດຖະກິດການເງິນມີຄວາມຫຍຸ້ງຍາກການຂຶ້ນແຜນງົບປະມານຕ້ອງບົນພື້ນຖານການປະຢັດ, ຄວນເບິ່ງສິ່ງຈຳເປັນອີ່ຫຼີ, ຕ້ອງຕິດພັນກັບແຜນພັດທະນາເສດຖະກິດ-ສັງຄົມຮອດປີ2025, ຍຸດທະສາດ2030 ແລະວິໄສທັດປີ2035.
ແປດ,ປັບປຸງບັນດາອົງການຈັດຕັ້ງມະຫາຊົນໃຫ້ເຂັ້ມແຂງຕິດພັນກັບການສ້າງຂະບວນການແຂ່ງຂັນຮັກຊາດພັດທະນາ, ເສີ່ມຂະຫຍາຍບົດບາດຕັ້ງໜ້າຂອງແຕ່ລະອົງການຈັດຕັ້ງໃນການປຸກລະດົມມະຫາຊົນເຂົ້າຮ່ວມສ້າງພັກ. ຄະນະພັກນອກຈາກມີແຜນການລວມໃນການປັບປຸງບັນດາອົງການຈັດຕັ້ງມະຫາຊົນໃນແຕ່ລະໄລຍະ, ຕ້ອງມີສະຫາຍໃດໜຶ່ງລົງເລີກວຽກງານຕົວຈິງ,
ເກົ້າ, ຕໍ່ຄະນະພັກສະຖາບັນຊຸດໃໝ່ຕ້ອງເສີມຂະຫຍາຍມູນເຊື້ອຄວາມສາມັກຄີອັນເປັນປຶກແຜ່ນ, ເພີ່ມທະວີຄວາມສາມັກຄີເປັນເອກະພາບ, ຕ້ອງມີຄວາມເຂັ້ມງວດໃນການຈັດຕັ້ງປະຕິບັດບັນດາຫຼັກການຈັດຕັ້ງ, ການເຄື່ອນໄຫວແລະດຳເນີນຊີວິດ, ຕ້ອງປັບປຸງແບບແຜນນຳພາ, ໃນຄະນະພັກມີການແບ່ງໜ້າທີ່ຮັບຜິດຊອບໃຫ້ຈະແຈ້ງ, ເຊີດຊູຄວາມຮັບຜິດຊອບທາງການເມືອງ, ຮັກສາຄວາມເປັນແບບຢ່າງນຳໜ້າ, ຮ່ວມແຮງຮ່ວມໃຈກັນແລະຊ່ວຍເຫຼືອກັນ.
ສິບ, ຕໍ່ກັບເລຂາຄະນະບໍລິຫານງານພັກຊຸດໃໝ່ ແມ່ນຜູ້ໜຶ່ງທີ່ເຕີບໃຫຍ່ ຂຶ້ນໃນຂະບວນການຕົວຈິງຕິດພັນກັບການເຕີບໃຫຍ່ຂະຫຍາຍຕົວຂອງສະຖາບັນ, ເປັນຜູ້ມີປະສົບການ, ບົດຮຽນໃນການນຳພາໃນລະດັບອັນແນ່ນອນ. ແຕ່ເຖິງຢ່າງໃດກໍດີຂໍໃຫ້ບັນດາສະຫາຍໃນຄະນະບໍລິຫານງານພັກ, ນັບທັງບັນດາສະຫາຍທີ່ອອກພັກບຳນານແລ້ວ, ກໍຄືບັນດາສະຫາຍຄະນະບໍລິຫານງານຊຸດໃໝ່ ຕະຫຼອດຮອດພະນັກງານ, ຄູ-ອາຈານ, ສະມາຊິກພັກ, ນັກສຶກສາຈົ່ງໄດ້ສືບຕໍ່ໃຫ້ການສະໜັບສະໜູນ, ຊ່ວຍເຫຼືອສະຫາຍເລຂາເພື່ອເຮັດສຳເລັດໜ້າທີ່ການເມືອງທີ່ກອງປະຊຸມໃຫຍ່ ມອບໝາຍໃຫ້. ພວກເຮົາຫວັງຢ່າງຍິ່ງວ່າສະຫາຍເລຂາຄະນະບໍລິຫານງານພັກພ້ອມດ້ວຍບັນດາສະຫາຍໃນຄະນະບໍລິຫານງານຊຸດໃໝ່ ແລະພະນັກງານ, ສະມາຊິກພັກທົ່ວສະຖາບັນຈະສຶບຕໍ່ເຮັດໜ້າທີ່ການເມືອງອັນສູງສົ່ງຂອງຕົນມີຜົນສຳເລັດຈົບງາມ.
ຂ່າວ: ຕາອັອດ ແສນທະວີສຸກ
ບັນນາທິການ: ຄອນສະຫວັນ ແສນຍານຸພາບ
ຮູບພາບ: ລຳພູນ ຖຸນໄຊຍາ+ນາງ ດອກໄມ້ ຈັນດາລາ
