ໃນວັນທີ 8-9 ກໍລະກົດ 2020 ຢູ່ທີ່ ຫ້ອງປະຊຸມໃຫຍ່ ຊັ້ນ 5 ຕຶກສູນຂໍ້ມູນຂ່າວສານ ສມປຊ, ສະຫະພັນແມ່ຍິງ ສມປຊ ໄດ້ຈັດຝຶກອົບຮົມ 4 ຫົວຂໍ້ ສະເພາະ ໃຫ້ສະມາຊິກສະຫະພັນແມ່ຍິງ ສມປຊ ໂດຍພາຍໃຕ້ການເປັນປະທານ ຂອງ ທ່ານ ປອ ນາງ ລໍາພູນ ດວນສຸວັນ ປະທານ ສະຫະ ພັນແມ່ຍິງ ສມປຊ, ມີຜູ້ຕາງໜ້າຈາກພາກສ່ວນທີ່ກ່ຽວຂ້ອງພາຍໃນ ສມປຊ ແລະສະມາຊິກສະຫະພັນແມ່ຍິງທີ່ເປັນສໍາມະນາກອນ ເຂົ້າຮ່ວມຢ່າງພ້ອມພຽງ.
ການຝຶກອົບຮົມຄັ້ງນີ້ແມ່ນເພື່ອເປັນການຍົກລະດັບຄວາມຮູ້ຄວາມສາມາດທີ່ຕິດພັນກັບໜ້າວຽກການສິດສອນ ແລະ ວຽກບໍລິຫານ, ຊຶ່ງໃນ 4 ຫົວຂໍ້ສະເພາະປະກອບ: 1). ການເປັນນັກປາຖະກະຖາທີ່ດີ, 2). ວິທີເກັບສຳເນົາເອກະສານ, 3). ຍົກລະດັບວິທີສິດສອນແບບໃໝ່ 4), ວິທີຂຽນບົດສະຫຼຸບ. ໂດຍສໍາມະນາກອນ 30 ທ່ານ ທີ່ຕາງໜ້າແມ່ຍິງ ຮາກຖານ ເຂົ້າຮ່ວມຝຶກອົບຮົມ ໄດ້ຮັບການຍົກລະດັບຄວາມຮູ້, ເຂົ້າໃຈຕໍ່ກັບ 4 ຫົວຂໍ້ຝຶກອົບຮົມດັ່ງກ່າວ. ຜ່ານການຈັດຕັ້ງປະຕິບັດ 2 ວັນ ເຫັນວ່າສຳມະນາກອນໄດ້ຕັ້ງໜ້າຮັບຟັງດ້ວຍຄວາມສົນໃຈໃນແຕ່ລະຫົວຂໍ້ ແລະໄດ້ມີຄໍາຖາມແຈະຈີ້ມໃນບັນຫາຕີ່ຕົນຍັງບໍ່ເຈົ້າໃຈ ນໍາວິທະຍາກອນ.
ໂອກາດດຽວກັນ ທ່ານ ປອ ນ. ລຳພູນ ດວນສຸວັນ ປະທານສະຫະພັນແມ່ຍິງ ສມປຊ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະຮັບຜິດຊອບ, ວິທະຍາກອນ ແລະ ສຳມະນາກອນ ທີ່ໄດ້ເອົາໃຈໃສ່ໃນການຮຽນ-ການສອນຈົນເຮັດໃຫ້ສໍາມະນາກອນສາມາດນຳໄປຜັນຂະຫຍາຍໂດຍພື້ນຖານໄດ້ ພ້ອມນີ້ ກໍໄດ້ຮຽກຮ້ອງມາຍັງສໍາມະນາກອນຈົ່ງນໍາເອົາທັກສະ ແລະ ວິຊາຄວາມຮູ້ໃນການຍົກລະດັບຄັ້ງນີ້ໄປພັດທະນາຕົນເອງໃຫ້ດີຂຶ້ນເທື່ອລະກ້າວ.
ຂ່າວ: ຕາອັອດ ແສນທະວີສຸກ
ຮູບພາບ+ບັນນາທິການ: ຄອນສະຫວັນ ແສນຍານຸພາບ
